(ភ្នំពេញ)៖ លោក ឃួង ស្រេង អភិបាលរាជធានីភ្នំពេញ បានលើកឡើងថា រដ្ឋបាលរាជធានីភ្នំពេញ បានដាក់ចេញនូវយន្តការ៣ចំណុច ដើម្បីឆ្លើយតបទៅនឹងលំហូរចរាចរណ៍យានយន្ដ ទេសចរណ៍ សោភ័ណភាព និងការអភិវឌ្ឍន៍រីកចម្រើនលើវិស័យក្នុងរាជធានី។
ការលើកឡើងរបស់លោក ឃួង ស្រេង ធ្វើឡើងព្រឹកថ្ងៃទី២៦ ខែមេសា ឆ្នាំ២០១៨នេះ ក្នុងពិធីបើកអង្គសិក្ខាសាលាស្តីពីកិច្ចសហបរតិបត្តិការ រវាងរដ្ឋបាលរាជធានីភ្នំពេញ ជាមួយសាលាក្រុងប៉ារីស (២០១៦-២០១៨) លើវិស័យនគរូបនីយកម្ម ក្នុងរាជធានីភ្នំពេញ។
អង្គសិក្ខាសាលានេះធ្វើឡើង មានគោលបំណងប្រែក្លាយតំបន់ប៉ែកខាងត្បូងរាជធានីភ្នំពេញ ឲ្យទៅជាតំបន់អភិវឌ្ឍបៃតង និងការជំរុញនៃការអភិវឌ្ឍន៍តំបន់នោះ ឲ្យបានចៀសផុតពីគ្រោះទឹកជំនន់នារដូវស្សា។
បើតាមលោកអភិបាលរាជធានី យន្តការទាំង៣ចំណុចនោះរួមមាន ទី១៖ ភាពជាដៃគូរវាងរដ្ឋបាលរាជធានី ជាមួយវិស័យឯកជន, ទី២៖ ភាពជាដៃគូរវាងរដ្ឋបាលរាជធានីភ្នំពេញ ជាមួយទីក្រុងសម្ព័ន្ធមេត្រី និងទី៣៖ ភាពជាដៃគូរវាងរដ្ឋបាលរាជធានីភ្នំពេញ ជាមួយសង្គមស៊ីវិល ដើម្បីចូលរួមសហការ ជាមួយសាលារាជធានីភ្នំពេញ ក្នុងការកសាងហេដ្ឋារចនាសម្ព័ន្ធរូបវន្ត ដើម្បីឆ្លើយតបលំហូរចរាចរណ៍យានយន្ត ឲ្យសោភ័ណភាពកាន់តែស្រស់បំព្រង និងរីកចម្រើនបន្ថែមទៀត។
លោក ឃួង ស្រេង ថ្លែងថា «ភាគខាងត្បូងរាជធានីភ្នំពេញ គឺជាទំហំ នៃការអភិវឌ្ឍន៍ធំមួយ ដូច្នេះហើយទើបសាលាក្រុងប៉ារីស ដែលជាទីក្រុងមានបទពិសោធន៍ នៃការរៀបចំទីក្រុងឲ្យមានភាពស្រស់បំព្រង និងឲ្យតំបន់នោះក្លាយជាតំបន់បៃតង ដែលមានបរិស្ថានល្អ»។
រាជធានីភ្នំពេញ មានការអភិវឌ្ឍគ្រប់វិស័យ ពិសេសវិស័យហេដ្ឋារចនាសម្ព័ន្ធ សេវាកម្មសាធារណៈ សំណង់គ្រឹះស្ថាន អគារនានា ហើយក្នុងរាជធានីភ្នំពេញ បានចាប់ផ្តើមមានការអភិវឌ្ឍឆ្លើយតបនឹងកំណើនប្រជាជនទីក្រុង ដែលកើនឡើងយ៉ាងឆាប់រហ័ស រហូតដល់៣.២៥% ក្នុង១ឆ្នាំៗ និងចំនួនប្រជាជន បានកើនឡើងរហូតដល់១.៧លាននាក់ គឺប្រមាណជា៥៦% នៃប្រជាជនរាជធានី ដែលជាអ្នកចំណាកស្រុក ចូលមកសិក្សា និងធ្វើការ។ នេះបើតាមការអះអាងរបស់លោក ឃួង ស្រេង។
ជាមួយគ្នានេះ លោកស្រី អេឡូឌី គុយអង់កា តំណាងសាលាក្រុងប៉ារីស នៃសាធារណរដ្ឋបារាំង ថ្លែងថា ដើម្បីឆ្លើយតបនឹងស្ថានភាពនៃការអភិវឌ្ឍទីក្រុង ដែលរដ្ឋបាលរាជធានីភ្នំពេញ បាននិងកំពុងជួបប្រទះ គឺមានការងារពីរត្រូវបានដាក់ឲ្យសិក្សា។ ទី១៖ ការរៀបចំផែនការអភិវឌ្ឍតំបន់ភាគខាងត្បូងក្រុងភ្នំពេញ ដែលសព្វថ្ងៃកំពុងមានការអភិវឌ្ឍយ៉ាងខ្លាំង និងទី២៖ ការពង្រឹងការរំដោះ និងការគ្រប់គ្រងច្រាំងមាត់ទន្លេសាប ព្រមជាមួយពង្រីកទៅភាគខាងជើង នៃវិថីព្រះស៊ីសុវត្ថិ។
លោកស្រី បន្តថា ដើម្បីធ្វើការងារខាងលើឲ្យបានជោគជ័យ គឺមានវិធីសាស្រ្តមួយត្រូវបានស្នើឡើងជាពិសេស តាមរបៀបវាស់វែងជាក់ស្តែង ទុកជាមូលដ្ឋាន ក្នុងការកែតម្រូវឲ្យត្រូវនឹងតថភាពជាក់ស្តែងក្នុតំបន់នោះ។ វិធីសាស្រ្តនោះតម្រូវឲ្យប្រើទស្សនទានអន្តរវិស័យ និងពហុវិស័យ ដូចមានការងាររួមចម្រុះ ដែលទាមទារឲ្យគ្រប់អង្គភាពជំនាញពាក់ព័ន្ធ ត្រូវធ្វើការជាមួយគ្នាជាអាទិ៍ មន្ទីររៀបចំដែនដីនគរូបនីយកម្ម និងសំណង់ មន្ទីរនានាទីចាត់ការជំនាញ ខណ្ឌ សង្កាត់ និងរដ្ឋបាលផ្សេងៗ ទៀតរបស់រាជធានីភ្នំពេញ៕
