(ភ្នំពេញ)៖ លោក អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី និងជាអនុប្រធានគណៈកម្មាធិការត្រួតពិនិត្យ ផលិតផលហាឡាលកម្ពុជា នៅរសៀលថ្ងៃទី២៣ ខែមីនា ឆ្នាំ២០១៨នេះ បានអញ្ជើញជាអធិបតី ក្នុងពិធីបិទវគ្គបណ្តុះបណ្តាលចំណេះដឹង ស្តង់ដារហាឡា។
វគ្គបណ្ដុះបណ្ដាលនេះ ដោយមានកិច្ចសហការពីគ្រូជំនាញឯកទេស នាយកដ្ឋានហាឡាល នៃគណៈកម្មាធិការកណ្តាលឥស្លាមថៃ (CICOT) ជាស្ថាប័នហាឡាលធំជាងគេមួយលើលោក និងមានសិក្ខាកាម៥០នាក់។
លោក អូស្មាន ហាស្សាន់ បានថ្លែងថា ឧស្សាហកម្មហាឡាលកម្ពុជា បាននិងកំពុងចូលរួមចំណែកលើកស្ទួយវិស័យសេដ្ឋកិច្ច និងកំណើនវិស័យទេសចរណ៍កម្ពុជា ក្រោយពីអនុក្រឹត្យហាឡាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ដំណើរការ និងផ្សព្វផ្សាយ នៅថ្ងៃទី២៩ ខែកក្កដា ឆ្នាំ២០១៦ បាននិងកំពុងមានការចាប់អារម្មណ៍ពីអ្នកប្រើប្រាស់ អ្នកវិនិយោគជាតិ និងអន្តរជាតិ។
បើតាមលោករដ្ឋមន្ដ្រីប្រតិភូអម កម្ពុជាមានប្រភព និងវត្ថុធាតុដើមច្រើន ដែលមកដល់ពេលមានក្រុមហ៊ុន សហគ្រាស ភោជនីយ៍ដ្ឋាន សត្តឃាត្តដ្ឋានកម្ពុជា សម្រាប់ផលិតផលវត្ថុ ឬសេវាកម្ម ដែលទាក់ទងទៅនឹងផលិតផលម្ហូបអាហារ ផលិតផលសាច់ គ្រឿងសម្អាង ផលិតផលថែរក្សាខ្លួន ឱសថ អាហារបំប៉ន គ្រឿងផ្សំម្ហូបអាហារ និងសម្ភារៈប្រើប្រាស់ផ្សេងៗទៀត ដែលស្របតាមការអនុញ្ញាតតាមច្បាប់ឥស្លាម បានទទួលវិញ្ញាបនបត្រហាឡាល និងកំពុងបន្តស្នើសុំជាបន្តបន្ទាប់ ដើម្បីប្រកួតប្រជែងលើទីផ្សារហាឡាលពិភពលោក ដែលមានកំណើនរហូតដល់ ៣.៣លានលានដុល្លារ (3.3Trillion USD) គិតឆ្នាំ២០១៧។
ក្នុងនោះផ្នែកម្ហូបអាហារហាឡាលរហូតដល់ ១លានលានដុល្លា (1.0 Trillion USD) ជាពិសេសវិស័យទេសចរណ៍កម្ពុជា មានការកើនឡើងដល់ ៦.២លាននាក់ សម្រាប់២០១៨ នឹងអាចកើន៧លាននាក់ នៅឆ្នាំ២០១៩ ព្រោះហាឡាលនឹងជំរុញលើកស្ទួយគាំទ្រនូវផលិតផល វត្ថុ ឬសេវាកម្មទាំងអស់កាន់តែរីកចម្រើនច្រើន សម្រាប់ការប្រើប្រាស់មនុស្សជាតិទូទៅ ជាពិសេសសហគមន៍ឥស្លាមដែលមានជាង ១.៨ពាន់លាននាក់រស់នៅក្នុងពិភពលោក៕
