(ស្ទឹងត្រែង)៖ មន្ដ្រីកងរាជអាវុធហត្ថ នៃបញ្ជាការដ្ឋានកងរាជអាវុធហត្ថខេត្តស្ទឹងត្រែង ចំនួន៣០នាក់ ក្នុងនោះមាន០៥នាក់ ត្រូវបានប្រកាសមុខងារ និង២០នាក់ ត្រូវបំពាក់ឋានន្ដរស័ក្ដិ នៅព្រឹកថ្ងៃទី០៩ ខែមេសា ឆ្នាំ២០១៨នេះ ក្រោមវត្តមានលោកឧត្តមសេនីយ៍ត្រី អៀង វ៉ាន់ឌី មេបញ្ជាការអាវុធហត្ថខេត្តស្ទឹងត្រែង។
ថ្លែងក្នុងពិធីបិទវគ្គបំប៉នជំនាញឆមាសទី១ ឆ្នាំ២០១៨ និងបូកសរុបលទ្ធផលការងារត្រីមាសទី២ និងប្រកាសតែងតាំងផ្លាស់ប្ដូរមុខងារ បំពាក់ឋានន្ដរស័ក្ដិ, លោកឧត្តមសេនីយ៍ត្រី អៀង វ៉ាន់ឌី បានបញ្ជាឲ្យនាយ និងពលអាវុធហត្ថទូទាំងខេត្ត ត្រូវយកចិត្តទុកដាក់ការពារ សន្តិសុខ សណ្តាប់ធ្នាប់ ជូនប្រជាពលរដ្ឋឲ្យបានល្អ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនិងចូលមកដល់ ក្នុងរយៈពេលដ៏ខ្លីខាងមុខនេះ។
លោកឧត្តមសេនីយ៍ត្រីមេបញ្ជាការ បានលើកឡើងថា នៅសល់តែប៉ុន្មានថ្ងៃទៀតប៉ុណ្ណោះ បុណ្យចូលឆ្នាំថ្មីប្រពៃណីជាតិ និងចូលមកដល់ ដែលរយៈពេល នៃពិធីបុណ្យចូលឆ្នាំ៣ថ្ងៃ គឺបងប្អូនប្រជាពលរដ្ឋ បានដើរលេងកំសាន្តតាមរម្មណីយដ្ឋាននានា ឫក៏ជួបជុំគ្នា លេងល្បែងប្រជាប្រិយតាមទីប្រជុំជន និងវត្តអារ៉ាមជាដើម។
លោកថាដូច្នេះអ្វី ដែលជាតួនាទី និងភារកិច្ចរបស់ កងកម្លាំងប្រដាប់អាវុធ ដោយអនុវត្តតាមបទបញ្ជារបស់លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពល ខេមរៈភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក៏ដូចជាគណៈបញ្ជាការឯកភាពរដ្ឋបាលខេត្ត គឺត្រូវការពារ សន្តិសុខ សណ្តាប់ធ្នាប់ ជូនប្រជាពលរដ្ឋឲ្យបានល្អប្រសើរ។
មេអាវុធហត្ថខេត្តស្ទឹងត្រែង បានបន្ថែមទៀតថា «ដូច្នេះពេលនេះ គឺយើងត្រូវធ្វើផែនការ ការពារឲ្យហើយ តាមលក្ខណៈភូមិសាស្ត្រ របស់យើងរៀងៗខ្លួន លើសពីនេះ ត្រូវត្រៀមលក្ខណៈទប់ស្កាត់ រាល់បទល្មើសនានា ដែលកើតមានឡើង នៅក្នុងឱកាសនៃពិធីបុណ្យចូលឆ្នាំនេះ»។
ជាមួយគ្នានេះ លោកមេបញ្ជាការកងរាជអាវុធហត្ថខេត្តស្ទឹងត្រែង ក៏បានផ្តាំផ្ញើដល់នាយ និងពលអាវុធហត្ថ ដែលបានបំពាក់ឋានន្តរសក្ដិ និងបានប្រកាសមុខងារ នៅពេលនេះ ត្រូវខិតខំធ្វើការអនុវត្តតួនាទី ភារកិច្ចរបស់ខ្លួនឲ្យបានល្អ ស្របតាមបទបញ្ជា និងវិន័យរបស់អាវុធហត្ថផងដែរ។
សូមជម្រាបថា ព្រឹកថ្ងៃទី០៨ ខែមេសា ឆ្នាំ២០១៨ លោកឧត្តមសេនីយ៍ត្រី អៀង វ៉ាន់ឌី បានទទួលស្វាគមន៍ ដល់គណៈប្រតិភូយោធាខេត្តយ៉ាឡាយ ប្រទេសវៀតណាម ដឹកនាំដោយលោកវសេនីយ៍ឯកឡេ ទៀនហៀន ប្រធាននយោបាយយោធាខេត្ត បានអញ្ជើញចុះមកជូនពរ និងសួរសុខទុក្ខ ដល់អង្គភាពកងរាជអាវុធហត្ថខេត្តស្ទឹងត្រែង ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខនេះផងដែរ៕
