(បារាំង)៖ ប៉ូលិសបារាំង ដែលត្រូវបានចាត់ទុកជាវីរៈបុរសនោះ បានស្លាប់បាត់បង់ជីវិត​ហើយនៅថ្ងៃសៅរ៍នេះ បន្ទាប់ពីរូបលោក​បានតតាំង​ជាមួយនឹងខ្មាន់កាំភ្លើង​ម្នាក់ ដែលជាបណ្តាញ​ភេរវករ​នៃក្រុម ISIS និងបានទទួលរងរបួសជាទម្ងន់ កាលពីថ្ងៃសុក្រ​កន្លងទៅនេះ។ នេះបើតាម​​ការចេញផ្សាយ​​ដោយ Channel News Asia ដកស្រង់ពី​បណ្តាញព័ត៌មាន AP នារសៀល​ថ្ងៃសៅរ៍ ទី២៤ ខែមីនា ឆ្នាំ២០១៨។

សម្រាប់ការទទួលមរណភាព មន្ត្រីប៉ូលិសមួយរូបនេះទៀត វាបានធ្វើឲ្យចំនួន​មនុស្ស​ស្លាប់ ដែលបានបង្កឡើង​​ដោយខ្មាន់កាំភ្លើង​ខាងលើនេះ កើនឡើងដល់ ០៤នាក់។ វាជាការវាយ​ប្រហារ​ធំបំផុតមួយ សម្រាប់ឆ្នាំ២០១៨នេះ បន្ទាប់ពីការវាយប្រហារ​ដ៏កក្រើក​កាលពីខែតុលា ឆ្នាំ២០១៧ ខណៈដែលបារាំងតែងតែបង្កើតការរឹតបន្តឹងសន្តិសុខ​ខ្ពស់​បំផុត ដើម្បីបង្ការកុំឲ្យភេរវករមានឱកាស ឆ្លៀតបង្កភេរវកម្ម។ ប៉ូលិសបារាំងត្រូវបាន​ផ្តល់សិទ្ធិពិសេស ឲ្យធ្វើការស្រាវជ្រាវ និងចាប់ខ្លួនជនសង្ស័យ ដោយមិនចាំបាច់​មានការ​បញ្ជាពីតុលាការនោះឡើយ។

គួរបញ្ជាក់ថា ខ្មាន់កាំភ្លើងដែលបានបាញ់ប្រហារ សម្លាប់ប្រជាជនបារាំងសរុប ០៤នាក់​នេះ គឺមាន​ឈ្មោះថា Redouane Lakdim ដែលពី​ដំបូងឡើយ​រូបគេ​បានប្លន់យករថយន្តមួយ កាលពីព្រឹថ្ងៃសុក្រ នៅទីក្រុង Carcassone ភាគខាងត្បូងបារាំង ដោយបាញ់សម្លាប់​អ្នកដំណើរក្នុងរថយន្ត​តាក់ស៊ីនោះ និងបង្ក​អ្នកបើកបរ​របួស។

ហេតុការណ៍​បន្ទាប់មកទៀត គឺ Lakdim បានធ្វើការបាញ់រះ​ទៅលើមន្ត្រីប៉ូលិស រួចក៏បន្ត​បើកបររថយន្ត​ពីរទៅបីគីឡូម៉ែត្រ ទៅកាន់តំបន់ Trebes និងឆ្ពោះទៅ​កាន់ផ្សារទំនើប Super-U នៅម៉ោង ១១៖០០នាទីព្រឹកថ្ងៃដដែល។ ក្នុងការសម្រុកចូល​ផ្សារ​ទំនើប ខ្មាន់កាំភ្លើង​មានដើមកំណើត​ម៉ូរ៉ូកូនេះ បានយកស្ត្រីម្នាក់ធ្វើចំណាប់​ខ្មាំង ប៉ុន្តែជា​ចុងក្រោយ​ខ្មាន់​កាំភ្លើងនេះ ត្រូវបានប៉ូលិសបាញ់ចំក្បាលផ្តាច់​ជិវិតតែម្តង៕

ក្រោយពីការ​វាយប្រហារ ISIS បានចេញមុខ​អះអាងថា ខ្លួនជាអ្នកពីក្រោយ​រឿងនេះ ហើយប្រធានាធិបតី​បារាំង លោក ម៉ាក្រុង ក៏បានបញ្ជា​ឲ្យប៉ូលិស បើកការ​ស៊ើបអង្កេត​លម្អិតផងដែរ ដើម្បីស្វែង​រកឬសគល់ និងអ្នក​ពាក់ព័ន្ធ។ ដោយឡែកមនុស្ស​ស្លាប់​សរុប​មានចំនួន ០៤នាក់ គឺខ្មាន់កាំភ្លើងម្នាក់ និងប្រជាជនស្លូតត្រង់ ០៣នាក់៕