(ព្រៃវែង)៖ លោក ជា សុមេធី អភិបាលខេត្តព្រៃវែង នៅរសៀលថ្ងៃទី០៩ ខែមេសា ឆ្នាំ២០១៨នេះ បានជួបសំណេះសំណាលជាមួយលោកគ្រូ អ្នកគ្រូ សិស្សានុស្ស និងប្រជាពលរដ្ឋនៅឃុំកំពង់ឬស្សី ស្រុកពោធិ៍រៀង និងកាត់ខ្សែបូរដាក់ឲ្យប្រើប្រាស់អគារសិក្សា១ខ្នង ៥បន្ទប់ នៅស្រុកពោធិ៍រៀង ដែលជាការឧបត្ថម្ភដោយលោកស្រី សៅ ស្រីនាង និងលោកស្រី សៅ ស្រីកា ព្រមទាំងក្រុមគ្រួសារ មានតម្លៃ៣៨,៩៦៨ដុល្លារ។
លោកអភិបាលខេត្ត បានលើកឡើងថា គឺជាទឹកចិត្តដ៏វិសេសវិសាល ដែលប្រជាពលរដ្ឋខ្មែរសហការជួយគ្នា ក្នុងការអភិវឌ្ឍប្រទេសជាតិ រួមជាមួយរាជរដ្ឋាភិបាល សំដៅបណ្តុះបណ្តាលធនធានមនុស្សឲ្យបានរឹងមាំ ពីថ្នាក់បឋមសិក្សា រហូតដល់មហាវិទ្យាល័យ ដើម្បីឲ្យមានជំនាញពិតប្រាកដជួយថែរក្សាសន្តិភាព ជួយអភិវឌ្ឍប្រទេសជាតិបានរុងរឿងជាលំដាប់។
ជាមួយគ្នានោះ លោក ជា សុមេធី បានផ្តាំផ្ញើដល់មាតា បិតាទាំងអស់ ត្រូវនាំកូនមកចុះឈ្មោះចូលរៀនឲ្យបានគ្រប់ៗ កុំឲ្យកូនចៅបោះបង់ការសិក្សា ពីព្រោះនៅក្នុងខេត្ត ស្រុក ក្រុង ឃុំ សង្កាត់ទាំងអស់មានសាលារៀនគ្រប់គ្រាន់ មានសន្តិភាពពេញលេញ មានជីវភាពសមរម្យគ្រប់ៗគ្នា ដូចច្នេះត្រូវបញ្ជូនកូនឲ្យមកសិក្សា ដើម្បីអនាគតកូន ក្រុមគ្រូសារ និងប្រទេសជាតិ។
លោកអភិបាល បានណែនាំដល់អាជ្ញាធរមានសមត្ថកិច្ច និងប្រជាប្រជាពលរដ្ឋការអនុវត្តគោលនយោបាយភូមិ ឃុំមានសុវត្ថភាពទាំង០៩ចំណុចឲ្យបានល្អ ដើម្បីរក្សាសន្តិសុខ និងសុវត្ថិភាពជូនប្រជាពលរដ្ឋឲ្យបានល្អ ហើយត្រូវយកចិត្តទុកដាក់បម្រើ និងផ្តល់សេវាសាធារណៈជូនប្រជាពលរដ្ឋឲ្យបានល្អ និងទាន់ពេលវេលា៕
