(ភ្នំពេញ)៖ នៅថ្ងៃទី​២២ ខែមីនា ឆ្នាំ២០១៨នេះ ក្រុមឯកទេសហាឡាលកម្ពុជា សហការជាមួយក្រុមឯកទេសហាឡាល របស់គណៈប្រតិភូ​នៃគណៈកម្មាធិការកណ្តាល ឥស្លាម​ថៃ (CICOT) បន្តចុះត្រួតពិនិត្យ និង​វាយតម្លៃលក្ខណៈបច្ចេកទេសស្តង់ដារហាឡាលកម្ពុជា ដល់សហគ្រាស លាង ឡេង។

បើតាមក្រុមការងារជំនាញ សហគ្រាស លាង ឡេង ​ជាសហគ្រាសមួយចំណោមសិប្បកម្មទាំង ៥៧ ឬ​១៤៧ ផ្សេងទៀត ដែលបានផលិត ទឹកត្រី ទឹកស៊ីអ៊ីវ ទឹកខ្មេះ ទឹកម្ទេស ទឹកសៀង ទឹកប្រេងខ្យង ស្របតាមស្តង់ដារចំណីអាហារ HACCP & ISO 9001-2015 តាំងពីឆ្នាំ​២០០០​មក បានដាក់ពាក្យស្នើសុំវិញ្ញាបនបត្រស្តង់ដារហាឡាលកម្ពុជា ដែលមានទីតាំងនៅសង្កាត់ជ្រោយចង្វារ រាជធានីភ្នំពេញ។

តើហាឡាលជាអ្វី? ហាឡាល (حلال-Halal) ជាភាសាអារ៉ាប់ សំដៅទៅលើវត្ថុ ឬ​សេវាកម្មណាមួយ ដែលអនុញ្ញាតឲ្យប្រើប្រាស់ ឬ​ឲ្យចូលរួម​ដោយអាស្រ័យតាមច្បាប់ឥស្លាម។ ពាក្យនេះ ត្រូវបានប្រើជាទូទៅ ទាក់ទងទៅនឹងផលិតផលម្ហូបអាហារ ផលិតផលសាច់ គ្រឿងសម្អាង ផលិតផលថែរក្សាខ្លួន ឱសថ អាហារបំប៉ន គ្រឿងផ្សំម្ហូបអាហារ និងសម្ភារៈប្រើប្រាស់ផ្សេងៗទៀត៕​