(កំពង់ចាម)៖ ដើម្បីអនុវត្តន៍តាមគោលការណ៍របស់ អគ្គស្នងការដ្ឋាននគរបាលជាតិ នៅថ្ងៃទី២០ ខែមីនា ឆ្នាំ២០១៨នេះ នៅស្នងការដ្ឋាននគរបាលខេត្តកំពង់ចាម បានរៀបចំពិធីបិទអង្គសន្និបាតបូកសរុបលទ្ធផលការងារ ឆ្នាំ២០១៧ និងផ្សព្វផ្សាយទិសដៅការងារឆ្នាំ២០១៨ របស់អគ្គស្នងការដ្ឋាននគរបាលជាតិ និងបំពាក់ឋានន្តរសក្តិជូនមន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ចាម ចាប់ពីថ្នាក់វរសេនីយ៍ទោ ដល់អនុសេនីយ៍ឯក។
ពិធីនេះប្រព្រឹត្តទៅក្រោមអធិបតីភាព នាយឧត្តមសេនីយ៍ កង សុខន អគ្គស្នងការរង តំណាងនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោក គួច ចំរើន អភិបាលខេត្តកំពង់ចាម។
អង្គសន្និបាតនេះ ក៏មានការអញ្ជើញចូលរួមពីលោកឧត្តមសេនីយ៍ទោ ឯម កុសល ស្នងការនគរបាលខេត្ត, លោកព្រះរាជអាជ្ញា លោកប្រធានសាលាដំបូងលោក លោកស្រីស្នងការរងគ្រប់រូប លោកមេបញ្ជាការប្រដាប់អាវុធទាំង២ លោកអភិបាលស្រុក ក្រុងទាំង១០ លោកអនុប្រធានផែនជំនាញគ្រប់ផែន លោក លោកស្រី នាយ នាយរងការិយាល័យជំនាញចំណុះស្នងការដ្ឋាននគរបាលខេត្ត លោកអធិការ អធិការរងនគរបាលស្រុក ក្រុងទាំង១០ លោកនាយប៉ុស្តិ៍នគរបាលរដ្ឋបាលទាំង១០៩ប៉ុស្តិ៍ សរុប២៨៥នាក់។
ឆ្លៀតក្នុងឱកាសអង្គសន្និបាតនោះដែរ នាយឧត្តមសេនីយ៍ កង សុខន បានប្រគល់នូវកុំព្យូទ័រចំនួន០៥គ្រឿង ដែលទទួលបានពីអគ្គនាយកដ្ឋានអន្ដោប្រវេសន៍ ដើម្បីផ្ដល់ជូនការិយាល័យជំនាញ និងផ្នែកអន្ដោប្រវេសន៍ នៃអធិការដ្ឋាននគរបាលស្រុក ក្រុងចំនួន០៤សម្រាប់យកទៅអនុវត្តន៍ក្នុងកិច្ចការងារជំនាញ។
ជាចុងបញ្ចប់នៃកម្មវិធី លោក គួច ចំរើន អភិបាលខេត្តកំពង់ចាម ក៏បានឧបត្ថម្ភថវិកា ចំនួន៣,០០០,០០០រៀល (បីលានរៀល) ដល់កម្មវិធីនាពេលរសៀលនេះផងដែរ៕
