(ព្រះវិហារ)៖ មន្ដ្រីកងរាជអាវុធហត្ថ នៃបញ្ជាការដ្ឋានកងរាជអាវុធហត្ថខេត្តព្រះវិហារ ចំនួន៥២នាក់ ក្នុងនោះមាន០៣នាក់ ត្រូវបានប្រកាសមុខងារ និង៤៩នាក់ ត្រូវបំពាក់ឋានន្ដរស័ក្ដិ នៅព្រឹកថ្ងៃទី០៧ ខែមីនា ឆ្នាំ២០១៨នេះ ក្រោមអធិបតីភាព លោកឧត្តមសេនីយ៍ត្រី កង សៅគុណ មេបញ្ជាការអាវុធហត្ថខេត្តព្រះវិហារ។
ថ្លែងក្នុងឱកាសនោះ លោកឧត្តមសេនីយ៍ត្រី កង សៅគុណ បានបញ្ជាឲ្យនាយ និងពលអាវុធហត្ថទូទាំងខេត្ត ត្រូវយកចិត្តទុកដាក់ការពារ សន្តិសុខ សណ្តាប់ធ្នាប់ ជូនប្រជាពលរដ្ឋឲ្យបានល្អ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនិងចូលមកដល់ ក្នុងរយៈពេលដ៏ខ្លីខាងមុខនេះ។
លោកឧត្តមសេនីយ៍ត្រីកង សៅ គុណ បានលើកឡើងថា នៅសល់តែប៉ុន្មានថ្ងៃទៀតប៉ុណ្ណោះ បុណ្យចូលឆ្នាំថ្មីប្រពៃណីជាតិ និងចូលមកដល់ ដែលរយៈពេល នៃពិធីបុណ្យចូលឆ្នាំ៣ថ្ងៃ គឺបងប្អូនប្រជាពលរដ្ឋ បានដើរលេងកំសាន្តតាមរម្មណីយដ្ឋាននានា ឫក៏ជួបជុំគ្នា លេងល្បែងប្រជាប្រិយតាមទីប្រជុំជន និងវត្តអារ៉ាមជាដើម។
លោកថាដូច្នេះអ្វី ដែលជាតួនាទី និងភារកិច្ចរបស់ កងកម្លាំងប្រដាប់អាវុធ ដោយអនុវត្តតាមបទបញ្ជារបស់លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពល ខេមរៈភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក៏ដូចជាគណៈបញ្ជាការឯកភាពរដ្ឋបាលខេត្ត គឺត្រូវការពារ សន្តិសុខ សណ្តាប់ធ្នាប់ ជូនប្រជាពលរដ្ឋឲ្យបានល្អប្រសើរ។
មេអាវុធហត្ថខេត្តព្រះវិហារ បានបន្ថែមទៀតថា «ដូច្នេះពេលនេះ គឺយើងត្រូវធ្វើផែនការ ការពារឲ្យហើយ តាមលក្ខណៈភូមិសាស្ត្រ របស់យើងរៀងៗខ្លួន លើសពីនេះ ត្រូវត្រៀមលក្ខណៈទប់ស្កាត់ រាល់បទល្មើសនានា ដែលកើតមានឡើង នៅក្នុងឱកាសនៃពិធីបុណ្យចូលឆ្នាំនេះ»។
ជាមួយគ្នានេះ លោកមេបញ្ជាការ កងរាជអាវុធហត្ថខេត្តព្រះវិហារ ក៏បានផ្តាំផ្ញើដល់នាយ និងពលអាវុធហត្ថ ដែលបានបំពាក់ឋានន្តរសក្ដិ និងបានប្រកាសមុខងារ នៅពេលនេះ ត្រូវខិតខំធ្វើការអនុវត្តតួនាទី ភារកិច្ចរបស់ខ្លួនឲ្យបានល្អ ស្របតាមបទបញ្ជា និងវិន័យរបស់អាវុធហត្ថផងដែរ៕
