(ភ្នំពេញ)៖ ព្រឹត្តិការណ៍សន្និបាតបារខែម បានត្រឡប់មកវិញជាថ្មីម្តងទៀតហើយក្នុងឆ្នាំ២០១៨នេះ ជាមួយនឹងបារខែមអង្គរ ២០១៨ នៅក្នុងទឹកដីនៃខេត្តសៀមរាប។ បារខែម ជាព្រឹត្តិការណ៍​សន្និបាត ដែលផ្តោតលើបច្ចេកវិទ្យា និងសហគ្រិនភាព ផ្តោតលើយុវជននិងការអប់រំ ព្រមទាំងជាពិព័រណ៍ការងារមួយផងដែរ​។

មិនខុសពីឆ្នាំមុនៗឡើយ EZECOM បានបន្តចូលរួមជាអ្នកឧបត្ថម្ភធំមួយ (Gold Sponsor) នៃព្រឹត្តិការណ៍បារខែមអង្គរ ដើម្បីចូលរួមចំណែកអភិវឌ្ឍធនធានមនុស្សកម្ពុជា ជាពិសេសក្នុងផ្នែក​បច្ចេកវិទ្យា ការបណ្តុះគំនិតច្នៃប្រឌិត និងសហគ្រិនភាពទំនើប។ ក្រុមហ៊ុន EZECOM យល់យ៉ាងច្បាស់ថា សមត្ថភាពយុវជនគឺជាផ្នែកដ៏សំខាន់មិនអាចខ្វះបាន ដើម្បីជំរុញការអភិវឌ្ឍប្រទេស និង​សង្គមជាតិ ឆ្ពោះទៅរកភាពរីកចំរើនរុងរឿង។

លោក ហួង សុភ័ក្រ្តដារ៉ា ប្រធានផ្នែកទំនាក់ទំនងសាធារណៈ ក្រុមហ៊ុន EZECOM បាននិយាយថា «EZECOM គឺជាក្រុមហ៊ុនអ៊ីនធឺណិតធំជាងគេមួយនៅកម្ពុជា និងមានការទទួលស្គាល់ក្នុងចំណោមក្រុមហ៊ុន អង្គការ-ស្ថាប័នជាច្រើន ដូច្នេះ យើងមានចំណាប់អារម្មណ៍ចំពោះវិស័យអប់រំ និងបច្ចេកវិទ្យាយ៉ាងខ្លាំង។ ជារៀងរាល់ឆ្នាំ យើងតែងចូលរួមឧបត្ថម្ភសន្និបាតបារខែម ព្រោះវាមានប្រយោជន៍​ច្រើនសម្រាប់យុវជន និងអនាគតរបស់សង្គមជាតិយើង» ។

ក្នុងរយៈពេលតែពីរថ្ងៃ គឺនៅថ្ងៃទី ២៣-២៤ មីនានេះ វាគ្មិននិងអ្នកជំនាញជាជនជាតិខ្មែរ និងបរទេស នឹងចែករំលែកចំណេះដឹងលើប្រធានបទសរុបជិត ៤០ ដូចជា យុទ្ធសាស្រ្តភាពជោគជ័យនៃអាជីវកម្ម ពាណិជ្ជកម្មអេឡិចត្រូនិច (E-Commerce) សម្រាប់វិស័យបដិសណ្ឋារកិច្ច និងបច្ចេកទេសគេហទំព័រនិងការប្រើប្រាស់កម្មវិធី WordPress ជាដើម សំដៅផ្តល់ធាតុចូលមានប្រយោជន៍សន្ធឹកសន្ធាប់​ដល់​សិស្ស-និស្សិតនៅក្នុងតំបន់ផ្សេងៗនៃខេត្តសៀមរាប ដែលជាទិសដៅទេសចរណ៍​លំដាប់ពិភពលោកមួយ។

ក្រុមហ៊ុន EZECOM សង្ឃឹមថា សិស្ស-និស្សិតទាំងឡាយ ទទួលបានធាតុចូលមានប្រយោជន៍ច្រើនពីសន្និបាតនេះ ព្រមទាំងបណ្តុះគំនិតអភិវឌ្ឍ គំនិតច្នៃប្រឌិតថ្មីៗ ដើម្បីការរីកចំរើនរបស់ខ្លួនឯងនិងក្រុមគ្រួសារ ជាពិសេសបន្តចែករំលែកចំណេះដឹងនេះទៅដល់មិត្តភ័ក្តិនិងអ្នកដ៏ទៃ ដើម្បីបង្កើតប្រយោជន៍ច្រើនដល់សង្គមជាតិ ៕