(រតនគិរី)៖ ប្រធានមន្ទីរទេសចរណ៍ខេត្តរតនគិរី លោក ង៉ែត ពិទូ បានឲ្យដឹងថា នៅក្នុងកំឡុងពេលនៃពិធីបុណ្យចូលឆ្នាំថ្មី ប្រពៃណីជាតិខ្មែរ រយៈពេល០៣ថ្ងៃ នៅក្នុងខេត្តរតនគិរី ទទួលបានភ្ញៀវទេសចរចំនួន៧៨,០០៨នាក់ កើនឡើង៣.៦% ក្នុងនោះមានភ្ញៀវជាតិកើនឡើង៣.៥% ភ្ញៀវអន្តរជាតិកើនឡើង១៥.០%។
លោកបានបន្តថា ការកើនឡើងជារៀងរាល់ឆ្នាំ នៃចំនួនភ្ញៀវទេសចរនេះ ដោយសារកត្តាសុខសន្តិភាពជាចម្បង និងកំណើនសេដ្ឋកិច្ចប្រជាពលរដ្ឋ កាន់តែប្រសើរឡើង ពួកគាត់មានមធ្យោបាយធ្វើដំណើរ និងលទ្ធភាពក្នុងការចំណាយ និងហេដ្ឋារចនាសម្ព័ន្ធតភ្ជាប់ពីខេត្តមួយទៅខេត្តមួយ ងាយស្រួលក្នុងការធ្វើដំណើរ។
ជាងនេះទៅទៀត ខេត្តរតនគិរី ក្រោមការដឹកនាំរបស់លោក ថង សាវុន អភិបាលខេត្ត ឆ្នាំកន្លងមកនេះ និងក្នុងឆ្នាំនេះតែម្តង អាជ្ញាធរខេត្តបានរៀបចំព្រឹត្តិការណ៍ «សង្ក្រាន្តយក្សឡោម ខេត្តរតនគិរី» ដែលមានការរាំកម្សាន្ត ការលេងល្បែងប្រជាប្រិយ៍ខ្មែរ ការតាំងពិព័រណ៌ផលិតផលក្នុងស្រុកផ្សេង បានទាក់ទាញប្រជាពលរដ្ឋ គ្រប់មជ្ឈដ្ឋានបានចូលរួមទស្សនាលេងកម្សាន្ត។
សូមបញ្ជាក់ថា នៅខេត្តរតនគិរី មានរមណីយដ្ឋានចំនួន១៤កន្លែង ក្នុងនោះរមណីយដ្ឋានធម្មជាតិចំនួន១២កន្លែង និងរមណីយដ្ឋានវប្បធម៌ធម្មជាតិ ចំនួន២កន្លែង ហើយរមណីយដ្ឋានទេសចរណ៍ធម្មជាតិ ចំនួន៨កន្លែង គ្រប់គ្រងដោយសហគមន៍ជនជាតិដើមភាគតិច ដើម្បីរកចំណូលតាមរូបភាពទេសចរណ៍ រមណីយដ្ឋានទាំងនេះ រួមមាន៖ បឹងយក្សឡោម ទឹកជ្រោះកាចាញ ទឹកជ្រោះកាទៀង ទឹកជ្រោះចាអ៊ុង ទឹកជ្រោះអូរស៊ិនលែរ៍ បឹងលំកុដ ទឹកជួរតាតតៃ និងទឹកជួរទឹង។
