(ភ្នំពេញ)៖ ការបំពាក់កាមេរ៉ាសុវត្ថិភាព នៅតាមទីសាធារណៈ និងទីឯកជនសំខាន់ៗនានា ត្រូវបានអ្នកជំនាញអះអាងថា បានចូលរួមចំណែកយ៉ាងសំខាន់ ក្នុងការការពារអសន្តិសុខ និងឈានដល់ការចាប់ខ្លួនជនល្មើសថែមទៀតផង។ កាមេរ៉ាសុវត្ថិភាពដែលមានគុណភាពល្អ បានជួយដល់សមត្ថកិច្ច ក្នុងការកំណត់អត្តសញ្ញាជនល្មើសបានត្រឹមត្រូវ និងចំណេញពេលវេលា សម្រាប់ការងារស៊ើបអង្កេត។
លោក ម៉ម ដារ៉េត នាយកប្រតិបត្តិក្រុមហ៊ុន Vantech ដែលចាប់ផ្តើមផ្គត់ផ្គង់កាមេរ៉ាសុវត្ថិភាព នៅក្នុងប្រទេសកម្ពុជា និងកំពុងសម្លឹងរកដៃគូចែកចាយបន្ត បានលើកអំពីអត្ថប្រយោជន៍នៃការប្រើប្រាស់ផលិតផលកាមេរ៉ារបស់លោក។ លោកបានអះអាងប្រាប់អ្នកសារព័ត៌មានក្នុងពេលសម្ពោធក្រុមហ៊ុនរបស់លោក កាលពីម្សិលមិញថា កាមេរ៉ាសុវត្ថិភាព បានចូលរួមការពារផលប្រយោជន៍របស់អ្នកប្រើប្រាស់ដូចជា ទី១៖ គឺឱ្យអ្នកមានគំនិតមិនល្អ ប្រុងធ្វើសកម្មភាពនៅកន្លែងរបស់យើងមានការខ្លាចរអារ, ទី២៖ ងាយស្រួលក្នុងការកំណត់អត្តសញ្ញាណជនល្មើសបើសិនជាមានករណីមិនប្រក្រតីអ្វីមួយកើតឡើង និងទី៣៖ ជួយត្រួតពិនិត្យមើលសកម្មភាពនានាសម្រាប់អ្នកគ្រប់គ្រង រួមទាំងអត្ថប្រយោជន៍ផ្សេងៗទៀត។
កន្លងទៅ កាមេរ៉ាសុវត្ថិភាព បានធ្វើឱ្យសមត្ថកិច្ច ប្រើប្រាស់ដើម្បីជាឯកសារ ភស្តុតាង នៅពេលដែលមានបទល្មើសណាមួយកើតឡើងនៅមូលដ្ឋានរបស់ពួកគាត់។ សម្រាប់ការគ្រប់គ្រងរាជធានីភ្នំពេញ កាមេរ៉ាសុវត្ថិភាព ត្រូវបានបំពាក់នៅទីសំខាន់ៗមួយចំនួន តាមចំណុចភ្លើងស្តុប ក្នុងរាជធានីភ្នំពេញ ដើម្បីតាមដានបទល្មើសនានា។
ក្រសួងមហាផ្ទៃ កន្លងទៅ ក៏បានប្រកាសបង្កើតមណ្ឌលប្រចាំបញ្ជាមួយ ដែលមានទីស្នាក់ការនៅសាលារាជធានីភ្នំពេញ ដើម្បីត្រួតពិនិត្យមើលបញ្ហាចរាចរណ៍ អគ្គិភ័យ និងសន្តិសុខសណ្តាប់ធ្នាប់២៤ម៉ោងផងដែរ តាមរយៈការបំពាក់កាមេរ៉ាជាង១ពាន់កន្លែងនៅទូទាំងរាជធានីភ្នំពេញ ដើម្បីជួយសម្រួលដល់សន្តិសុខ សណ្តាប់ធ្នាប់របស់ប្រជាពលរដ្ឋ ។
លោក ម៉ម ដារ៉េត បានលើកឡើងទៀតថា ការបំពាក់កាមេរ៉ាសុវត្ថិភាព គឺមិនត្រឹមតែចូលរួមចំណែកការពារដល់សន្តិសុខទេ គឺវាក៏បានឆ្លើយតបចំពោះការរីកចម្រើនសេដ្ឋកិច្ចផងដែរ។ លោកបានអះអាងទៀតថា បច្ចុប្បន្នពលរដ្ឋខ្មែរមានការយល់ដឹង អំពីសារប្រយោជន៍នៃកាមេរ៉ាសុវត្ថិភាពច្រើន ហើយទីតាំងអាជីវកម្ម ស្នាក់ការរដ្ឋ ឯកជនមួយចំនួន ក៏បានបំពាក់កាមេរ៉ាសុវត្ថិភាពនេះដែរ។
តាមការប៉ាន់ប្រមាណរបស់អ្នកជំនាញ បានអះអាងថា កំណើនការប្រើប្រាស់កាមេរ៉ាសុវត្ថិភាពជាមធ្យមប្រចាំឆ្នាំ គឺក្នុងអត្រាខ្ពស់ជាង២០% ក្នុង១ឆ្នាំៗ។ ប៉ុន្តែទោះជាយ៉ាងនេះក្តី មិនទាន់មានរបាយការណ៍ផ្លូវការណាមួយអះអាងអំពីអត្រាកើនឡើង នៃការប្រើប្រាស់កាមេរ៉ាសុវត្ថិភាពនេះនៅឡើយទេ។
ក្រុមហ៊ុន Safe Home Technology ដែលជាក្រុមហ៊ុនបំពាក់កាមេរ៉ាសុវត្ថិភាព នៅតាមគេហដ្ឋាន បានអះអាងថា ការបំពាក់កាមេរ៉ាតាមគេហដ្ឋាន និងតាមទីឯកជននានា នៅកម្ពុជា ក៏មានការកើនឡើងខ្លាំង ដោយសារតែអតិថិជន មានការយល់ដឹងខ្ពស់អំពីប្រសិទ្ធភាព និងអត្ថប្រយោជន៍ នៃការប្រើប្រាស់កាមេរ៉ានេះ។
ដោយមើលឃើញអំពីភាពចាំបាច់ទាំងអស់នេះ អ្នកជំនាញបានជំរុញឱ្យអាជីវករ ថៅកែក្រុមហ៊ុន និងប្រជាពលរដ្ឋនានា គួរបំពាក់កាមេរ៉ាសុវត្ថិភាពនៅកន្លែងដែលសំខាន់ៗ និងចូលរួមគាំទ្រដល់ការប្រើប្រាស់កាមេរ៉ាសុវត្ថិភាព ឱ្យបានកាន់តែច្រើនឡើងថែមទៀត៕
