(ភ្នំពេញ)៖ កម្លាំងនគរបាលខណ្ឌឫស្សីកែវ សហការជាមួយកម្លាំងនគរបាលប៉ុស្តិ៍ទួលសង្កែ១ បានធ្វើការចុះបង្ក្រាបទីតាំងជួញដូរ និងចែកចាយគ្រឿងញៀនមួយកន្លែង ដោយឃាត់ខ្លួន បានជនសង្ស័យប្រុស-ស្រី៥នាក់ ដកហូតថ្នាំញៀនចំនួន២០កញ្ចប់ និងឧបករណ៍ប្រើប្រាស់មួយចំនួន។
ប្រតិបត្តិការចុះបង្ក្រាបនេះ បានធ្វើឡើងនៅវេលាម៉ោង១២៖១០នាទីថ្ងៃត្រង់ ថ្ងៃសុក្រ ១៣កើត ខែពិសាទ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២៧ ខែមេសា ឆ្នាំ២០១៨នេះ ដែលស្ថិតនៅចំណុចផ្ទះជួលគ្មាន ក្រុម១៤ ភូមិចុងខ្សាច់ សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។
បើតាមមន្ដ្រីនគរបាល បានឲ្យដឹងថា ជនសង្ស័យប្រុស-ស្រី៥នាក់ ខាងលើនេះ រួមមាន៖
ទី១៖ ឈ្មោះ យិន សំរឹទ្ទ ភេទប្រុស អាយុ៣៥ឆ្នាំ មុខរបរ មិនពិតប្រាកដ (ជួញដូរ) ជនជាតិខ្មែរ ស្នាក់បន្ទប់ជួលខាងលើ
ទី២៖ ឈ្មោះ ភឹម ស្រីអូន ភេទស្រី អាយុ២២ឆ្នាំ មុខរបរ មិនពិតប្រាកដ (ជួញដូរ) ជនជាតិខ្មែរ មុខរបររត់តុ ស្នាក់ទីតាំងខាងលើ
ទី៣៖ ឈ្មោះ សៀង ស៊ីណា ភេទប្រុស អាយុ៣៦ឆ្នាំ មុខរបររត់កង់បី (ប្រើប្រាស់) ជនជាតិខ្មែរ ស្នាក់នៅបន្ទប់ជួល ភូមិទួលសង្កែ សង្កាត់ទួលសង្កែ
ទី៤៖ ឈ្មោះ វង្ស ថេង ភេទប្រុស អាយុ២៥ឆ្នាំ មុខរបរ មិនពិតប្រាកដ (ប្រើប្រាស់) ជនជាតិខ្មែរ ស្នាក់នៅភូមិទួលសង្កែ សង្កាត់ទួលសង្កែ
ទី៥៖ ឈ្មោះ សុខ រាជ ភេទប្រុស អាយុ២២ឆ្នាំ មុខរបរ មិនពិតប្រាកដ (ប្រើប្រាស់) ជនជាតិខ្មែរ ស្នាក់ទីតាំងខាងលើ។
សមត្ថកិច្ច បានឲ្យដឹងថា ប្រតិបត្តិការខាងលើនេះ គឺកម្លាំងសមត្ថកិច្ច បានធ្វើការស្រាវជ្រាវ រហូតឈានដល់ការចុះបង្ក្រាបទីតាំងជួញដូរ និងចែកចាយគ្រឿងញៀនខាងលើ ដោយក្នុងពេល ចុះបង្ក្រាបនោះ កម្លាំងសមត្ថកិច្ច បានឃាត់ខ្លួនមនុស្សប្រុស-ស្រី៥នាក់ ក្នុងនោះដកហូតថ្នាំញៀន ២០កញ្ចប់ និងឧបករណ៍ប្រើប្រាស់មួយចំនួន។
ក្រោយមកកម្លាំងសមត្ថកិច្ច បាននាំខ្លួនជនសង្ស័យទាំង៥នាក់ខាងលើ ទៅកាន់ប៉ុស្តិ៍នគរបាលទួលសង្កែ១ ដើម្បីធ្វើការសាកសួរ។ បច្ចុប្បន្នជនសង្ស័យប្រុស-ស្រីទាំង៥នាក់ខាងលើ រួមនឹងវត្ថុតាង ត្រូវសមត្ថកិច្ចបញ្ជូនខ្លួន ទៅកាន់អធិការដ្ឋាននគបាលខណ្ឌឫស្សីកែវ ដើម្បីកសាងសំណុំរឿង ចាត់ការបន្តតាមនីតិវិធីច្បាប់៕
