(សៀមរាប)៖ អភិបាលខេត្ដសៀមរាប លោក ឃឹម ប៊ុនសុង នៅថ្ងៃទី០៧ ខែមេសា ឆ្នាំ២០១៨នេះ ដឹកនាំយុទ្ធនាការ «សៀមរាបផ្ទះខ្ញុំ» ក្រោមប្រធានបទ »សម្អាតបរិស្ថានក្រុងសៀមរាប ជាលក្ខណៈទ្រង់ទ្រាយធំ» ដែលធ្វើការលាងសម្អាតកំណាត់ផ្លូវស៊ីវុត្ថា ចាប់ពីចំណុចស្តុបសុខា រហូតដល់រង្វង់មូលនាគបាញ់ទឹក និងកំណាត់ផ្លូវមុខមន្ទីរពេទ្យបង្អែកខេត្ត រហូតដល់កំណាត់ផ្លូវជុំវិញតំបន់ផាប់ស្រ្ទីត (Pub Street) ក្រុងសៀមរាប។

​ក្នុងយុទ្ធនាការទ្រង់ទ្រាយធំនេះ ​មានការចូលរួមថ្នាក់ដឹកនាំខេត្ត ក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព សហភាពសហព័ន្ធយុវជនកម្ពុជាខេត្ត កងកម្លាំងប្រដាប់អវុធ សិស្សានុសិស្ស វិស័យឯកជន ប្រជាពលរដ្ឋប្រមាណ​១,៦០០​នាក់​។

ថ្លែងក្នុងឱកាសនោះ លោក ឃឹម ប៊ុនសុង បាន​សំណូមពរ ដល់មន្ទីរ-អង្គភាព រដ្ឋបាលក្រុងសៀមរាប អាជ្ញាធរមូលដ្ឋានសមត្ថកិច្ច យុវជនសហភាពសហព័ន្ធយុវជនកម្ពុជា ខេត្តសៀមរាប និងវិស័យឯកជនពាក់ព័ន្ធទាំងអស់ បន្តយកចិត្តទុកដាក់បន្តទៀត ធ្វើយ៉ាងណារួមគ្នាកែលម្អនូវចំណុចខ្វះខាតមួយចំនួនដែល​ មិនទាន់បានអនុវត្តន៍ និងជាពិសេសការបំពេញតាមលក្ខខណ្ឌ របស់គណៈកម្មា​ធិការជាតិវាយតម្លៃទីក្រុងស្អាត ដើម្បីក្រុងសៀមរាបអាចទទួលបានពាន់រង្វាន់នានា ជាបន្តបន្ទាប់ទៀត។

បន្ថែមពីនេះ លោកអភិបាលខេត្ត បាន​ថ្លែងអំណរគុណ​ចំពោះមន្ទីរ-អង្គភាព រដ្ឋបាលក្រុងសៀមរាប អាជ្ញាធរមូលដ្ឋាន សមត្ថកិច្ចពាក់ព័ន្ធ យុវជនសហភាពសហព័ន្ធយុវជនកម្ពុជាខេត្តសៀមរាប គ្រប់សេវាករដែលកំពុងពាក់ព័ន្ធនឹងការបម្រើសេវាទេសចរណ៍ ប្រជាពលរដ្ឋ និងយុវជនទំាងអស់ ដែលតែងតែជួយជម្រុញគំាទ្រ​ឧបត្ថម្ភ និងចូលរួមជាមួយរដ្ឋបាលខេត្ត៕