(ភ្នំពេញ)៖ ក្រសួងការពារប្រទេសថៃ បានទទួលធ្វើជាម្ចាស់ផ្ទះក្នុងការរៀបចំកិច្ចប្រជុំ គណៈកម្មាធិការព្រំដែនទូទៅ ថៃ-កម្ពុជា (GBC) លើកទី១៣ ដែលបានប្រព្រឹត្តទៅនៅ​ទីក្រុងបាងកក ​ប្រទេស​ថៃ នៅថ្ងៃទី​២១ ខែមីនា ឆ្នាំ​២០១៨​ដែលកិច្ចប្រជុំនេះ ត្រូវបានដឹកនាំដោយសហប្រធាន នាយឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រី រដ្ឋមន្ត្រីក្រសួងការពារប្រទេស​ថៃ និង​សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា។

​ភាគីកម្ពុជា ក៏មានការចូលរួមពី នាយឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ, ទេសរដ្ឋមន្ដ្រី វ៉ា គឹមហុង ប្រធានគណៈកម្មាធិការចំរុះកិច្ចការព្រំដែន, នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ ព្រមទាំងលោកមេបញ្ជាការ មកពីបណ្តាកងឯកភាពកងយោធពលខេមរភូមិន្ទ ដែលមានការពាក់ពន្ធ័ជាច្រើនទៀត​។

​កិច្ចប្រជុំគណៈកម្មាធិការព្រំដែនទូទៅ​កម្ពុជា-ថៃ លើកទី​១៣​នេះ មានគោលបំណងរំលឹកឡើងវិញ ក្នុងពេលកន្លងមកក្នុងការអនុវត្តការងារកំណត់ហេតុ កិច្ចប្រជុំគណៈកម្មការព្រំដែនទូទៅលើកទី​១២ រួមទាំងកំណត់ទិសដៅនៃកិច្ចសប្រតិបត្តិការ រក្សាសន្តិភាព ស្ថិរភាពនៅតាមបណ្តោយព្រំដែន នៃប្រទេសទាំងពីរ​កម្ពុជា-ថៃ​។

​នាយឧត្តមសេនីយ៍ ប្រាវីត វង្សសុវណ្ណ បានថ្លែងថា ដោយសម្ព័ន្ធមេត្រីភាពចំណងមិត្តភាព និងមនុស្សសញ្ចេតនាស្មោះ​ត្រង់ រវាងកងទ័ពទាំងពីរ បានធ្វើឲ្យកិច្ចប្រជុំលើកនេះ បានសម្រេចជោគជ័យ​ដូចកិច្ចប្រជុំលើកមុនៗ កន្លងមកដែល​អាចភ្ជាប់កិច្ចសហប្របត្តិការ ដែលមានស្រាប់ ព្រមទាំង​ការអភិវឌ្ឍន៍ឲ្យមានការរីកចម្រើនឡើងថែមទៀត និង​ផ្ដល់ផលប្រយោជន៍​ដល់​ព្រំដែននៃប្រទេសទាំងពីរ គឺជាព្រំដែនសុខ​សន្តិភាព មិត្តភាព កិច្ចសហប្រតិបត្តិការយ៉ាងពិតប្រាកដ។

សម្ដេចពិជ័យសេនា ទៀ បាញ់ បានសម្តែងនូវក្តីសោមនស្សរីករាយ ដោយបានឃើញ​ភាពរីកចម្រើនយ៉ាងល្អប្រសើរ ក្នុងទំនាក់ទំនង និងកិច្ចសហប្របត្តិការរវាងកងទ័ព នៃប្រទេសទាំងពីរកម្ពុជាថៃ ដែលស្ដែងឲ្យឃើញតាមរយៈការបង្កើតយន្តការប្រជុំប្រចាំ​ឆ្នាំ រវាងអគ្គមេបញ្ជាការកងទ័ព ការបង្កើនតួនាទីការិយាល័យទំនាក់ទំនងព្រំដែន ការចេញបញ្ជីឈ្មោះអ្នកទំនាក់ទំនងបន្ទាន់ (Hotline) រវាងអាជ្ញាធរសន្តិសុខ នៅតាមតំបន់ព្រំដែនគ្រប់លំដាប់ថ្នាក់ និង​ការពង្រឹងកិច្ចសហប្រតិបត្តិការ លើអង្គភាពពេទ្យយោធា​ដែលទាំងអស់នេះ ជាភស្តុតាងបង្ហាញ នូវការវិវត្តន ​ជាវិជ្ជមានក្នុងភាពជាដៃគូ និងចំណងមិត្តភាព ដ៏ល្អប្រពៃ​រវាងប្រទេសយើងទាំងពីរ សមស្របតាមតួនាទីដ៏សំខាន់ នៃគណៈកម្មាធិការព្រំដែនទូទៅរបស់យើង​លើវិស័យសន្តិសុខ សន្តិភាព និងការអភិវឌ្ឍន៍​។​

កិច្ចប្រជុំគណៈកម្មាធិការព្រំដែនទូទៅ លើកទី​១៣ ត្រូវបានរៀបចំឡើងដោយយោងទៅតាម កិច្ចព្រមព្រៀងនៃការបង្កើតកិច្ចសហប្រតិបត្តិការព្រំដែនរវាង​កម្ពុជា និង​ថៃ ក្នុងគោលបំណងបង្កើនកិច្ចសហប្រតិបត្តិការ ដើម្បីសន្តិភាព និងសន្តិសុខក្នុងតំបន់ព្រំដែន ក៏ដូចជាការបន្ថែមនូវទំនាក់ទំនង រវាងកងទ័ព និងកងឯកភាពសន្តិសុខ ពាក់ព័ន្ធដទៃទៀតរបស់កម្ពុជា និងថៃ។

តាមរយៈកិច្ចប្រជុំនេះភាគីទាំងពីរ ក៏បានពិនិត្យឡើងវិញនូវលទ្ធផល នៃការអនុវត្តកម្មវិធីកិច្ចសហប្រតិបត្តិការផ្សេងៗ ដែលបានដាក់ចេញដោយ កិច្ចប្រជុំគណៈកម្មការព្រំដែនទូទៅ លើកទី​១២ កាលពី​ថ្ងៃទី​៣០ ខែមីនា ឆ្នាំ​២០១៧​នៅខេត្តសៀមរាប ដូចជា​កិច្ចសហប្រតិបត្តិការលើការឆ្លងកាត់ព្រំដែន បញ្ហាពលករ ការទប់ស្កាត់ និងបង្ក្រាបការជួញដូរគ្រឿងញៀន ការលើកកម្ពស់កិច្ចសហប្រតិបត្តិការវាងកងទ័ពកម្ពុជា ជាមួយបណ្ដាអង្គភាពសន្តិសុខថៃ នៅតំបន់ព្រំដែន​ បញ្ហាកសិកម្ម បញ្ហាសុខភាពសាធារណៈ ការអភិវឌ្ឍន៍ ជាភាពរស់នៅ ការអប់រំ សាសនា និង​វប្បធម៌​។

កិច្ចប្រជុំគណៈកម្មាធិការព្រំដែនទូទៅ​លើកទី​១៣​នេះ ក៏បានជំរុញឲ្យភាគីទាំងពីរ កម្ពុជា-ថៃ បន្តនូវភារកិច្ចក្នុងការថែរក្សាសន្តិភាពស្ថេរភាព តាមបណ្តោយព្រំដែន​ប្រ​ទេសទាំងពីរ ដោយស្របតាមគោលការណ៍ និង​វិធានការដែលបានកំណត់ ក្នុងកំណត់ហេតុព្រមព្រៀង នៃកិច្ចប្រជុំលើកទី​១៣​នេះ លើគ្រប់ទិដ្ឋភាពទាំងអស់៕