(ភ្នំពេញ)៖ ប្រជាពលរដ្ឋចំនួន៥គ្រួសារ ដែលរងគ្រោះដោយសារភ្លើងឆេះផ្ទះទាំងស្រុង ក្នុងស្រុកចំនួន៣ នៅខេត្តកំពង់ធំ រួមមានស្រុកបារាយណ៍ ស្រុកសន្ទុក និងស្រុកសណ្តាន់ នៅថ្ងៃទី០៥ ខែមេសា ឆ្នាំ២០១៨នេះ បានទទួលដំណោយផ្ទះ៥ខ្នងពី លោក ងួន ញិល អនុប្រធានទី២ នៃរដ្ឋសភាជាតិ។
អង្គពិធីនេះប្រព្រឹត្តទៅនៅក្នុងវត្តត្រពាំងជ្រៃ ឃុំបល្ល័ង្គ ស្រុកបារាយណ៍ ខេត្តកំពង់ធំ ដោយមានការចូលរួមពីប្រជាពលរដ្ឋចំនួន១ ពាន់នាក់។
នៅក្នុងឱកាសនោះ លោក ងួន ញ៉ិល មានប្រសាសន៍ក្នុងពិធីសំណេះសំណាលចំពោះព្រះសង្ឃ មន្ត្រីរាជការ និងប្រជាពលរដ្ឋថា ពេលនេះ យើងធ្វើពិធីប្រគល់ផ្ទះចំនួន៥ខ្នង ធ្វើអំពីថ្មប្រក់សីបឺរូ តាមកាស្នើសុំរបស់ប្រជាពលរដ្ឋ ដែលរងគ្រោះ ដោយអគ្គីភ័យបានឆាបឆេះទាំងស្រុង គឺ៣ខ្នងនៅស្រុកត្រពាំងជ្រៃ ឃុំបាល្ល័ង្គ ស្រុកបារាយណ៍១ខ្នង នៅនៅឃុំក្រយា ស្រុកសន្ទុក និង១ខ្នងទៀត នៅឃុំមានជ័យ ស្រុកសណ្តាន់ ខេត្តកំពង់ធំ។
លោកបានក៏បញ្ជាក់ទៀតថា ផ្ទះទាំង៥ខ្នងនេះសង់អំពីបេតុង មានទំហំ៥ម៉ែត្រគុណនិង៦ម៉ែត្រ ត្រូវចំណាយថវិការអស់ក្នុង១ខ្នងចំនួន៥.៥០០ដុល្លាអាមេរិក ដោយមិនគិតពីការចំណាយលើការផ្តល់ជូននូវសម្ភារៈប្រើប្រាស់គ្រប់គ្រាន់ផងនោះទេ ហើយថវិកា ដែលសាងសង់ផ្ទះទាំង៥ខ្នង សរុបទាំងអស់ចំនួន៣៧៨៣០ដុល្លាអាមេរិក។
លោកក៏បានបន្តទៀតថា កម្ពុជាបច្ចុប្បន្នក្រោមការដឹកនាំដ៏ភាពឈ្លាសវៃ និងប្រកបដោយកិត្តិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន បានធ្វើអោយប្រទេសជាតិមានសុខសន្តិភាព និងការអភិវឌ្ឍនគ្រប់វិស័យដោយបានអនុវត្ត នូវគោលនយោបាយឈ្នះ ឈ្នះ របស់រាជរដ្ឋាភិបាលកម្ពុជាស្របតាមនីតិរដ្ឋ ។
ឆ្លៀតឱកាសនោះផងដែរ លោក ងួន ញិល ក៏បានពាំនាំការផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់សម្តេចតេជោ ហ៊ុន សែន និងសម្តេចពញាចក្រីហេង សំរិន ប្រធានរដ្ឋសភា ជូនចំពោះប្រជាពលរដ្ឋ ដែលរស់នៅក្នុង ខេត្តកំពង់ធំ ក៏ដូចជាសាកសួរសុខទុក្ខ ជូនចំពោះប្រជាពលរដ្ឋ ដែលបាលចូលរួមក្នុងអង្គពិធីទាំងមូល ផងដែរ ៕
