(បន្ទាយមានជ័យ)៖ ឧបនាយករដ្ឋមន្ត្រី កែ គឹមយ៉ាន សមាជិកគណៈអចិន្រ្តៃយ៍គណៈកម្មាធិការកណ្ដាល និងជាប្រធានក្រុមការងារថ្នាក់កណ្ដាល ចុះជួយខេត្តបន្ទាយមានជ័យ បានដឹកនាំក្រុមការងារទាំងថ្នាក់ជាតិ ថ្នាក់ក្រោមជាតិ និងថ្នាក់ដឹកនាំមូលដ្ឋានមកពីមន្ទីរ អង្គភាព ក្រុង-ស្រុក ឃុំ-សង្កាត់ ចុះទៅពិនិត្យស្ពានបាឡេ១កន្លែង ស្ថិតនៅចន្លោះភូមិតាត្រៃ និងបុសថ្មគោល ឃុំផ្គាំ ស្រុកស្វាយចេក មានប្រវែង២៤ម៉ែត្រ ជួសជុលផ្លូវក្រាលគ្រួស ពីស្ពានតាត្រៃប្រវែង៥,០០០ម៉ែត្រ និងដាក់លូ៣កន្លែង នៅចំណុចបុសថ្មគោល និងបានជួបសំណេះសំណាលសួរសុខទុក្ខជាមួយប្រជាពលរដ្ឋ និងចាស់ព្រឹទ្ធាចារ្យ នៅក្នុងឃុំផ្គាំចំនួន៥ភូមិ ស្រុកស្វាយចេក ចំនួន១,១៥០នាក់ ចាស់ព្រឹទ្ធាចារ្យ ចំនួន៨៣នាក់។
ក្នុងឱកាសនោះ ឧបនាយករដ្ឋមន្ដ្រី កែ គឹមយ៉ាន បានមានមតិសំណេះសំណាល និងធ្វើការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំរាជរដ្ឋាភិបាល ពិសេសថ្នាក់ដឹកនាំគណបក្សប្រជាជនកម្ពុជា ដែលមាន សម្ដេចតេជោ ហ៊ុន សែន ជាប្រធានគណបក្ស, សម្ដេច ហេង សំរិន ប្រធានកិត្តិយស, សម្ដេចវិបុលសេនាភក្ដី សាយ ឈុំ អនុប្រធានគណបក្ស និងសម្ដេចក្រឡាហោម ស ខេង អនុប្រធានគណបក្ស។
លោក កែ គឹមយ៉ាន បានថ្លែងថា ក្រោមយុទ្ធសាស្រ្តឈ្នះឈ្នះ ដែលដឹកនាំដោយប្រមុខរាជរដ្ឋាភិបាល និងគណបក្សប្រជាជនសម្តេចតេជោ ហ៊ុន សែន ប្រទេសមានសុខសន្តិភាព និងមានពេលវេលាគ្រប់គ្រាន់ សម្រាប់កសាងស្តារឡើងវិញនូវ ផ្លូវ ស្ពាន ជាសសៃឈាមសេដ្ឋកិច្ចកាត់បន្ថយភាពក្រីក្រ របស់ប្រជាពលរដ្ឋ ដែលត្រូវបានបំផ្លិចបំផ្លាញបន្សល់ទុកពីសម័យសង្រ្គាមបង្ហូរឈាមខ្មែរ។
ជាមួយគ្នានេះ ឧបនាយករដ្ឋមន្ដ្រី កែ គឹមយ៉ាន បានថ្លែងដោយសង្កត់ធ្ងន់ថា ពិតណាស់សង្រ្គាមគឺមិនបានបន្សល់ទុកអ្វីក្រៅពីគំនរឆ្អឹង សមុទ្រឈាម ទឹកភ្នែកនោះឡើយ ដូចនេះសូមបងប្អូនទាំងអស់បន្តរួមគ្នាថែរក្សាសន្តិភាព នេះឲ្យបានគង់វង្សដើម្បីភាពរីកចម្រើនសម្រាប់អនាគតយើង និងកូនចៅយើង។
ជាទ្រនាប់ដៃ លោក កែ គឹមយ៉ាន បាននាំយកអំណោយ និងថវិកាមួយចំនួន ផ្តល់ជូនរួមមាន លោកគ្រូ អ្នកគ្រូ ២០នាក់ក្នុងម្នាក់បានសារ៉ុង១ និងថវិកា២ម៉ឺនរៀល, ជូនថវិកា៥ភូមិ គឺភូមិស្វាយស ភូមិប្រាសាទវៀន ភូមិថ្មគោល ភូមិតាដួល និងភូមិអូរ ក្នុង១ភូមិ បាន២០ម៉ឺនរៀល, មនុស្សចាស់ជរា ចំនួន៨២នាក់ ក្នុងម្នាក់ទទួលបាន ថវិកា២ម៉ឺនរៀល អំបិល១កញ្ចប់ ទឹកដោះគោ១កំប៉ុង បំពង់ទឹកក្ដៅ១ តែ១កញ្ចប់ ក្រម៉ា១ មី៥កញ្ចប់ ពិល១ សារ៉ុង១ ប្រេងខ្យល់២ដប ប្រេងកូឡា២ដប កៅអៀក៣០បន្ទះ ផ្តិល១, ជូនសាលាបឋមសិក្សាថ្មគោល ៥០ម៉ឺនរៀល, ជូនអនុវិទ្យាល័យថ្មគោល៥០ម៉ឺនរៀល, ជូនសាលាឃុំ ផ្គាំ៥០ម៉ឺនរៀល, ជូននគរបាលឃុំ៥០ម៉ឺនរៀល, ចំពោះប្រជាពលរដ្ឋទាំងអស់ដែលបានចូលរួម ក្នុងម្នាក់ទទួលបានអំណោយសារ៉ុង១, ជួយកសាងសាលាបឋមសិក្សា នូវទីចាត់ការ១ខ្នង៣បន្ទប់ និងកុំព្យូទ័រ និងព្រីនធ័រ១កំភ្លេ, ជួយសាសង់ផ្ទះ១ខ្នង ៣បន្ទប់នៅអនុវិទ្យាល័យថ្មគោលសម្រាប់គ្រូបង្រៀនស្នាក់នៅ៕
