(បាត់ដំបង)៖ នៅថ្ងៃទី២ ខែមេសា ឆ្នាំ២០១៨នេះ លោកបណ្ឌិត រស់ វណ្ណា ទីប្រឹក្សាផ្ទាល់សម្តេចតេជោ ហ៊ុន សែន និងជាប្រតិភូរាជរដ្ឋាភិបាល ទទួលបន្ទុកជាប្រធាន អគ្គនាយកភ្នាក់ងារកម្ពុជានាវាចរ «កាំសាប» បានដឹកនាំប្រតិភូសម្ព័ន្ធមេត្រីភាព និងលោក ប៉ែន រដ្ឋា តំណាងផ្សារទំនើបសូរិយា បានទៅចុះសួរសុខទុក្ខ និងសំណេះសំណាលនាយទាហាន ពលទាហាន គ្រួសារកងទ័ពនៅកងការពារព្រំដែនគោកលេខ៥០២ ចំណុះភូមិភាគ៥ មុនពេលចូលឆ្នាំប្រពៃណីជាតិខ្មែរខាងមុខនេះ។
ក្នុងពិធីចុះសួរសុខទុក្ខ និងសំណេះសំណាលនេះ ក៏មានការអញ្ជើញចូលរួមពីមេបញ្ជាការរងភូមិភាគ៥ លោកឧត្តមសេនីយ៍ទោ ស គឹមប៉ាក់ តំណាងលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការភូមិភាគ៥ មេបញ្ជាការប្រចាំទិសសំឡូត មេបញ្ជាការកង ការពារព្រំដែនគោកលេខ៥០២ អភិបាលស្រុកសំទ្បូត និងកងកម្លាំងក្នុងភូមិសាស្ត្រស្រុកសំឡូត ខេត្តបាត់ដំបង។
លោកបណ្ឌិត រស់ វណ្ណា បានលើកពីការដឹកនាំរបស់ប្រមុខរាជរដ្ឋាភិបាលដោយស្របតាមអនុសាសន៍ និងពាក្យស្លោករបស់សម្តេចតេជោ ហ៊ុន សែន «ការពារជាតិ ដើម្បីទាំងអស់គ្នា ទាំងអស់គ្នា ដើម្បីការពារជាតិ នឹងផ្សាភ្ជាប់សមរភូមិមុខ និងសមរភូមិក្រោយ» និងបានបកស្រាយពីស្ថានភាព នយោបាយបច្ចុប្បន្ន ពីការរំលាយគណបក្សប្រឆាំង អំពើក្បត់ជាតិ និងសមិទ្ធិផលសំខាន់ៗ ដែលរាជរដ្ឋាភិបាលបានបង្កើតឡើង និងកំពុងខិតខំ អនុវត្តបន្តដែលប្រជាពលរដ្ឋទទួលបានផលប្រយោជន៍ដោយផ្ទាល់ជាពិសេសទៅលើការទទួលបានប្រាក់បៀរ៍វត្សកាន់តែច្រើនឡើងពីមួយឆ្នាំទៅឆ្នាំ បន្ថែមលើការផ្តល់របបសន្តិសុខសង្គមដោយការព្យាបាលមិនអស់កម្រៃ។ ចំណែកបងប្អូនគ្រួសារកងទ័ពដែលបានឆ្លងទន្លេ ក៏ទទួលបានប្រាក់ ឧបត្ថម្ភដូចបងប្អូនកម្មករកម្មការនី និងមន្រ្តីរាជការដែរ។
ក្នុងដំណើរចុះសួរសុខទុក្ខនេះលោកបណ្ឌិត រស់ វណ្ណា រួមនឹងសម្ព័ន្ធមេត្រីភាពផ្សារទំនើបសូរិយា បានឧបត្ថម្ភសម្ភារមួយចំនួនរួមមាន៖ អង្ករ, ស្បៀងអាហារ, សម្ភារគ្រឿងសំណង់ដែក ស៊ីម៉ង់ត៍ ស័ង្កសី, អាគុយ, ថវិកាជួសជុលរថយន្ត, បង្អូចកញ្ចក់ ព្រមទាំងឧបត្ថម្ភថវិកាចំនួន៤០,០០០រៀល ដល់នាយទាហានម្នាក់ និងពលទាហានចំនួន៣០០នាក់ ក្នុងកងការពារព្រំដែនគោកលេខ៥០២ និងឧបត្ថម្ភអង្គពិធី១,០០០,០០០លានរៀល សរុបរួមជាទឹកប្រាក់ប្រមាណ៩៦,២៤៥,០០០រៀល៕
