(ត្បូងឃ្មុំ)៖ នៅព្រឹកថ្ងៃទី១៥ ខែមីនា ឆ្នាំ២០១៨នេះ នៅសាលប្រជុំសាលាខេត្តត្បូងឃ្មុំ លោក ហាក់ សុខមករា អភិបាលរងខេត្តត្បូងឃ្មុំ បានបើកកិច្ចបូកសរុបលទ្ធផល ការត្រួតពិនិត្យយានយន្តខុសលក្ខណៈបច្ចេកទេស ក្នុងខេត្តត្បូងឃ្មុំ ដែលមានការអញ្ជើញចូលរួមពី មន្ទីរ អង្គភាព និងមន្ត្រីជំនាញពាក់ព័ន្ធជុំវិញខេត្តជាច្រើននាក់ផងដែរ។
លោក ហាក់ សុខមករា បានថ្លែងជំរុញដល់មន្ទីរអង្គភាព និងមន្ត្រីជំនាញពាក់ព័ន្ធទាំងអស់ រួមសហការគ្នាប្តេជ្ញាធ្វើយ៉ាងណាទប់ស្កត់មិនឲ្យមានវត្តមាន រថយន្តកែច្នៃ តទ្រុងខុសលក្ខណៈបច្ចេកទេស ធ្វើចរាចរណ៍តាមដងផ្លូវ ក្នុងទឹកដីខេត្តត្បូងឃ្មុំនោះឡើយ។
លោកអភិបាលរងខេត្ត បានក្រើនរំលឹកដល់មន្ត្រីជំនាញពាក់ព័ន្ធទំាងអស់ ជាពិសេសលោកអភិបាលក្រុង-ស្រុក ត្រូវយកចិត្តទុកដាក់ខ្ពស់លើកិច្ចការនេះ និងត្រូវចាត់ទុកថា កិច្ចការនេះជាការងារួមទំាងអស់គ្នា ក្នុងការរួមចំណែកពង្រឹងសុវត្ថិភាពចរាចរណ៍តាមដងផ្លូវ នឹងបន្តធ្វើជាប្រចាំដូចភ្លៀងរលឹម ដើម្បីទប់ស្កាត់កុំឲ្យរថយន្តតទ្រុងខុសលក្ខណៈបច្ចេកទេស កើតមានឡើងសារជាថ្មី។
លោកក៏បានសំណូមពរ ដល់ម្ចាស់យានយន្តដែលធ្វើចរាចរណ៍លើដងផ្លូវទាំងអស់ សូមកុំយករថយន្តទៅកែច្នៃគ្រប់រូបភាព ដើម្បីតែចង់បានផលប្រយោជន៍ផ្ទាល់ខ្លួន ដឹកបានច្រើននោះ ដែលធ្វើឲ្យផ្លូវត្រូវខូចខាត ព្រោះតែដឹកលើសទម្ងន់ និងពិសេសលោកក៏បាន សំណូមពរដល់អ្នកបើកបរយាន្តជំនិះគ្រប់ប្រភេទនៅលើផ្លូវ សូមគោរពច្បាប់ចរាចរណ៍ ដើម្បីរក្សាសុខសុវត្ថិភាព និងអាយុជីវិតយើងទាំងអស់គ្នា។
បើតាមលោក គី វីរិន ប្រធានមន្ទីរសាធារណៈការ និងដឹកជញ្ជូនខេត្តត្បូងឃ្មុំ បានឲ្យដឹងថា គិតចាប់ពីថ្ងៃទី១០ ខែកុម្ភៈ រហូតដល់ថ្ងៃទី១៤ ខែមីនា ឆ្នាំ២០១៨ មានរយៈពេល៣២ថ្ងៃ នៃការអនុវត្តន៍ចំណាត់ការក្តៅរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ក្រុមការងារបានធ្វើការឃាត់រថយន្តធុនធំបានចំនួន ៤,១១០គ្រឿង ក្នុងនោះ រថយន្តតទ្រុងខុសលក្ខណៈបច្ចេកទេសចំនួន ១៨៩គ្រឿង ត្រូវបានចាប់កាត់ទ្រុងចេញ ក្នុងទឹកដីខេត្តត្បូងឃ្មុំ ៕
