(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃនេះ បានប្រកាសយ៉ាងដាច់ខាតថា សម្តេចនឹងមិនស្នើឱ្យមានការលើកលែងទោស ឬបន្ធូរបន្ថយទោស ដល់អតីតសមាជិកគណបក្សប្រឆាំងណាមួយនោះទេ ដោយសារតែមេដឹកនាំរបស់ពួកគេ ធ្វើនយោបាយស្ទើភ្លើង មិនចេះអត់ធ្មត់។
ការប្រកាសដាច់ខាតនេះ គឺជាសារព្រមានឆ្លើយតបចំពោះ លោក សម រង្ស៊ី មេចលនាសង្រ្គោះជាតិ និងអតីតថ្នាក់ដឹកនាំគណបក្សសង្រ្គោះជាតិ ដែលបានញុះញង់ ឱ្យមានការដុតរូបថត និងទីមោង ប្រឆាំងនឹងវត្តមានរបស់សម្តេចតេជោ ហ៊ុន សែន នៅប្រទេសអូស្រ្តាលី អំឡុងកិច្ចប្រជុំកំពូលពិសេសអាស៊ាន-អូស្រ្តាលី នៅទីក្រុងស៊ីដនី កាលពីពេលថ្មីៗនេះ។
ជាមួយនឹងការថ្លែងសារ នៅក្នុងជំនួបសំណេះសំណាលជាមួយកម្មករ កម្មការិនីសរុបប្រមាណ ១៥,៧៦៣នាក់ មកពីរោងចក្រ សហគ្រាសចំនួន៥ នៅភូមិជ្រៃកោង ផ្លូវវេងស្រេង ខណ្ឌពោធិ៍សែនជ័យ នាព្រឹកថ្ងៃទី២១ ខែមីនា ឆ្នាំ២០១៨នេះ សម្តេចតេជោ ហ៊ុន សែន បានចាត់ទុកថា សកម្មភាពពុះកញ្ច្រោលរបស់អតីតមេគណបក្សប្រឆាំង គឺជានយោបាយស្ទើរភ្លើង ដែលកាន់តែធ្វើឱ្យសម្តេចមានហេតុផលច្បាស់លាស់ ក្នុងការប្រកាសមិនលើកលែងទោស ដល់អតីតសមាជិកគណបក្សប្រឆាំង ដែលជាប់ពន្ធនាគារចាប់ពីក្រោយការបោះឆ្នោត កាលពីឆ្នាំ២០១៣។
សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ដឹងថាគន្លឹះនៅនឹងដៃ ហ៊ុន សែន ហើយមកដុតរូប ហ៊ុន សែន វាមិនចប់។ មិនមែន ហ៊ុន សែន ដាក់អន្ទាក់ទេ ក៏ប៉ុន្តែអ្នកឯង ទៅផុតគំនូសក្រហមទៅហើយ អញ្ចឹងបានសេចក្តីណាថា អ្នកឯងស្ទើរភ្លើងណាស់ខាងនយោបាយ អ្នកឯងគួរមានការអត់ធ្មត់ ហើយអ្នកឯងសុំទទូចចរចាល្អជាង ប៉ុន្តែដល់ពេលអ្នកឯងវ៉ៃតាមរបៀបដុតរូបហ៊ុន សែន អញ្ចឹ ងហ៊ុន សែន ថែមទៀតថា ដួងកែវរបស់ហ៊ុន សែន នៅនឹងនាគ អញ្ចឹងទាល់តែទៅវ៉ៃនាគទើបបាន»។
ដោយបង្ហាញពីរឿងមេក្រុមប្រឆាំងចាញ់បញ្ឆោទសម្តេចនោះ សម្តេចតេជោ ហ៊ុន សែន ក៏ចាប់ផ្តើមរំលេចអំពីរឿងក្រុមអ្នកប្រឆាំង ដែលជាប់ពន្ធនាគារក្រោយឆ្នាំ២០១៣ អំឡុងពេលតវ៉ាទៅនឹងលទ្ធផលបោះឆ្នោត។ បានបន្តទៀតថា បញ្ហានេះ បានធ្វើឱ្យសម្តេចគិតថា ក្រុមអ្នកប្រឆាំងដែលកំពុងជាប់ពន្ធនាគារនៅកម្ពុជា ក៏ត្រូវតែជាប់បន្តទៀត មិនត្រូវមានការលើកលែងទេ។
សម្តេចថ្លែងថា៖ «សូម្បីតែអ្នកជាប់គុក នៅភ្នំពេញដែលបានស្នើសុំលើកលែងទោស ក៏ត្រូវជាប់គុកបន្ថែមទៀតដែរ គ្មានលើកឱ្យឯងទេ ដោយសារតែពួកអាមេចង្រៃនោះ វាធ្វើសកម្មភាពបែបហ្នឹង អញ្ចឹងសូមបន្តជាប់គុកតទៅទៀតទៅ។ អាខ្លះសុំមកខ្ញុំតើ ផ្ញើតាមទូតផង ផ្ញើតាមអ្នកនេះផង។ ឯងដោះលែង ហុង សុខហួរមួយ គេថាអាហ្នឹង សម្ពាធអន្តរជាតិ អើ ! អញ្ចឹងបើនៅតែបន្តអាធុនហ្នឹង អញមិនលើកលែងឱ្យនរណាទេ ប្រាប់ឱ្យហើយទៅ ជាប់គុកឱ្យគ្រប់ ហើយមិនបាច់បញ្ចូលក្នុងបញ្ជីលើកលែងទោសទេ។ យើងលើកលែងទោសឱ្យមួយ ដោយសារតែមានការសុំទោសជាលាយលក្ខណ៍អក្សយើងក៏បានលើកលែងទោសឱ្យ ប៉ុន្តែអាមេវានោះ វាថាដោយសារសម្ពាធអន្តរជាតិ អញ្ចឹងទាំងអស់ នរណាជាប់គុកប៉ុន្មាន ត្រូវជាប់ឱ្យគ្រប់ខែ កុំខ្វល់ពេក !»។
អតីតសមាជិកនៃអតីតគណបក្សប្រឆាំង មិនតិចជាង១០នាក់ ត្រូវបានសមត្ថកិច្ចចាប់ខ្លួនជាបន្តបន្ទាប់ ក្រោយប្រព្រឹត្តបទល្មើសព្រហ្មទណ្ឌផ្សេងៗគ្នា។ លោក មាជ សុវណ្ណារ៉ា អតីតប្រធាននាយកដ្ឋានព័ត៌មាន និងផ្សព្វផ្សាយរបស់អតីតគណបក្សសង្រ្គោះជាតិ ត្រូវបានបានសមត្ថកិច្ចចាប់ខ្លួន កាលពីថ្ងៃទី១១ ខែវិច្ឆិកា ឆ្នាំ២០១៤ ពាក់ព័ន្ធនឹងអំពើហិង្សា នៅក្បែរទីលានប្រជាធិបតេយ្យ ជាមួយនឹងមនុស្សជាង១០នាក់ផ្សេងទៀត។ លោក អ៊ុ សំអាន អតីតតំណាងរាស្រ្តមកពីអតីតបក្សប្រឆាំង ត្រូវបានសមត្ថកិច្ចចាប់ខ្លួន ក្នុងខេត្តសៀមរាប កាលពីយប់រំលងអាធ្រាតថ្ងៃ១១ ខែមេសា ឆ្នាំ២០១៦ ពាក់ព័ន្ធនឹងការប្រើប្រាស់ផែនទីក្លែងក្លាយ។ លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីខែសីហា ឆ្នាំ២០១៥ និងបានដោះលែងវិញ នៅល្ងាចថ្ងៃទី២៥ ខែតុលា ឆ្នាំ២០១៧ បន្ទាប់ពីព្រះមហាក្សត្រ ចេញព្រះរាជក្រឹត្យលើកលែងទោស ក្រោយពីមានសំណើពីនាយករដ្ឋមន្រ្តី។ ក្រៅពីនោះ លោក កឹម សុខា ក៏ត្រូវបានសមត្ថកិច្ចចាប់ខ្លួន កាលពីខែកញ្ញា ឆ្នាំ២០១៧ផងដែរ ពាក់ព័ន្ធការប្រព្រឹត្តអំពើក្បត់ជាតិ។
នៅក្នុងពិធីជួបសំណេះសំណាលជាមួយកម្មករដដែលនោះ សម្តេចតេជោ ហ៊ុន សែន បានបញ្ជាក់បន្ថែមថា ដរាបណាឱ្យតែសម្តេច នៅធ្វើជានាយករដ្ឋមន្រ្តី សម្តេចនឹង មិនលើកលែងទោស ដល់ក្រុមអ្នកប្រឆាំងទាំងនេះឡើយ។ សម្តេច ហ៊ុន សែន បានអះអាងថា សម្តេចឈប់ធ្វើនាយករដ្ឋមន្រ្តី ក៏ពួកគេនៅតែជាប់គុកដែរ ព្រោះសម្តេច ធ្វើនាយករដ្ឋមន្រ្តីតែ១០ឆ្នាំទៀតទេ ចំណែកពួកគេមានអ្នកខ្លះជាប់គុករហូតដល់២០ឆ្នាំ៕
