(ម៉ាឡេស៊ី)៖ លោកឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី អញ្ជើញសាកសួរសុខទុក្ខសំណេះសំណាល ជាមួយពលរដ្ឋខ្មែរនៅម៉ាឡេស៊ី រដ្ឋJohor Baharu ដោយមានការចូលរួមពី លោកស្រី រត្ន ម៉ានី ឯកអគ្គរាជទូតកម្ពុជា ប្រចាំប្រទេសម៉ាឡេស៊ី និងសហការីផងដែរ។
ជំនួបនេះធ្វើឡើង នៅឯតំបន់ Ulutiram នាព្រឹកថ្ងៃទី២២ ខែមេសា ឆ្នាំ២០១៨ ដោយមានតំណាង និងបងប្អូនខ្មែរមកពីបណ្តាភូមិ តំបន់ជុំវិញ រដ្ឋ Johor Baharu ដែលអ្នកខ្លះបានមករស់នៅរួមរស់តាំង ពីទស្សវត្ស៧០ ទស្សវត្ស៨០ និងជាបន្តបន្ទាប់។ រដ្ឋ Johor Baharu ជារដ្ឋដែលមានចម្ងាយប្រមាណ ជិត៤០០គីឡូម៉ែត្រ ពីរដ្ឋធានីកូឡាឡាំពួរ។
លោកស្រី រត្ន ម៉ានី ក្នុងនាមជាឯកអគ្គរាជទូតកម្ពុជា នៅម៉ាឡេស៊ី លើកឡើងពីគោលជំហ និងតួនាទីរបស់ខ្លួន នឹងឈរលើឆន្ទៈបម្រើប្រជាជនខ្មែរ ដែលនៅម៉ាឡេស៊ី ស្វាគមន៍ជានិច្ចនូវរាល់បញ្ហាផ្សេងៗ ដែលពលរដ្ឋជួបប្រទះ ដោយមិនបង្កការប៉ះពាល់ដល់ច្បាប់ នៃប្រទេសម៉ាឡេស៊ី។
បន្ទាប់ពីបានលើកឡើងពីការផ្តាំផ្ញើសាកសួរសុខទុក្ខ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត, លោកឧកញ៉ា អូស្មាន ហាស្សាន់ បានជម្រាបពីភាពរីកចម្រើន គ្រប់បែបយ៉ាងរបស់កម្ពុជា ក្រោមគោលនយោបាយដឹកនាំរបស់សម្តេចតេជោ ហ៊ុន សែន បើគ្មានការដឹកនាំប្រកបដោយឆន្ទៈមុះមត់ ស្មារតីលះបង់ខ្ពស់ គិតគូរអំពីផលប្រយោជន៍ជាតិជាធំទេរបស់ប្រមុខដឹកនាំទេ គឺកម្ពុជា មិនមែនសម្រេចបានដោយជោគជ័យក្លាយទៅជាប្រទេស ដែលមានសុខសន្តិភាព សុខដមបនីយកម្ម និងការអភិវឌ្ឍន៍ សេដ្ឋកិច្ចរីកចម្រើនបានល្អប្រសើរដូចសព្វថ្ងៃនោះទេ។
លោក អូស្មាន ហាស្សាន់ បានកោតសរសើរដល់ពលរដ្ឋខ្មែរទាំងអស់ អ្នកដែលទទួលបានសញ្ជាតិ និងអ្នកដែលនៅបំពេញការងារ គឺបានសាមគ្គី រួមរស់ប្រកបដោយសេចក្តីសុខ សប្បាយ មិនដែលឭពីបញ្ហាបង្កការលំបាក នាំភាពខ្វល់ខ្វាយដល់រដ្ឋាភិបាលម៉ាឡេស៊ី ក៏ដូចជារាជរដ្ឋាភិបាលកម្ពុជាខ្លួនឯង ដែលនេះគឺជាកសាងកេរ្តិ៍ឈ្មោះមួយ យ៉ាងល្អប្រសើរជូនប្រជាជាតិកម្ពុជាទាំងមូល។
បន្ទាប់ពីបញ្ចប់កម្មវិធី គណៈប្រតិភូកម្ពុជា ក៏បានបន្តដំណើរទៅតបន់ Sungai Boluh រដ្ឋ Selangor ប្រទេសម៉ាឡេស៊ី ដែលមានចម្ងាយប្រមាណជាង ៤០០គីឡូម៉ែត្រពីរដ្ឋ Johor Baharu ដើម្បីបន្តជួបសំណេះសំណាលជាមួយបងប្អូនខ្មែរ ដែលនៅតំបន់នេះ៕
