(ភ្នំពេញ)៖ លោកគ្រូអ្នកគ្រូ ដែលកំពុងបង្រៀននៅសាលាបឋមសិក្សាទួលពង្រ ស្ថិតនៅសង្កាត់ចោមចៅទី១ ខណ្ឌពោធិ៍សែនជ័យ តាមរយៈអាជ្ញាធរសូមស្នើសុំដល់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ជួយសង់អគារសិក្សាបន្ថែម ជូនកូនសិស្សរបស់ខ្លួន ដែលកំពុងមានខ្វះខាតបន្ទប់សិក្សានោះ នាពេលបច្ចុប្បន្ន។
ការត្អូញត្អែរខាងលើនេះ បានធ្វើឡើងនៅព្រឹកថ្ងៃទី០៣ ខែមេសា ឆ្នាំ២០១៨នេះ នៅចំពោះក្រុមការងារសង្កាត់ចោមចៅ១ និងភូមិ នៃខណ្ឌពោធិ៍សែនជ័យ រាជធានីភ្នំពេញ ខណៈបាននាំយកសំភារៈសិក្សា និងថវិកាបន្តិចបន្តួច ចែកជូនដល់សិស្សានុសិស្សចំនួន៥ថ្នាក់ សរុបចំនួន២២០នាក់ ដើម្បីលើកទឹកចិត្តឲ្យសិស្សានុសិស្ស បន្តខិតខំរៀនសូត្យបន្ថែមទៀត។
ក្នុងឱកាសនោះដែរ លោកគ្រូ និងអ្នកគ្រូ បានបង្ហាញ និងត្អូញត្អែរថា សាលាបឋមសិក្សាទួលពង្រមួយនេះ មានតែ៣បន្ទប់ប៉ុណ្ណោះ ដោយមានចំនួន៥ថ្នាក់ ចាប់ពីថ្នាក់ទី១ ដល់ថ្នាក់ទី៥ នៅមិនទាន់មានថ្នាក់ទី៦នៅឡើយទេ ហើយបែងចែកវេណព្រឹក និងល្ងាច។ ដោយព្រឹក រៀនចំនួន៣ថ្នាក់ ពីថ្នាក់ទី១ ដល់ថ្នាក់ទី៣ និងវេណល្ងាច រៀន២ថ្នាក់ ពីថ្នាក់ទី៤ ដល់ទី៥ ដែលសិស្សសរុបចំនួន២២០នាក់ គ្រូប្រចាំថ្នាក់៥នាក់។
លោកគ្រូ និងអ្នកគ្រូ បានលើកឡើងទៀតថា សាលាបឋមសិក្សាទូលពង្រមួយនេះ មិនមានថ្នាក់ទី៦នោះទេ ដោយមកពីខ្វះខាតថ្នាក់រៀន ហើយគ្រូបង្រៀន សព្វថ្ងៃមានតែ៣បន្ទប់ថ្នាក់រៀន តែប៉ុណ្ណោះ។
ជាចុងក្រោយ លោកគ្រូ និងអ្នកគ្រូ មានសង្ឃឹមយ៉ាងជឿជាក់ចំពោះការគិតគូរបស់សម្តេចតេជោ ហ៊ុន សែន ជួយឧបត្ថម្ភដើម្បីឲ្យមានបន្ទប់ថ្នាក់រៀនគ្រប់គ្រាន់ អាចបញ្ចប់បឋមសិក្សានៅទីនោះតែម្តង និងពង្រឹងនូវវិស័យអប់រំ ដល់កូនខ្មែរជំនាន់ក្រោយឲ្យកាន់តែខ្លាំងក្លា៕
