(ភ្នំពេញ)៖ ក្រុមហ៊ុន «Mondelez Kinh Do» ប្រកាសផ្តល់សិទ្ធិផ្លូវការ ជូនដល់ក្រុមហ៊ុន «KBSK» ដែលជាក្រុមហ៊ុនចែកចាយផលិតផលប្រចំានៅ កម្ពុជា នៅព្រឹកថ្ងៃទី០៣ ខែមេសា ឆ្នាំ២០១៨នេះ ដោយពិធី​ប្រកាសផ្តល់សិទ្ធិផ្លូវការ ស្របច្បាប់រវាងក្រុមហ៊ុនទំាងពីរ ប្រារព្ធធ្វើឡើងនៅក្រុមហ៊ុនផ្សព្វផ្សាយ ពាណិជ្ជកម្ម (MSA) ដោយមានការអញ្ជើញចូលរួម ពីតំណាងរបស់ក្រុមហ៊ុន ដៃគូចែកចាយក្នុងស្រុក និងបណ្តាអ្នកសារព័ត៌មាន​ ជាច្រើនទៀត។

លោក យឹម សារិទ្ធ ប្រធានគ្រប់គ្រងទូទៅ នៃក្រុមហ៊ុនចែកចាយ KBSK ​បានថ្លែង​ថា​ «យើងខ្ញុំមានសេចក្តីសោមនស្សរីករាយជាខ្លាំង ដែលបានទទួលសិទ្ធិជាអ្នកចែកចាយផ្លូវការ សម្រាប់ផលិតផលរបស់ក្រុមហ៊ុន Mondelez Kinh Do ដែល ជាក្រុមហ៊ុនបុត្រសម្ព័ន្ធ របស់ក្រុមហ៊ុន Mondelez International ដ៏ធំប្រចាំ​នៅសហរដ្ឋអាមេរិក ដែលផលិតអាហារសម្រន់ជាច្រើន ប្រភេទប្រកបដោយគុណភាពខ្ពស់ និងបានចែកចាយ ដល់ទៅ១៦៥​ប្រទេសទូទាំងពិភពលោក»។

លោកបន្តថា​ «ការទទួលបានសិទ្ធិនាំចូលជាផ្លូវការនេះ គឺជាសញ្ញាដ៏ល្អសម្រាប់ក្រុមហ៊ុនរបស់យើង ក្នុងការនាំចូលផលិតផល ដែលមានរសជាតិឆ្ងាញ់ មានគុណភាពខ្ពស់ តម្លៃសមរម្យសម្រាប់ប្រជាជន និងពេញនិយមក្នុងទីផ្សារ ប្រទេសកម្ពុជា»។

ទន្ទឹមនឹងការប្រកាស​ផ្តល់ជូន​ នូវសិទ្ធិចែកចាយជាផ្លូវការ រវាងក្រុមហ៊ុន KBSK និង Mondelez kinh Do ​ចាប់ផ្តើមដំណើរការកម្មវិធី លោកសារិទ្ធបន្តទៀតថា​ «យើងខ្ញុំក៏សុំ​ថ្លែង​អំណរគុណ​យ៉ាងជ្រាលជ្រៅ ដល់ក្រុមហ៊ុន Mondelez Kinh Do ដែលបានផ្តល់ការជឿជាក់ជ្រើសរើស ក្រុមហ៊ុនយើងខ្ញុំជាអ្នកចែកចាយផ្លូវការ ប្រចាំប្រទេសកម្ពុជា​ តែមួយគត់ ហើយយើងក៏រំពឹងថា យើង នឹងនំាចូលនូវផលិតផលជាច្រើន ឈរលើគោលការណ៍គុណភាព សុវត្ថិភាពចំណីអាហារជាចំបង ដើម្បីធានាថាប្រជាជនកម្ពុជា ជាពិសេសកុមារ បានទទួលទាននំដែលមាន ជីវជាតិ និងគុណភាពល្អពិតៗ»។

Mondelez International ជាក្រុមហ៊ុនផ្គត់ផ្គង់ផលិតផល អាហារសម្រន់ធំជាងគេបង្អស់ នៅលើពិភពលោក ដែលមានប្រាក់ចំណូលប្រហែល ២៦ពាន់លានដុល្លារ ក្នុងឆ្នាំ២០១៦។ តាមរយៈកម្មវិធីសន្និសីទសារព័ត៌មាន ​នៅព្រឹកនេះ លោក Stephane Gripon ជាអគ្គនាយកគ្រប់គ្រង នៃក្រុមហ៊ុន Mondelez ​Kinh Do ក៏បានថ្លែងថា​ «ក្រុមហ៊ុនរបស់​យើងសប្បាយចិត្ត ដែលបានសហការ ជាមួយក្រុមហ៊ុន KBSK ក្នុងការចែកចាយនូវផលិតផល ដែលមានគុណភាព និងតម្លៃសមរម្យ ដល់ប្រជាជនក្នុងស្រុក»។

ប្រទេសកម្ពុជា ត្រូវបានគេមើលឃើញថា ជាទីផ្សារលក់ផលិតផលដែល​មានឥទ្ធិពល និងទាក់ទាញនៅក្នុងតំបន់អាស៊ីអាគ្នេយ៍ ដោយសារកំណើនសេដ្ឋកិច្ចដ៏រឹងមាំ និងកំណើន នៃប្រជាជនកម្រិត​ ចំណូលមធ្យមជាមួយនឹង ប្រជាជនជាង១៥លាននាក់។ នេះបើយោងតាមរបាយការណ៍ សហគមន៍សេដ្ឋកិច្ចអាស៊ាន (AEC) ដែលបានបង្កើតឡើង នៅឆ្នាំ២០១៦ បានឲ្យដឹងថា ទីផ្សារចែកចាយលក់រាយនៅកម្ពុជា នៅតែទាក់ទាញយ៉ាងខ្លាំង។

លើសពីនេះលោកបន្តថា​ «យើងមានជំនឿយ៉ាងមុតមំាថា ការផ្តល់សិទ្ធិចែកចាយនេះ ជាការបង្កើននូវភាពងាយស្រួល ដល់ប្រជាជន ក្នុងការជ្រើសរើសបានផលិតផល ដែលគុណភាពល្អ និងជួយជំរុញទីផ្សារសេដ្ឋកិច្ចជាតិ ផងដែរ»។

គួរបញ្ជាក់ដែរថា ក្រុមហ៊ុន KBSK ជាក្រុមហ៊ុនចែកចាយស្របច្បាប់ នូវគ្រឿងឧបភោជបរិភោគ និងភេសជ្ជៈ ​នៅក្នុងប្រទេសកម្ពុជា។ ក្រុមហ៊ុននឹងនាំចូលផ្តាច់មុខ នូវផលិតផល​ដែលមានរស ជាតិឆ្ងាញ់ និងគុណភាពខ្ពស់​របស់ក្រុមហ៊ុន Mondelez Kinh Do ដែលមានដូចជាផលិត ផលនំពងមាន់ Solite, Creamity, Cosy, នំប្រៃម៉ាក AFC និងនំជាច្រើនម៉ាក ផ្សេងទៀត៕