(ភ្នំពេញ)៖ អភិបាលរាជធានីភ្នំពេញ លោក ឃួង ស្រេង បានឧបត្តម្ភដល់មន្ត្រីរាជការ​រដ្ឋបាលរាជធានីភ្នំពេញ ជិត៣០០នាក់ ក្នុងម្នាក់ៗ​ថវិកា​៤០០,០០០រៀល និងស្រាបៀ២កេស ក្នុងឱកាសបុណ្យចូលឆ្នាំថ្មីប្រពៃណីខ្មែរ ដើម្បីឲ្យមន្ដ្រីរាជការមានឱកាស សប្បាយរីករាយ ក្នុងពិធីបុណ្យប្រពៃណីនេះ ហើយក៏ជាការលើកទឹកចិត្ត ដែលបងប្អូនបានបំពេញការងារ​បានល្អអស់មួយឆ្នាំកន្លងមកនេះ។

ការផ្តល់ជាអំណោយសម្រាប់ចូលឆ្នាំថ្មីនេះ បានធ្វើឡើងនៅព្រឹកថ្ងៃទី០៥ ខែមេសា ឆ្នាំ២០១៨ ក្នុងពិធីសំណេះសំណាលជាមួយមន្ត្រី​របស់រដ្ឋបាលរាជធានី នៅសាលារាជធានីភ្នំពេញ​។

ក្នុងឱកាសនោះ លោក ឃួង ស្រេង បានថ្លែងថា កិច្ចការងាររដ្ឋបាលរាជធានីភ្នំពេញ​មានច្រើន និងមមាញឹកណាស់ ដែលធ្វើឲ្យមន្ត្រី​​មួយចំនួនត្អូញត្អែរថា ការងារច្រើន តែមិនត្រូវត្អូញត្អែរនោះទេ ពោលមន្ដ្រីទាំងអស់​ត្រូវរិះរកគន្លឹះ ដើម្បីធ្វើឲ្យបានសម្រេច និងជោគជ័យ ក្នុងការបម្រើសេវាជូនប្រជាពលរដ្ឋ។ ជាក់ស្ដែង បញ្ហារឿងគ្រូយកលុយសិស្ស ទោះបីជាយ៉ាងណាក្តីឃើញថា បានសាបរលាបហើយដែរ ដែលនេះដោយសារតែ ការខិតខំមន្ដ្រីទាំងអស់គ្នា ហើយការខំប្រឹង មិនមែនមានន័យថា ឥតប្រយោជន៍នោះទេ គឺ​យើងទទួលបានការកោតសរសើរពីប្រជាជន ធ្វើឲ្យយើងកាន់តែមានកម្លាំងចិត្ត ក្នុងការធ្វើឲ្យភ្នំពេញកាន់តែល្អ និងកាន់តែមានការអភិវឌ្ឍន៍។

អភិបាលរាជធានីភ្នំពេញ ​បានធ្វើការណែនាំឲ្យមន្ត្រីទាំងអស់ ពេលប្រជាពលរដ្ឋ​ទូរស័ព្ទមក ត្រូវប្រើប្រាស់សំដីឲ្យបានល្អ ទៅកាន់ពួកគាត់វិញ បើទោះបី ការពឹងពាក់នោះ មិនចំគោលដៅ ឬខុសនីតិវិធីក៏ដោយចុះ​។ លោក​ថា «ពលរដ្ឋទូរស័ព្ទមក មានន័យថា គេជឿជាក់លើយើងហើយ ក្នុងការពឹងពាក់យើងឲ្យជួយគាត់ តែបើ​យើងប្រើប្រាស់សំដីមិនល្អ គាត់ពិតជាអស់សង្ឃឹម ហើយក៏លែងជឿជាក់​លើយើងទៀតដែរ» ដូច្នេះ​ត្រូវតែប្រើប្រាស់សម្តីឲ្យបានល្អជាមួយប្រជាពលរដ្ឋ៕