(ភ្នំពេញ)៖ សម្ភារពេទ្យ រួមជាមួយថ្នាំពេទ្យមួយចំនួន ត្រូវបានសប្បុរសជន និងក្រុម «DJs VJ MC» ប្រគល់ជូនគ្លីនិក «ទន្លេ» ដែលជាក្រុមគ្រូពេទ្យស្ម័គ្រចិត្ត ពិនិត្យ ព្យាបាល មិនយកកំរ៉ៃ លើអ្នកជំងឺ ដែលរស់នៅលើផ្ទៃទន្លេសាប ដោយមានសមាជិកពេទ្យ១៨នាក់ មានស្នាក់ការនៅក្រុមទី៦ ភូមិសាលាកន្សែង​ ឃុំស្វាយដង្គុំ ក្រុងសៀមរាប ខេត្តសៀមរាប។

ការប្រគល់សម្ភារ និងថ្នាំពេទ្យ ខាងលើនេះ បានធ្វើឡើងក្នុងឱកាសដែល ក្រុម «DJs VJ MC» តាម​ក្លឹប​នានា ដែលរួម​មាននៅ​ វិទ្យុ និង​ទូរទស្សន៍ តារា​សំដែង តារាចម្រៀង បានសហការ គ្នា រ៉ៃសង្គាសមួយ នៅក្នុងការ​ជួបជុំគ្នា ​ជា​លើក​ទី៤ នៃកម្មវិធី DJs Party 2018 នារាត្រីថ្ងៃទី១៧ ខែមីនា ឆ្នាំ២០១៨ កន្លងទៅនេះ។

អ្នករៀបចំកម្មវិធីនេះឡើង បានឲ្យដឹងថា កម្មវិធី DJ party ជាកម្មវិធីមួយ ដែលត្រូវបានបង្កើតឡើង ដោយក្រុម ពិធីករ និង Dj មួយក្រុមតូច បង្កើតក្នុងគោលបំណងធំៗ ចំនួន៤ ៖

១៖ ចង់ឲ្យមានការជួបជុំញ្ញាំអីរួមគ្នា បង្កើតមិត្តភាពឲ្យកាន់តែមានភាពស្និតស្នាលគ្នា ទៅវិញទៅមក
២៖ ផ្លាសប្តូរបទពិសោធន៍គ្នា ទៅវិញទៅមក អំពីអាជីពការងារ
៣៖ ប្រមូលផ្តុំពិធីករ និង DJ ឲ្យក្លាយជាសមាគមន៍មួយ ដែលអាចជួយគ្នា ទៅវិញទៅមក ក្នុងពេលដែលសមាជិកណា ម្នាក់មានបញ្ហា
៤៖ ដើម្បីរៃអង្គាសប្រាក់ សម្រាប់ជួយដល់កុមាកំព្រា ចាស់ជរាគ្មានទីពឹង និងជួយដល់មន្ទីរពេទ្យ មួយចំនួនផ្សេងទៀតផងដែរ។

អ្នករៀបចំកម្មវិធី បន្តថា កម្មវិធីនេះ ត្រូវបានចាប់ផ្តើមដំបូង តាំងពីឆ្នាំ២០១៥ និងមានសមាជិកត្រឹមតែ៧០នាក់ប៉ុណ្ណោះចូលរួម ក្រោយពីការបង្កើតឡើងក្នុងឆ្នាំ២០១៥ រួចមក កម្មវិធីនេះ ហាក់ដូចទទួលបានភាពជោគជ័យយ៉ាងខ្លាំង តាមរយៈការផ្សារភ្ជាប់មិត្តវាង DJ ក្លឹប និង DJ ក្លឹប ពិធីករវិទ្យុ និងពិធីករវិទ្យុ ក៏ដូចជា DJ ក្លឹប និង ពិធីករវិទ្យុ ក្នុងនោះ ក៏មានមិត្តសិល្បករ ចូលរួមផងដែរ។

សូមបញ្ជាក់ថា គ្លីនិក «ទន្លេ» ជាក្រុមគ្រូពេទ្យស្ម័គចិត្ត ពិនិត្យ ព្យាបាល មិនយកកំរ៉ៃ លើអ្នកជំងឺ តែលឺផ្ទៃទន្លេសាប មានសមាជិកពេទ្យ១៨នាក់ ដោយក្នុងមួយឆ្នាំ មានអ្នកជំងឺប្រមាណ ២៥,៣០៥នាក់ កុមារ ១១,៦៩២ ទទួលបានការព្យាបាល៕