(ចិន)៖ វគ្គបណ្តុះបណ្តាលសម្រាប់សហគ្រិនអាស៊ី ជាលើកដំបូង របស់កម្មវិធីគំនិតផ្តួចផ្តើម eFounders ត្រូវបានបិទបញ្ចប់ដោយជោគជ័យហើយ នាថ្ងៃទី០៤ ខែមេសា ឆ្នាំ២០១៨ នាទីក្រុងហានចូវ ប្រទេសចិន។ កម្មវិធីដែលជាគំនិតផ្តួចផ្តើមរួមគ្នាមួយ របស់សន្និសីទអង្គការសហប្រជាជាតិស្តីពី ពាណិជ្ជកម្ម និងការអភិវឌ្ឍ (UNCTAD) និងសាលាពាណិជ្ជសាស្រ្ត Alibaba នេះមានគោលបំណង ដើម្បីបំពេញចន្លោះប្រហោងឌីជីថលសម្រាប់សហគ្រិនវ័យក្មេង និងស្វែងរកនូវសក្តានុពលរបស់ពួកគេ។

ជាមួយនឹងការបិទបញ្ចប់វគ្គបណ្តុះបណ្តាលនៃកម្មវិធី eFounders លើកទីពីរនេះ Alibaba នាពេលនេះ គឺជាជំហានថ្មីមួយទៀត​ ដើម្បីខិតទៅរកការបំពេញបាននូវការប្តេជ្ញាចិត្ត របស់លោក Jack Ma  ស្ថាបនិក និងជាប្រធានប្រតិបត្តិរបស់ក្រុមហ៊ុនAlibaba Group ក្នុងនាមលោកជាទីប្រឹក្សាពិសេសរបស់ UNCTAD សម្រាប់សហគ្រិនវ័យក្មេង និងអាជីវកម្មខ្នាតតូច។
 
ក្នុងរយៈពេល ៥ឆ្នាំ ខាងមុខទៀត ក្រុមហ៊ុន Alibaba និង UNCTAD នឹងជួយពង្រឹងសមត្ថភាព និងលើកកម្ពស់សិទ្ធិអំណាចដល់សហគ្រិនចំនួន ១,០០០នាក់ នៅតាមបណ្តាប្រទេស កំពុងអភិវឌ្ឍដើម្បីទាញយកផលប្រយោជន៍ពីការវិវឌ្ឍបច្ចេកវិទ្យាឌីជីថលដើម្បីធ្វើការអភិវឌ្ឍវិស័យសេដ្ឋកិច្ចប្រកបដោយនិរន្តភាព។

លោកស្រី Arlette Verploegh អ្នកសម្របសម្រួលកម្មវិធីគំនិតផ្តួចផ្តើម eFounders របស់ UNCTAD បានថ្លែងថា «ស្មារតីដ៏ស្វាហាប់ មោះមុត និងភាពច្នៃប្រឌិតរបស់ សហគ្រិន វ័យក្មេង ទាំងនេះ និងវិធីសាស្រ្តដែលផ្តល់ការយកចិត្តទុកដាក់រវាងគ្នានឹងគ្នាដែលពួកគេបានបង្ហាញដើម្បីគាំទ្រដល់គោលដៅអភិវឌ្ឍន៍ប្រកបដោយចីរភាពនេះ គឺកំពុងតែស្ថិតនៅលើផ្លូវមួយដ៏ត្រឹមត្រូវ ហើយក៏បានលើកទឹកចិត្តពួកគេ ឲ្យចូលរួមកាន់តែសកម្មថែមទៀតដែរ»។

លោកស្រីបានបន្ថែមថា «រឿងរ៉ាវ និងបទពិសោធន៍របស់ពួកគេពិតជាបានផ្តល់នូវការជំរុញទឹកចិត្ត និងផ្តល់នូវគំរូមួយយ៉ាងពិតប្រាកដ ដែលអាចឲ្យមនុស្សជំនាន់ប្រើប្រាស់បច្ចេកវិទ្យាថ្មីៗទាំងអស់នេះ ដើម្បីបង្កើតឱកាសសេដ្ឋកិច្ចសម្រាប់ជាប្រយោជន៍ ដល់សហគមន៍របស់ពួកគេ»។

សហគ្រិនអាស៊ីចំនួន៣៧នាក់ ដែលបានបញ្ចប់ការសិក្សាដោយជោគជ័យ ក្នុងនោះមានសហគ្រិន២រូប ដែលពួកគាត់មកពីប្រទេសកម្ពុជា ដែលមានឈ្មោះដូចជា៖

ទី១៖ លោក ជា ឡង់ដា ជាស្ថាបនិកក្រុមហ៊ុន BookMeBus ដែលផ្តល់ជូនការលក់សំបុត្រតាមអនឡាញសម្រាប់អ្នកធ្វើដំណើរតាមរយៈរថយន្តក្រុងក្នុងប្រទេសកម្ពុជា និងការធ្វើដំណើរទៅកាន់ប្រទេសថៃ វៀតណាម និងឡាវ។

ទី២៖ លោក ស៊ឹម ចាន់គីរីរ័ត្ន ជាស្ថាបនិកក្រុមហ៊ុន បញ្ជី (BanhJi) ដែលជាក្រុមហ៊ុនគណនេយ្យមួយត្រូវបានបង្កើតឡើងសម្រាប់តម្រូវការជាក់លាក់របស់សហគ្រាសខ្នាតតូច និងមធ្យមក្នុងតំបន់អាស៊ាន។

ឆ្លងកាត់វគ្គសិក្សាអស់រយៈពេល ១១ថ្ងៃនេះ សហគ្រិនអាស៊ីទាំងអស់ ទទួលបានទស្សនៈទាន និងចំណេះដឹងមូលដ្ឋានជាច្រើន បានទៅធ្វើទស្សនកិច្ចទៅកាន់ទីតាំងក្រុមហ៊ុនផ្សេងៗ និងបានចូលរួមក្នុងវគ្គសិក្សាដើម្បីស្វែងយល់ ពីការវិវឌ្ឍបច្ចេកវិទ្យាឌីជីថលរបស់ប្រទេសចិនដែលបានឆ្លងកាត់ក្នុងរយៈពេល ២០ ឆ្នាំចុងក្រោយនេះ។

ដោយប្រើប្រាស់ក្រុមហ៊ុន Alibaba ជាគំរូនៃការសិក្សារួមជាមួយនឹងការចូលរួមក្នុងកិច្ចប្រជុំនានា និងដំណើរទស្សនកិច្ចសិក្សាទៅកាន់ក្រុមហ៊ុនដែលទើបតែបានបង្កើតឡើងថ្មីៗ និងសាលាពាណិជ្ជសាស្ត្រ ពាណិជ្ជកម្មអេឡិចត្រូនិច សិក្ខាកាម បានវិភាគលើប្រព័ន្ធសេដ្ឋកិច្ច និងដំណោះស្រាយរបស់ក្រុមហ៊ុន Alibaba រួមមាន Taobao Marketplace, Tmall, Alibaba.com, Cainiao Network, Hema និង Fliggy ក៏ដូចជានិន្នាការ និងការអភិវឌ្ឍថ្មីៗរបស់ឧស្សាហកម្មមួយនេះដូចជា ការលក់រាយ (New Retail) វិស័យពាណិជ្ជកម្មអេឡិចត្រូនិចនៅជនបទ និងការលេចឡើងថ្មីៗនូវសេវាកម្មតាមប្រព័ន្ធអ៊ីនធឺណិត ជាដើម។

តាមរយៈវគ្គសិក្សាដែលមានការចូលរួមយ៉ាងសកម្មភាព និងផុសផុលនេះ សិក្ខាកាមបានទទួលចំណេះដឹងទាក់ទងនឹងការត្រិះរិះពិចារណាយ៉ាងល្អិតល្អន់ដែលបង្កើតឡើងដោយក្រុមហ៊ុន Alibaba Group ដើម្បីជួយគាំទ្រពង្រឹង និងពង្រីកសេដ្ឋកិច្ចឌីជីថលនៅក្នុងប្រទេសចិន និងពិនិត្យមើលពីរបៀបដែលពួកគេអាចយកមេរៀន និងបទពិសោធន៍ទាំងអស់នោះមកអនុវត្តនៅក្នុងទីផ្សារក្នុងប្រទេសកំណើតរបស់ពួកគេ។

លោក Brian Wong អនុប្រធានក្រុមហ៊ុន Alibaba Group ដែលដឹកនាំកម្មវិធីគំនិតផ្តួចផ្តើមជាសកលមួយនេះ បានលើកឡើងថា «យើងចង់លើកកម្ពស់ និងផ្តល់សិទ្ធិអំណាច ដល់សហគ្រិនឆ្នើមទាំងនេះ ឲ្យទទួលបាននូវទស្សនៈទានថ្មីៗ និងផ្តល់នូវគន្លឹះសម្រាប់ទទួលបានភាពជោគជ័យ តាមរយៈការផ្តល់នូវការអនុវត្តដែលផ្សារភ្ជាប់ទៅនឹងទ្រឹស្តីប្រកប ដោយទេពកោសល្យដ៏ល្អបំផុត និងកិច្ចខិតខំប្រឹងប្រែងរបស់យើងជាមួយ Alibaba និងបណ្តាញដៃគូជាច្រើនទៀតរបស់យើង»។

លោកបន្តថា «វាជាការជំរុញទឹកចិត្ត ដើម្បីឲ្យពួកគេមើលឃើញពីចំណង់ចំណូលចិត្ត នៅក្នុងការខិតខំប្រឹងប្រែងការរៀនសូត្ររបស់ពួកគេ។ ការពិភាក្សាយ៉ាងម៉ត់ចត់របស់ពួកគេអំពីបញ្ហា និងសំណួរផ្សេងៗ ដើម្បីស្វែងយល់ពីការវិវឌ្ឍបច្ចេកវិទ្យាឌីជីថល នៅក្នុងប្រទេសចិន បានជួយពួកគេឲ្យរកឃើញគំនិតល្អៗ និងវិធីសាស្រ្តថ្មីៗ ជាគំរូសម្រាប់ការចូលរួម ក្នុងកិច្ចការអភិវឌ្ឍន៍ប្រកបដោយចីរភាព សម្រាប់អាជីវកម្មផ្ទាល់ខ្លួន របស់ពួកគេ និងដើម្បីផលបម្រើផលប្រយោជន៍សហគមន៍របស់ពួកគេនៅក្នុងប្រទេសកំណើតរបស់ខ្លួន»។

ទិដ្ឋភាពដ៏ល្អឥតខ្ចោះ តែមួយគត់នៃកម្មវិធីនេះ គឺសិក្ខាកាមបានជួបក្រុមប្រតិបត្តិរបស់ក្រុមហ៊ុន Alibaba និងភាគីពាក់ព័ន្ធដែលទទួលបានភាពជោគជ័យខាងពាណិជ្ជកម្មអេឡិចត្រូនិច ដូចជា PayTM  អ្នកផ្តល់សេវាកម្ម eWallet ឈានមុខគេរបស់ឥណ្ឌា និង Lazada ដែលជាវេទិកាពាណិជ្ជកម្មអេឡិចត្រូនិចដ៏ធំបំផុតនៅក្នុងតំបន់អាស៊ីអាគ្នេយ៍។

លើសពីនេះទៅទៀត សិក្ខាកាមទាំងអស់ បានធ្វើទស្សនកិច្ចទៅកាន់ទីតាំងជាច្រើនរបស់ក្រុមហ៊ុន Alibaba ដូចជា Hema Fresh ដើម្បីទទួលបានបទពិសោធន៍នៃ "ការលក់រាយថ្មី" (New retail)។ ពួកគេក៏មានឱកាសយល់ដឹងអំពីឃ្លាំងដឹកជញ្ជូនដ៏ឆ្លាតវៃផងដែរ ជាមួយនឹងដំណើរទស្សនកិច្ចទៅកាន់មជ្ឈមណ្ឌលឃ្លាំងដឹកជញ្ជូនទំនិញ CainiaoJiaxing និងបានកោតសរសើរពីសក្តានុពលដ៏ធំធេងនៃការអភិវឌ្ឍពាណិជ្ជកម្មអេឡិចត្រូនិចនៅភូមិ Bainiu ដែលត្រូវបានគេស្គាល់ថាជាភូមិ Taobao របស់ប្រទេសចិនបន្ទាប់ពីគេហទំព័រលក់ឥវ៉ាន់អនឡាញ ដោយសារតែការធ្វើសមាហរណកម្មវិស័យពាណិជ្ជកម្មអេឡិចត្រូនិចជាមួយគ្រប់ទីកន្លែងត្រូវបានធ្វើឡើងនៅទីនោះ។

សហគ្រិនក៏ទទួលបានបទពិសោធន៍ទាក់ទងនឹងសក្តានុពលនៃការផ្លាស់ប្តូរបច្ចេកវិជ្ជាទៅលើសង្គមចិនដែរដោយពួកគេបានទៅមើលតំបន់ Dream Town ក្នុងខេត្ត Zhejiang ដែលជាតំបន់ Silicon Valley របស់ចិន និងទីក្រុង Yiwu ដែលជាទីតាំងសំខាន់សម្រាប់ផលិតផលលក់ដុំ ក្នុងប្រទេស និងពិភពលោក និងជាទីផ្សារ B2B ដ៏ធំបំផុតរបស់ពិភពលោក។

នៅចុងបញ្ចប់នៃកម្មវិធីរយៈពេល ១១ថ្ងៃនេះ សិក្ខាកាម បានចែករំលែកអំពីវិធីសាស្ត្រ និងចំណេះដឹងដែលពួកគេទទួលបានពីវគ្គបណ្តុះបណ្តាលនេះ ព្រមទាំងគម្រោងចែករំលែក​ ចំណេះដឹងថ្មីៗរបស់ពួកគេទាក់ទងនឹងវិស័យពាណិជ្ជកម្មអេឡិចត្រូនិច វិស័យហិរញ្ញវត្ថុអេឡិចត្រូនិច និងការទូទាត់ ការដឹកជញ្ជូនឆ្លាតវៃ ទិន្នន័យធំៗ និងវិស័យទេសចរណ៍ ទៅកាន់សហគ្រិនដូចគ្នា និងសហគមន៍របស់ពួកគេ នៅពេលពួកគេត្រឡប់ទៅកាន់ប្រទេសរបស់ខ្លួនវិញ ហើយបង្កើតគំនិតថ្មីៗដើម្បីឲ្យអាជីវកម្មរបស់ពួកគេរីកចម្រើន។

សិក្ខាកាមមកពីប្រទេសកម្ពុជា លោក ជា ឡង់ដា ស្ថាបនិកក្រុមហ៊ុន BookMeBus ដែលផ្តល់ជូនការលក់សំបុត្រតាមអនឡាញ សម្រាប់អ្នកធ្វើដំណើរតាមរយៈ រថយន្តក្រុង ក្នុងប្រទេសកម្ពុជា និងការធ្វើដំណើរទៅកាន់ប្រទេសថៃ វៀតណាម និងឡាវ បានលើកឡើងថា «ខ្ញុំពិតជាមានមោទនភាពខ្លាំងណាស់ដែលបានចូលរួមក្នុងកម្មវិធីដ៏
អស្ចារ្យនេះ ហើយមានឱកាសបានជួបអ្នកដែលមានទេពកោសល្យជាច្រើននាក់មកពីប្រទេសនានានៅក្នុងតំបន់អាស៊ីអាគ្នេយ៍»។

ក្នុងរយៈពេល ១០ ថ្ងៃកន្លងមកនេះ យើងបានទទួលការបណ្តុះបណ្តាលពីនាយកប្រតិបត្តិអាជីវកម្មរបស់ក្រុមហ៊ុន Alibaba Group ពីអង្គភាពអាជីវកម្មផ្សេងៗគ្នា និងគម្រោងនានាអំពីប្រព័ន្ធសេដ្ឋកិច្ចដើម្បីលើកកម្ពស់ និងផ្តល់សិទ្ធិអំណាចដល់អាជីវកម្មខ្នាតតូច។

លើសពីនេះទៅទៀត យើងបានផ្លាស់ប្តូរចំណេះដឹងជាច្រើន ជាមួយអ្នកចូលរួមចំនួន ៣៧ នាក់ ហើយបានរៀនសូត្រពីគ្នាទៅវិញទៅមក យ៉ាងច្រើនទាក់ទងនឹងអាជីវកម្មរបស់យើង ក៏ដូចជាវិធីសាស្ត្រដែល យើងអាចចូលរួមចំណែកដល់គោលដៅអភិវឌ្ឍន៍ប្រកបដោយចីរភាព។ នេះគឺជាកម្មវិធីដ៏ល្អបំផុតមួយដែលខ្ញុំមិនធ្លាប់បានចូលរួមពីមុនមកនោះទេ។

ដូចសិក្ខាកាមដទៃទៀតដែរ ខ្ញុំគិតថា កម្មវិធីនេះគួរតែត្រូវបានពង្រីកដល់អ្នកចូលរួមវ័យក្មេងឲ្យបានកាន់តែច្រើនច្រើនបន្ថែមទៀតនាពេលអនាគត ដើម្បីឲ្យពួកគេមានឱកាសទទួលបានផលប្រយោជន៍ពីវាដូចពួកយើងដែរ។

«នេះគឺជាបទពិសោធន៍ដែលមានតម្លៃមិនអាចកាត់ថ្លៃបាន ដែលខ្ញុំបានរៀនពីអ្នកដឹកនាំអង្គភាពអាជីវកម្មសំខាន់ៗនៅក្នុងក្រុមហ៊ុន Alibaba ដោយផ្ទាល់ និងប្រព័ន្ធសេដ្ឋកិច្ចរបស់ ក្រុមហ៊ុនមួយនេះ។ បញ្ហាសំខាន់នាពេលបច្ចុប្បន្ននេះ គឺថាយើងត្រូវខិតខំយកចំណេះដឹង និងគំនិតច្នៃប្រឌិតថ្មីៗទាំងអស់នេះ ទៅធ្វើយ៉ាងណាឲ្យមានលក្ខណៈក្នុងស្រុក សាមញ្ញ និងងាយៗសម្រាប់ប្រព័ន្ធសេដ្ឋកិច្ចថ្មីរបស់ប្រទេសកម្ពុជា»។

នេះជាការបញ្ជាក់ របស់សិក្ខាកាមមួយរូបទៀត មកពីប្រទេសកម្ពុជា គឺលោក ស៊ឹម ចាន់គីរីរ័ត្ន ស្ថាបនិកក្រុមហ៊ុន បញ្ជី (BanhJi) ដែលជាក្រុមហ៊ុនគណនេយ្យមួយ ត្រូវបានបង្កើតឡើងសម្រាប់តម្រូវការជាក់លាក់របស់សហគ្រាសខ្នាតតូច និងមធ្យមក្នុងតំបន់អាស៊ាន។

ការបញ្ចប់វគ្គសិក្សារបស់បេក្ខជនអាស៊ីចំនួន ៣៧ នាក់ ដែលមកពីប្រទេសកម្ពុជា ឥណ្ឌូណេស៊ី ម៉ាឡេស៊ី ប៉ាគីស្ថាន ហ្វីលីពីន ថៃ និង វៀតណាមនេះ មានន័យថា ពួកគេត្រូវបានក្លាយជាសមាជិកនៃបណ្តាញគំនិតផ្តួចផ្តើម eFounders សកល ជាផ្លូវការ ជាមួយនឹងសិក្ខាកាមអាហ្វ្រិកចំនួន ២៤នាក់ ផ្សេងទៀតដែលបានបញ្ចប់ការសិក្សាកាលពីឆ្នាំ ២០១៧។

ជាផ្នែកមួយនៃការប្តេជ្ញាចិត្តរបស់ UNCTAD និង Alibaba ដើម្បីធានាបានថា សមាជិកទាំងអស់អនុវត្ដយ៉ាងសកម្មនូវអ្វីដែលពួកគេបានរៀនសូត្រនៅក្នុងសហគមន៍របស់ពួកគេនោះ ស្ថាប័នទាំងពីរនឹងបន្តការតាមដានត្រួតពិនិត្យជាមួយសមាជិកដោយមានការគាំទ្រពីភាគីពាក់ព័ន្ធក្នុងរយៈពេលបីខែម្តង និងគាំទ្រដល់ការបង្កើតប្រព័ន្ធសេដ្ឋកិច្ចឌីជីថល ដែលត្រូវបានបង្កើតឡើងដើម្បីកំណើនប្រកបដោយនិរន្តរភាពនៅជុំវិញពិភពលោក៕