(ព្រះសីហនុ)៖ អាវុធហត្ថខេត្តព្រះសីហនុ ក្រោមការបញ្ជាផ្ទាល់ពីលោកឧត្តមសេនីយ៍ត្រី ហេង ប៊ុនទី បានបើកប្រតិបត្តិការជាបន្ដបន្ទាប់ រហូតដល់រាជធានីភ្នំពេញ ដោយឃាត់ខ្លួនបានជនសង្ស័យស្រីប្រុស០៨នាក់ និងដកហូតបានថ្នាំញៀនជិត៤០កញ្ចប់។
មេបញ្ជាការអាវុធហត្ថខេត្តព្រះសីហនុ បានឲ្យដឹងថា ប្រតិបត្តិការជាបន្ដបន្ទាប់នេះ ត្រូវបានធ្វើឡើង នៅថ្ងៃទី២៥ ខែមីនា ឆ្នាំ២០១៨ ដោយកម្លាំងការិយាល័យបទល្មើសគ្រឿងញៀន០៤នាក់ ដឹកនាំដោយវរសេនីយ៍ត្រី ឡុង គឹមហួរ នាយការិយាល័យបទល្មើសគ្រឿងញៀន នៅចំណុចហ្គេមបាញ់ត្រីឡាយអិន ស្ថិតនៅក្រុម១៤ ភូមិ៤ សង្កាត់៤ ក្រុងព្រះសីហនុ។ ឃាត់ខ្លួនជនសង្ស័យម្នាក់ ឈ្មោះ ស៊ីម រី ភេទស្រី អាយុ២៧ឆ្នាំ ដកហូតបាន ថ្នាំញៀនប្រភេទម្សៅសថ្លា៣០កញ្ចប់
បើតាមលោកមេបញ្ជាការ រហូតដល់វេលាម៉ោង០៧៖០០នាទីយប់ថ្ងៃដដែល ចុះបង្គ្រាបករណីជួញដូរគ្រឿងញៀន នៅចំណុចក្រោយកាល់តិច សាលាឆទៀន ស្ថិតនៅភូមិ៣ សង្កាត់២ ក្រុងព្រះសីហនុ។ ឃាត់ខ្លួនបានជនសង្ស័យម្នាក់ ឈ្មោះ ប៉ុល ពិសី ភេទស្រី អាយុ២៦ឆ្នាំ ដកហូតបាន ម្សៅសថ្លា១កញ្ចប់។
លោកឧត្តមសេនីយ៍ត្រី ហេង ប៊ុនទី បន្ដថា រួចកម្លាំងបានបង្រ្កាបបន្តទៀតនៅថ្ងៃទី២៦ ខែមីនា ឆ្នាំ២០១៨ កម្លាំងការិយាល័យបទល្មើសគ្រឿងញៀន ខេត្តព្រះសីហនុ សហការជាមួយការិយាល័យជួញដូរគ្រឿងញៀន នៃកងរាជអាវុធហត្ថលើផ្ទៃប្រទេស ខណ្ឌអហពោធិ៍សែនជ័យ ដឹកនាំដោយ ឧត្តមសេនីយ៍ត្រី អ៊ុង ដេប៉ូ ស្នងការដ្ឋានយុត្តិធម៌ទទួលផែនគ្រឿងញៀន ចុះបង្គ្រាបករណីជួញដូរគ្រឿងញៀន នៅចំណុចភូមិត្រពាំងឈូក សង្កាត់កន្តោក ខណ្ឌពោធិ៍សែនជ័យ។
ឃាត់ខ្លួនបានមនុស្ស០៦នាក់ ទី១៖ឈ្មោះ សុខ គឹមសៀន អាយុ២២ឆ្នាំ, ទី២៖ឈ្មោះ ភ័ណ្ឌ ឃីម អាយុ១៦ឆ្នាំ, ទី៣៖ឈ្មោះ ជា យូសែប អាយុ២១ឆ្នាំ, ទី៤៖ឈ្មោះ សុខ សុផត្តណា អាយុ១៥ឆ្នាំ, ទី៥៖ឈ្មោះ ដួង វាសនា អាយុ២៤ឆ្នាំ និងទី៦៖ឈ្មោះ គង់ កេន អាយុ៣៦ឆ្នាំ។ ដកហូតបាន ម្សៅសថ្លា៤កញ្ចប់ និងទូរស័ព្ទ០៣គ្រឿង។ បច្ចុប្បន្នវត្ថុតាង និងជនសង្ស័យកំពុងបន្តនិតិវិធីនៅបញ្ជាការដ្ឋានអាវុធហត្ថខេត្តព្រះសីហនុ៕
