(សៀមរាប)៖ លោក ពេជ្រ ស្រស់ ប្រធានគណបក្សយុវជនកម្ពុជា នៅថ្ងៃទី១០ ខែមេសា ឆ្នាំ២០១៨នេះ បានរៀបចំពិធីប្រកាសទទួលស្គាល់ក្រុមការងាររបស់ខ្លួន ប្រចាំខេត្តសៀមរាប ដែលសុទ្ធតែដើរចេញពីអតីតបក្សសង្គ្រោះជាតិ ដោយសារមើលឃើញនូវទង្វើក្បត់ជាតិ។
បើតាមលោក ពេជ្រ ស្រស់ ក្នុងពិធីប្រកាសនេះ គឺលោក ម៉ែន សារ៉ន ជាប្រធានគណៈពង្រឹងខេត្ត ដែលអតីតជាសកម្មជនរបស់អតីតគណបក្សសង្រ្គោះជាតិ ប្រចាំខេត្តសៀមរាប និងលោក ឈុន សុគន្ធ ជាប្រធានចលនាយុវជនរបស់គណបក្សយុវជនកម្ពុជា ប្រចាំខេត្តសៀមរាប ជាអតីតក្រុមការងារចលនាយុវជន មកពីអតីតគណបក្សសង្រ្គោះជាតិប្រចាំខេត្តសៀមរាប។
ក្រោយប្រកាសទទួលស្គាល់ ទាំងលោក ម៉ែន សារ៉ន និងលោក ឈុន សុគន្ធ បានលើកឡើងថា ការចាកចេញពីអតីតគណបក្សសង្គ្រោះជាតិ ដោយសារមើលឃើញ នូវទង្វើក្បត់ជាតិ ដោយមានការឃុបឃិតគ្នាជាប្រព័ន្ធជាមួយបរទេស ដើម្បីបំផ្លាញសន្ដិភាពដែលមានសព្វថ្ងៃនេះ ហើយពួកគាត់អះអាងថា «យើងរួមគ្នា ដើម្បីអភិវឌ្ឍន៍ជាតិខ្មែរ ឲ្យរីកចម្រើនជានិច្ចនិរន្ត»៕
