(ភ្នំពេញ)៖ ជាទូទៅសង្កេតឃើញថា​ ទូរទស្សន៍ CTN តែងតែសម្រឹតសម្រាំង​ រៀបចំកម្មវិធីកម្សាន្តសប្បាយរីករាយ​ ដើម្បីបម្រើអារម្មណ៍ទស្សនិកជន​ ហើយនៅក្នុងពេលឆាប់ៗខាងមុខនេះ​ កម្មវិធីមួយដែលមានឈ្មោះថា​ «ពីរគ្រួសារ»​ ដែលជាកម្មវិធីពីមុន​ និងចាប់ផ្តើមបង្ហាញរូបរាងជាថ្មី​ ប្លែក​ កំប្លែងសើចសប្បាយ​ នៅដើមខែ​ មិថុនា​ ខាងមុខនេះហើយ។

លោកសុវណ្ណ រិទ្ធី ហៅលោកតាវ៉ិចទ័រ បានថ្លែងបញ្ជាក់ថា ដោយសារបញ្ហាស្ពុនស័រ ទើបកម្មវិធី «ពីរគ្រួសារ»ត្រូវបានបិទចោល ដោយលោកមិនដែលរំពឹងថានឹងបានលេចឡើងជាថ្មីនោះទេ ដោយសារតែភាពជាក់ស្ដែងគឺកម្មវិធីរបស់CTN តែបិទចោលហើយ កម្រនឹងរស់ឡើងវិញ។ នៅពេលដែលកម្មវិធីនេះ​ ត្រូវបានចាប់ផ្តើមថតឡើងវិញ​លោកសម្ដែងការភ្ញាក់ផ្អើល ដែលកម្មវិធីនេះត្រូវបានថ្នាក់លើ​ បញ្ជាអោយដំណើរការវិញ ដោយអះអាងថាឈុតឆាករបស់កម្មវិធី​ ដែលបានបង្ហោះនៅលើយូធូប មានការទស្សនាច្រើនលានដង ដែលមិនខុសពីកម្មវិធីនេះផ្ទុះខ្លាំង។

លោកបន្តថា​ ការដំណើរការលើកនេះ កុងត្រា៦ខែសម្រាប់ជំហានដំបូង ដោយមានន័យថា​ បើមានការគាំទ្រពីក្រុមស្ពុនស័រ និងបន្តដំណើរការដោយគ្មានកំណត់ ប៉ុន្តែមាន​បញ្ហានឹងចាំមើលជាក់ស្ដែង។ យ៉ាងណាមិញ លោកថានឹងខំផលិតសាច់រឿង និងឈុតឆាកអោយកាន់តែល្អ និងប្លែកភ្នែក ដើម្បីជាសារអប់រំផង ដោយមិនគ្រាន់តែអោយដើម្បីជាការកម្សាន្តប៉ុណ្ណោះទេ។ កម្មវិធី «ពីរគ្រួសារ» គឺជាកម្មវិធីដែលមានខ្លឹមសារប្រកបអត្ថន័យខ្លាំងបំផុត សម្រាប់អ្នករស់នៅភ្នំពេញ ជាពិសេសអ្នកជាប់ផ្ទះគ្នាដែលតែងតែកើតទំនាស់ដាក់គ្នា ដោយលោកពេញចិត្តបំផុតព្រោះតែកម្មវិធីនេះមានខ្លឹមសារអប់រំល្អ។

លោកថាកម្មវិធីនេះ ចង់បង្ហាញពីបញ្ហាដែលបានកើតឡើងដោយសារតែខ្វះការយោគយល់របស់គ្រួសារជិតគ្នា ដោយរួមមានទំនាស់លើព្រំដី ទំនាស់មុខរបរ ទំនាស់ចិញ្ចើមផ្លូវ និងទំនាស់កើតពីការច្រណែនដាក់គ្នាជាដើម ដែលលោកនិយាយថាអ្នករស់នៅជាប់ផ្ទះគ្នា ឬរស់នៅក្នុងភូមិជាមួយគ្នា មិនគួរនឹងមានទំនាស់បែបនេះទាល់តែសោះ ក្នុងនាមជាមនុស្សលើផែនដីតែម្ដង។

តាមគម្រោងកម្មវិធីនេះនឹង​ ចាក់ផ្សាយនៅរៀងរាល់ថ្ងៃអាទិត្យ វេលាម៉ោង៧កន្លះ ដល់ម៉ោង៨កន្លះយប់ ខណៈដែលតារាសម្ដែង តារាចម្រៀង និងតារាក្រៅក្រុមផ្សេងទៀត ក៏ត្រូវជ្រើសអោយមកសម្ដែងដើម្បីពង្រីកសាច់រឿងផងដែរ៕