(ភ្នំពេញ)៖ ដោយមានការរីកចម្រើនក្នុងអាជីវកម្មផ្នែកវេជ្ជសាស្រ្ត និងថ្នាំពេទ្យនៅកម្ពុជា ក្រុមហ៊ុន DKSH កំពុងប្រកាសជ្រើសរើសបុគ្គលិកជាច្រើននាក់រហូតដល់ជាង៣០០ មុខតំណែង ដែលភាគច្រើនគឺ បុគ្គលិកផ្នែកលក់ និងទីផ្សារ។ ការជ្រើសរើសនេះ នឹងត្រូវធ្វើឡើងនៅក្នុងកម្មវិធីកិច្ចសម្ភាសប្រចាំខែរបស់ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ នាថ្ងៃសុក្រទី០៦ ខែសីហា ឆ្នាំ២០១៨ ខាងមុខនេះ។ កម្មវិធីនេះមាន រយៈពេលតែមួយព្រឹកប៉ុណ្ណោះ ចាប់ពីម៉ោង ៨ព្រឹកដល់ម៉ោង១១៖៣០ព្រឹក នៅក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ។
លោក គឹម វុទ្ធី ប្រធានជ្រើសរើសបុគ្គលិកក្រុមហ៊ុន DKSH លើកឡើងថា «បច្ចុប្បន្ន DKSH មានបុគ្គលិកសរុបជាង ១,៦០០នាក់។ នៅក្នុងកិច្ចសម្ភាសនាថ្ងៃសុក្រខាងមុខនេះ ផ្តល់ភាពងាយស្រួលច្រើនដល់ក្រុមហ៊ុន ដោយសារយើងអាចប្រមូលបាន CVs ច្រើនក្នុងរយៈពេលខ្លី។ វាជួយសន្សំពេលវេលា មិនអស់កម្រៃ ហើយពិសេសនោះ អាចជ្រើសរើសបុគ្គលិកបានល្អៗ ពួកគាត់បានត្រៀមខ្លួនរួចជាស្រេចទាំង CV ទាំងការរៀបចំខ្លួនជាដើម។ យើងនឹងទទួលពាក្យ និងសម្ភាសភ្លាមៗតែម្តង។ បេក្ខជនមួយចំនួនអាចនឹងជាប់ជាស្ថាពរ និងខ្លះទៀត យើងនឹងពិចារណានាពេលក្រោយ» ។
ប្រធានមជ្ឈមណ្ឌលការងារភ្នំពេញ នៃទីភ្នាក់ងារជាតិមុខរបរ និងការងារ លោក អាំង ភារៈ បានលើកឡើងថា កិច្ចសម្ភាសការងារនេះ នឹងផ្ដល់ឱកាសដល់សាធារណៈជន ក៏ដូចជាដល់យុវជនដែលចង់ស្វែងការងារធ្វើតាមរយៈស្ថាប័នរដ្ឋដោយមិនពិបាកដើរស្វែងរកការងារ ឬចំណាយពេលធ្វើដំណើរទៅដាក់CVs នៅតាមបណ្តាក្រុមហ៊ុននោះទេ ចំពោះអ្នកដែលមានការងារធ្វើហើយ តែចង់ផ្លាស់ប្ដូរការងារក៏អាចចូលរួមបានផងដែរ។
កម្មវិធីកិច្ចសម្ភាសប្រចាំខែនេះ គឺជាផ្នែកមួយនៃយន្តការវេទិកាការងាររបស់រាជរដ្ឋាភិបាលក្នុងការផ្ដល់ឱកាសដល់សាធារណៈជន ជាពិសេសយុវជនដែលចង់ស្វែងការងារធ្វើ ឬអ្នកចង់ផ្លាស់ប្តូរការងារអាចទទួលបានការងារកាន់តែងាយស្រួលចំណេញពេលវេលា និងនៅមួយកន្លែង។ កិច្ចសម្ភាសការងារនេះបានរួមចំណែកជួយពន្លឿនដំណើរការជ្រើសរើសបុគ្គលិករបស់ដល់និយោជកឲ្យបានជួប និងសម្ភាសផ្ទាល់ជាមួយអ្នកកំពុងស្វែងរកការងារធ្វើ។
សម្រាប់ព័ត៌មានបន្ថែមទាក់ទងនឹងកិច្ចសម្ភាសប្រចាំខែ សូមទាក់ទងមជ្ឈមណ្ឌលការងាររាជធានីភ្នំពេញតាមរយៈលេខទូរស័ព្ទ៖ 016 78 66 55/077 23 23 78 ឬគេហទំព័ររបស់ទីភ្នាក់ងារជាតិមុខរបរ និង ការងារ www.nea.gov.kh និងទំព័រ facebook/neakhmer (អិនអ៊ីអេ ខ្មែរ) ដោយងាយស្រួល៕
