(កូរ៉េខាងត្បូង)៖ នៅទីបំផុតកិច្ចខិតខំប្រឹងប្រែងអស់ពីសមត្ថភាពរបស់កញ្ញា​ ធី សុវណ្ណថា ដែលចូលរួមប្រកួតប្រជែង «កម្មវិធីរាជនីសម្រស់» លំដា​ប់ពិភពលោក ទទួលបានពានរង្វាន់ Queen of the Spa Korea 2018 ជាមួយទឹកប្រាក់សរុបប្រមាណជាង៥២ម៉ឺនដុល្លារសហរដ្ឋអាមេរិក។ នេះគឺកិត្តិយសដ៏អស្ចារ្យសម្រាប់ជូនជាតិកម្ពុជា និងប្រជាពលរដ្ឋកម្ពុជាទាំងមូល។

ម្ចាស់ពីពានរង្វាន់ Queen of the Spa Korea 2018 កញ្ញា ធី សុវណ្ណថា បានប្រាប់បណ្តាញព័ត៌មាន Fresh News ទាំងកណ្តាលរាត្រី ខណៈកញ្ញាទើបត្រឡប់មកដល់ ទឹកដីកម្ពុជា នៅម៉ោងប្រមាណ១១៖៥០នាទីយប់ថ្ងៃទី១៦ ខែមេសា ឆ្នាំ២០១៨នេះឲ្យដឹងថា បន្ទាប់ពីកញ្ញាជាប់ទទួលបានពានរង្វាន់ Queen of the Spa Korea 2018 កញ្ញាទទួលបានទឹកប្រាក់សរុបរហូតដល់ជាងកន្លះលានដុល្លារ។ ដោយក្នុងនោះរួមមាន៖ ១៖ ប្រាក់រង្វាន់កម្មវិធី​ ៣ម៉ឺនដុល្លារ, ២​៖ ប្រាក់រង្វាន់កែសម្ផស្ស ៣ម៉ឺនដុល្លារ, ៣៖ ប្រាក់រង្វាន់ទេសចរណ៍​ ៣ម៉ឺនដុល្លារ ៤​៖ ប្រាក់រង្វាន់ផលិតផល​ ១ម៉ឺនដុល្លា​រ, ៥​៖ ប្រាក់រង្វាន់កុងត្រាថត​ ដោយក្រុមហ៊ុន៨​ពីប្រទេស​កូរ៉េ​ វៀតណាម​ ថៃ​ ម៉ាឡេស៊ី​ និងកម្ពុជា​ សរុបជាង​ ៤២ម៉ឺនដុល្លារ។

ថ្លែងបញ្ជាក់បន្ថែមប្រាប់បណ្តាញព័ត៌មាន Fresh News ពីអាកាសយានដ្ឋានអន្តរជាតិភ្នំពេញឲ្យដឹងថា ក្រោយពីទទួលបានប្រាក់រង្វាន់ខាងលើនេះ កញ្ញា ធី សុវណ្ណថា ដែលក៏បានប្រកាសនឹងបែងចែកប្រាក់នេះជា៤ផ្នែក៖ ដោយទី១៖ ជួយឧបត្ថម្ភធ្វើផ្លូវបេតុង ឃុំត្រើយស្លា​ ស្រុកស្អាង ខេត្តកណ្តាល.. ២​៖ ជួយឧបត្ថម្ភ​ កម្មវិធីបណ្តុះបណ្តាលរបាំខ្មែរ, ៣​៖ ជួយគម្រោង​ អេកូទេសចរណ៍តំបន់អារ៉ែង​, ៤​៖ ជូយគម្រោង​អាហារូបករណ៍​សិស្ស​ក្រីក្រ​៕