(កណ្ដាល)៖ យុវជនម្នាក់ដោយសារតែតណ្ហាឡើងដល់កម្រិត លបលួចឡើងលើផ្ទះគេ ទៅចាប់រំលោភកូនស្រីគេ តែត្រូវនាងរើបម្រាស់ ស្រែកឱ្យឪពុកម្តាយជួយ រួចប្តឹងនគរបាលឃាត់ខ្លួនចាត់ការទៅតាមផ្លូវច្បាប់។
មន្រ្តីតុលាការថ្លែងថា យុវជនល្មោភតណ្ហារូបនេះ ត្រូវបានលោក គឹម រ័ត្នណារិន អនុប្រធានសាលាដំបូងខេត្តកណ្ដាល និងជាចៅក្រមស៊ើបសួរ នៅល្ងាចថ្ងៃទី២៥ ខែមេសា ឆ្នាំ២០១៨ សម្រេចចេញដីកាឃុំខ្លួនដាក់ពន្ធនាគារបណ្តោះអាសន្ន ក្រោមការចោទប្រកាន់ពីបទ«ប៉ុនប៉ងរំលោភសេពសន្ថវៈ» តាមមាត្រា២៧ និងមាត្រា២៣៩ នៃក្រមព្រហ្មទណ្ឌ។
ហេតុការណ៍នេះ បានកើតឡើងនាយប់រំលងអធ្រាត្រ ថ្ងៃទី២៥ ខែមេសា ឆ្នាំ២០១៨នេះ នៅចំណុចផ្ទះ ជនរងគ្រោះភូមិព្រែករុន ឃុំព្រែកគយ ស្រុកស្អាង។
មន្ដ្រីនគរបាលឱ្យដឹងថា នារីរងគ្រោះ ឈ្មោះ ហ ហ ស អាយុ១៩ឆ្នាំ មានមុខរបរកម្មករ រស់នៅក្នុងបន្ទុកឪពុកម្តាយ ផ្ទះកើតហេតុ។ ចំណែកជនសង្ស័យឈ្មោះ ធួន សារ៉ាយ ហៅម៉ៅប្រុស អាយុ៣០ឆ្នាំ មុខរបរជាងសំណង់ ស្នាក់នៅក្នុងភូមិឃុំ កើតហេតុនិងមានទីលំនៅ ភូមិព្រែកប៉ុល ឃុំបន្ទាយដែក ស្រុកកៀនស្វាយ។
នគរបាលបន្តថា មុនពេលកើតហេតុ ជនរងគ្រោះចូលដេកម្នាក់ឯងនៅលើផ្ទះ ។ ចំណែកជនសង្ស័យបានទ្បើងទៅផ្ទះ របស់ជនរងគ្រោះ ឃើញជនរងគ្រោះកំពុង ដេកក្នុងមុងម្នាក់ឯង ក៏ប៉ើងជើងមុងចូល រួចចាប់ច្របាច់ក និងខ្ទប់មាត់ថើបថ្ពាល់ ។ ជនរងគ្រោះ បានរើបម្រាស់និងខាំដៃជនសង្ស័យ ហើយស្រែកឱ្យឪពុកម្តាយជួយ ពេលនោះឪពុកម្តាយ ឮក៏ឡើងទៅ ឃើញជនសង្ស័យនៅក្នុងមុងកូនស្រី។
មន្ត្រីដដែលរូបនេះ បានបន្ថែមទៀតថា លុះដល់ម៉ោង០២៖១៧នាទី ថ្ងៃ២៥ ខែមេសា ឆ្នាំ២០១៨ ឪពុកបានទូរស័ព្ទមកប្តឹង នគរបាលប៉ុស្តិ៍ព្រែកគយ ពេលនោះសមត្ថកិច្ច នគរបាលប៉ុស្តិ៍ព្រែកគយ សហការជាមួយកម្លាំងអធិការដ្ឋាន នគរបាលស្រុក បានឃាត់ខ្លួនជនសង្ស័យ យកមកអធិការដ្ឋានដើម្បីបន្តនីតិវិធីតែម្ដង៕
