(ភ្នំពេញ)៖ ខ្សែភាពយន្តភាគខ្មែររឿង «ម្ចាស់បំណុល» ជាវណ្ណកម្មថ្មីរបស់ផលិតកម្ម មហាហង្ស ដែលបានសហការ យ៉ាងជិតស្និទ្ធជាមួយស្ថានីយទូរទស្សន៍ PNN ដោយបានសម្រិតសម្រាំងយ៉ាងម៉ត់ចត់ និង​យកចិត្តទុកដាក់ ទាំងការសម្តែង និង​ប្លង់ថត ដើម្បីបង្កើតឲ្យខ្សែភាពយន្ត មួយដែលល្អឥតខ្ចោះ ជូនទៅដល់មហាជន ទទួលបាននូវទស្សនីយភាព ប្លែកអារម្មណ៍ ដោយភាពយន្តនេះ នឹងដាក់បញ្ចាំងក្នុងពេលឆាប់នេះហើយ។

នាថ្ងៃដាក់សម្ពោធរឿង​ «ម្ចាស់​បំណុល» នៅ​ Hard Rock Cafe លោក អ៊ិន សុភិន បានសម្ដែងក្ដីត្រេកអរ និង​មានក្ដីរំភើបជាខ្លាំង ដែលរឿង «ម្ចាស់បំណុល» បានចាក់បញ្ចាំងជាផ្លូវការ នៅក្នុងស្ថានីយទូរទស្សន៍ PNN ហើយលោកក៏មានការកោតសរសើរ ទៅដល់សហការី ក៏ដូចជាក្រុមការងារ ​និង​តារាសម្ដែង នៅក្នុងផលិតកម្មមហាហង្ស ដែលបានយកចិត្តទុកដាក់ អស់ពីកម្លាំងកាយ​ចិត្ត ដែលជាផ្នែកុមួយជួយឲ្យខ្សែភាពយន្ត មានភាពល្អប្រសើរ ដំណើរការទៅមុខយ៉ាងរលូន រហូតអាចដាក់បញ្ចាំង នៅតាមស្ថានីយទូរទស្សន៍​ បានយ៉ាងច្រើន។

លោក អ៊ិន សុភិន បានផ្ដល់ក្ដីរំពឹងយ៉ាងខ្ពស់ថា «រឿង «ម្ចាស់បំណុល» នេះ នឹងអាចទទួលបានការគាំទ្រ ពីសំណាក់ទស្សនិកជន ក្រោយការដាក់បញ្ចាំង នៅតាមកញ្ចក់ទូរទស្សន៍ ព្រោះសាច់រឿងទាំងមូល បង្គប់ទៅដោយឈុតឆាកមនោសញ្ចេតនា ស្នេហា ប្រទាក់ក្រឡាគ្នា​ជាច្រើន ដែលបានបង្រៀន និង​អប់រំមនុស្ស ត្រូវមានចិត្តតស៊ូ អំណត់ ព្យាយាម ពុះពារគ្រប់ឧបសគ្គ ដែលមាននៅចំពោះមុខ ថែមទាំងបង្ហាញពីរសជាតិជីវិតខុសគ្នា រវាងអ្នកមាន និង​អ្នកក្រ ពោលគឺ​ឆ្លុះបញ្ចាំងពីជីវិតរស់ នៅក្នុងសង្គម នាពេល​បច្ចុប្បន្ន តែម្ដង។ ដោយឡែក ចំពោះ​បច្ចេកទេសនៃការថត រួមទាំង ទេសភាព សុទ្ធសឹងតែស្រស់ស្អាត ដោយផ្ដិតយកតំបន់ធម្មជាតិ ជាច្រើន នៃប្រទេសកម្ពុជា។ នេះគឺជាខ្សែភាពយន្ត ដែលមើលមិនចេះជិនណាយ ព្រោះមានអត្ថន័យជាច្រើន ដែលពាក់ព័ន្ធនឹងស្នេហាកំសត់ ព្រាត់ប្រាស់ ស្រក់ទឹកភ្នែកមិនដឹងខ្លួន។

ជាចុងក្រោយ ផលិតកម្មមហាហង្ស នៅតែសហការគ្នាជាមួយស្ថានីយទូរទស្សន៍ PNN ដោយ ផ្ដោតសំខាន់ទៅលើគុណភាព និង​ខិតខំអស់ពីកម្លាំងកាយចិត្ត ដើម្បីឲ្យខ្សែភាពយន្តខ្មែរ កាន់តែមានភាពល្អប្រសើរឡើង​។

គួរបញ្ជាក់ថា រឿង «ម្ចាស់បំណុល» មានការចូលរួមសម្តែង ពីសំណាក់តារាប្រុសស្រីជាច្រើន ​មានដូចជា អ្នកនាង ភិនសុដាលីស​, ​លោក ភឹមតារាវិបុល ,​លោក ជា ភារុណ , លោក ថមមី , កញ្ញា សឿន ផាន់ផាផួង កញ្ញា ដាវ ដាវីកា និង តារាកិត្តយសជាច្រើនដួង​ទៀត។ រឿងនេះ នឹងចាប់ផ្ដើមចាក់ផ្សាយថ្ងៃទី ២០ មេសា ឆ្នាំ ២០១៨ នៅលើស្ថានីយទូរទស្សន៍ PNN នៅរៀងរាល់ថ្ងៃព្រហស្បតិ៍ សុក្រ និង សៅរ៍ វេលាម៉ោង ៧៖​៥០​នាទី​យប់៕