(ភ្នំពេញ)​៖ ​លោក ហម ម៉េងសែ អនុប្រធានតុលាការរាជធានីភ្នំពេញ និងជាចៅក្រមស៊ើបសួរ បានសម្រេចមិនឃុំខ្លួនស្ត្រីជនត្រូវចោទ​២នាក់ ដែលជាមេ​កន្ទុយលេខ នៅកណ្តាលផ្សារប្រចាំភូមិ៥ សង្កាត់ផ្សារកណ្តាលទី១ ខណ្ឌដូន​ពេញ និងបានអនុញ្ញាតឲ្យពួកគេត្រលប់ទៅផ្ទះវិញ នៅរសៀលថ្ងៃទី២១ ខែមីនា ឆ្នាំ២០១៨​។​ នេះបើតាមសេចក្ដីរាយការណ៍ពីភ្នាក់ងារ Fresh News ប្រចាំតុលាការ នៅព្រឹកថ្ងៃទី២២​ ខែមីនានេះ។

​ស្ដ្រីជនត្រូវចោទទាំង២នាក់ ត្រូវបានកម្លាំងនគរបាលព្រហ្មទណ្ឌខណ្ឌដូនពេញ ឃាត់ខ្លួនកាលពីថ្ងៃទី១៧ ខែមីនា ឆ្នាំ២០១៨ ជាមួយវត្ថុតាងជាច្រើនខណៈពួកគេកំពុងតែ កត់ឆ្នោតកន្ទុយលេខវៀតណាមខុសច្បាប់។ ក្រោយឃាត់ខ្លួនយកទៅសាកសួរ​សមត្ថកិច្ចជំនាញ បានកសាងសំណុំរឿង បញ្ជូនស្ត្រីទាំង២នាក់ទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ តែទីបំផុត​ស្ត្រីទាំង​២នាក់ បានទទួលឱកាសទៅប្រកបរបរ​នេះវិញដដែល។

ពាក់ព័ន្ធករណីនេះលោក តុប ឈុនឡុង ដែលជាតំណាងអយ្យការកាន់សំណុំរឿង បានថ្លែងតាមទូរស័ព្ទ នៅល្ងាចថ្ងៃទី២១ ខែមីនា ឆ្នាំ២០១៨នេះថា លោក​បានបើកការស៊ើបសួរ និងសម្រេចចោទប្រកាន់លើឈ្មោះ លាង អ៊ីម ភេទស្រី អាយុ​៤៩ឆ្នាំ និងឈ្មោះ ទ្រី ផារី ភេទស្រី អាយុ​២៩ឆ្នាំ ពីបទ​បើកកន្លែងលេងល្បែងស៊ីសង ដោយខុសច្បាប់ យោងតាមមាត្រា​៥នៃច្បាប់ស្តីពី ការបង្ក្រាបល្បែងស៊ីសង។​

លោក តុប ឈុនឡុង បានអះអាងបន្ដថា សំណុំរឿងនេះ ក្នុងនាមជាតំណាងអយ្យការ លោកបានស្នើសុំឲ្យចៅក្រមស៊ើបសួរ ឃុំខ្លួនជនត្រូវចោទទាំង​២នាក់ ប៉ុន្តែនៅពេលសំណុំរឿងនេះ ស្ថិតក្រោមការចាត់ការរបស់លោក ហម ម៉េងសែ បែរជាសម្រេចដាក់ក្រោមការត្រួតពិនិត្យតាមផ្លូវតុលាការទៅវិញ (ដោះលែង) ពោលគឺមិនឃុំខ្លួនតាមសំណើររបស់លោកឡើយ។​

លោក តុប ឈុនឡុង បន្ថែមថា លោក បានទទួលសេចក្តីជូនដំណឹង ស្តីពីការសម្រេចដាក់ជនត្រូវចោទឲ្យស្ថិតក្រោម ត្រួតពិនិត្យតាមផ្លូវតុលាការ របស់លោក ហម ម៉េងសែ ដោយកូនចៅលោកយកឲ្យលោកចុះហត្ថលេខា លោកក៏ចុះទៅដោយមិនបានមើលផង។ ទោះជាយ៉ាងណា លោក តុប ឈុនឡុង ក្នុងនាមជាតំណាងអយ្យការកាន់សំណុំរឿងបាន សុំមិនឆ្លើយតបនឹងសំនួរថា «តើលោកតំណាងអយ្យការយល់យ៉ាងណា ចំពោះការសម្រេច របស់ចៅក្រមស៊ើបសួរ និងប្តឹងឧទ្ធរណ៍ប្រឆាំងសេចក្តីសម្រេចរបស់ចៅក្រមស៊ើបសួរនេះដែរឬទេ»?​

ពាក់ព័ន្ធករណីនេះ លោក លី សុផាណា ព្រះរាជអាជ្ញារង និងជាអ្នកនាំពាក្យ​នៃអយ្យការអមសាលាដំបូងរាជធានីភ្នំពេញ បានបញ្ជាក់ថា លោក ហម ម៉េងសែ ជាចៅក្រមស៊ើបសួរ បានសម្រេចដាក់ជនត្រូវចោទឲ្យជាប់កាតព្វកិច្ច ស្ថិតនៅក្រោមការត្រួតពិនិត្យតាមផ្លូវតុលាការ ដោយសារតែជនត្រូវចោទ មិនមែនជាមេកន្ទុយលេខ និងដោយបានពិនិត្យទៅលើ ស្ថានភាពជាក់ស្តែង និងមូលដ្ឋានច្បាប់ផងដែរ៕