(ព្រះសីហនុ-កែប)៖ អាជ្ញាធរខេត្តព្រះសីហនុ និងខេត្តកែប បានចេញសេចក្ដីជូនដំណឹង ដល់បងប្អូនប្រជាពលរដ្ឋទាំងអស់ ពិសេស កម្មករ កម្មការិនី អំពីទីតាំង និងពេលវេលា ដែល បងប្អូនប្រជាពលរដ្ឋ អាចឡើងជិះរថយន្តក្រុងសាធារណៈ (City Bus) ដោយឥតគិតថ្លៃ ត្រឡប់មករាជធានីភ្នំពេញវិញ ចាប់ពីថ្ងៃទី១៧ ខែមេសា ស្អែកនេះ ដល់ថ្ងៃទី១៨ ខែមេសា។

បងប្អូនប្រជាពលរដ្ឋ ដែលរស់នៅខេត្តព្រះសីហនុ រថយន្តក្រុងសាធារណៈ នឹងចាប់ចេញដំណើរពីវេទិកា៧មករា​ (​វិមានឯករាជ្យ​)​ ទៅកាន់ភ្នំពេញ​ ចាប់ពីម៉ោង​ ៦​៖៣០នាទី,​ ៧៖៣០នាទី​,​ ៨៖៣០នាទី​ និង​ ៩៖៣០នាទី​។ កម្មវិធីនេះ នឹងបញ្ចប់ត្រឹម ព្រឹកថ្ងៃទី​១៨​ ខែមេសា​ ឆ្នាំ២០១៨។

ដោយឡែកសម្រាប់ បងប្អូនប្រជាពលរដ្ឋ ដែលរស់នៅខេត្តកែប រថយន្តក្រុងសាធារណៈ នឹងរង់ចាំដឹកជញ្ជូនបងប្អូន នៅមុខសាលាបឋមសិក្សា ប៊ុន រ៉ានី ហ៊ុន សែន ដំណាក់ចង្អើរ តាមបណ្ដោយផ្លូវជាតិលេខ ៣៣ ក្នុងភូមិដំណាក់ចង្អើរ សង្កាត់ព្រៃធំ ក្រុងកែប ចាប់ពីវេលាម៉ោង ០៥៖០០ នាទីព្រឹកស្អែកនេះ៕