(ភ្នំពេញ)៖ ក្រុមហ៊ុន LNSK Construction Co., Ltd បានយកអេស្កាវ៉ាទ័រកាយដីប៉ះខ្សែបណ្តាញតង់ស្យុងទាប (LV) ក្រោមដី ស្ថិតនៅបណ្តោយផ្លូវ២៧១ សង្កាត់ទឹកថ្លា ខណ្ឌសែនសុខ ធ្វើឲ្យដាច់ចរន្តអគ្គិសនីអស់ជាច្រើនម៉ោង។

អគ្គិសនីកម្ពុជា បានឲ្យដឹងថា ហេតុការណ៍នេះបានកើតឡើងនៅវេលាម៉ោង ២រសៀលថ្ងៃទី០៦ ខែមេសា ឆ្នាំ២០១៨។ ក្រុមការងារបច្ចេកទេសបានជួសជុល និងភ្ជាប់ចរន្តអគ្គិសនីជូនប្រជាពលរដ្ឋប្រើប្រាស់ឡើងវិញនៅវេលាម៉ោង ៨៖៤៥នាទីយប់ថ្ងៃដដែល។

អគ្គិសនីកម្ពុជា បានអំពាវនាវដល់ម្ចាស់ក្រុមហ៊ុន និងប្រជាពលរដ្ឋឲ្យប្រុងប្រយ័ត្នខ្ពស់នៅពេលបំពេញការងារនៅជិតគន្លងខ្សែបណ្ដាញអគ្គិសនី ព្រោះអាចបណ្ដាលឲ្យមានការរអាក់រអួលក្នុងការផ្គត់ផ្គង់ចរន្តអគ្គិសនី និងគ្រោះថ្នាក់ជាយថាហេតុផងដែរ។

អគ្គិសនីកម្ពុជា ក៏បានសុំការយោគយល់ និងអធ្យាស្រ័យពីប្រជាពលរដ្ឋដែលរងផលប៉ះពាល់ ដោយសារការដាច់ចរន្តអគ្គិសនីនេះដោយអនុគ្រោះ៕