(ភ្នំពេញ)៖ អគ្គរដ្ឋទូតចិនប្រចាំនៅកម្ពុជា លោក ស្យង់ បូ អះអាងថា រដ្ឋាភិបាលចិន នៅតែបន្តគាំទ្រពេញទំហឹងចំពោះកិច្ចខិតខំប្រឹងប្រែងរបស់កម្ពុជា ក្នុងការការពារបូរណភាព អធិបតេយ្យរបស់ខ្លួន។
ការអះអាងរបស់អគ្គរដ្ឋទូតចិន បានធ្វើឡើងនៅក្នុងពិធីបិទលំហាត់សមយុទ្ធនាគមាសឆ្នាំ២០១៨ នៅតំបន់ភ្នំធំម្រះព្រៅ ឃុំក្រាំងអំពិល ស្រុកសំរោងទង ខេត្តកំពង់ស្ពឺ នាព្រឹកថ្ងៃទី២៩ ខែមីនា ឆ្នាំ២០១៨នេះ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិ។
ជាមួយនឹងការប្រកាសជំហររបស់ចិននេះ លោក ស្យង់ បូ ក៏បានកោតសរសើរចំពោះភាពរីកចម្រើនយ៉ាងឆាប់រហ័សរបស់ប្រទេសកម្ពុជា ហើយលោក ជឿជាក់ថា ប្រទេសកម្ពុជា នឹងបន្តរីកចម្រើនរឹងមាំកាន់តែខ្លាំងថែមទៀត នៅថ្ងៃខាងមុខ៕
