(កំពង់ចាម)៖ ស្ពានឆ្លងកាត់ទន្លេពីក្រុងកំពង់ចាមទៅកាន់កោះប៉ែន ដែលសាងសង់ដោយកូនខ្មែរសុទ្ធសាធ និងប្រើថវិកាផ្ទាល់របស់​រាជរដ្ឋា​ភិបាល​កម្ពុជាតម្លៃប្រមាណ ១៣លានដុល្លារអាមេរិក ត្រូវសម្ពោធដាក់ឲ្យប្រើប្រាស់ជាផ្លូវការនៅថ្ងៃពុធ ១៣រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៤ ខែមីនា ឆ្នាំ២០១៨នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ស្ពានកោះប៉ែន គឺជាស្ពានឆ្លងទន្លេទី២ហើយដែលបានលេចចេញជារូបរាងនៅលើទឹកដីនៃខេត្តកំពង់ចាម បន្ទាប់ពីស្ពានគីហ្សូណា ខណៈដែលស្ពានឆ្លងទន្លេមួយទៀត គឺស្ពានស្ទឹងត្រង់-ក្រូចឆ្មារ កំពុងដំណើរការសាងសង់។ ស្ពានគីហ្សូណា និងស្ពានស្ទឹងត្រង់-ក្រូចឆ្មារ គឺជាស្ពានដែលសាងសង់ឡើងដោយបរទេស និងប្រើប្រាស់ថវិកាជំនួយ និងកម្ចីរបស់បរទេស ដោយឡែកស្ពានកោះប៉ែន ត្រូវបានសាងសង់ឡើងដោយថវិការបស់រាជរដ្ឋាភិបាល ហើយក៏សាងសង់ឡើងដោយដៃកូនខ្មែរផងដែរ។

កងកម្លាំងវិស្វកម្មក្រសួងការពារជាតិ គឺជាអ្នកទទួលភារៈសាងសង់ស្ពានឆ្លងកាត់ទន្លេមួយនេះ។ ឧ​ត្ត​ម​សេនីយ៍​ទោ គង់ អៀង នាយករង នាយកដ្ឋាន​វិស្វកម្មក្រសួង​ការពារ​ជាតិ ដែលជាអ្នកមើលការខុសត្រូវផ្ទាល់លើការសាងសង់ស្ពាននេះ បាន​ឲ្យដឹង​ថា ស្ពាន​កោះប៉ែន​បាន​ចាប់ផ្តើម​សាងសង់កាលពី​ខែ​ឧសភា ឆ្នាំ​២០១១ មាន​បណ្តោយ​ប្រវែង ៧៧៩​ម៉ែត្រ ទទឹង ៩,២​ម៉ែត្រ និង​កម្ពស់​ពី ២៣ ទៅ ២៤​ម៉ែត្រ ដោយ​ចំណាយ​ថវិកាជាង ​១៣លាន​ដុល្លារ។ ស្ពាន​នេះ​​ឆ្លង​កាត់​ទន្លេ​មេគង្គពីភូមិ​ព្រែក​ដើម​ចាន់ សង្កាត់​សំបួរ​មាស​ ក្រុង​កំពង់ចាម ទៅ​កាន់​កោះ​កំពង់​ត្រុំ ក្នុង​ភូមិ​សាស្ត្រ​ឃុំ​កោះ​មិត្ត ស្រុក​កំពង់សៀម ខេត្ត​កំពង់ចាម។

បើតាមលោក គង់ អៀង ស្ពាននេះអាចផ្ទុកបានចន្លោះពី ២០ ទៅ ៣០តោន ហើយអាចមានអាយុកាលយ៉ាងតិចបំផុត ក៏៥០ឆ្នាំផងដែរ។

ឧត្តមសេនីយ៍ទោ គង់ អៀង បានអះអាងថា ការសាងសង់ស្ពានជួបការលំបាកច្រើនផងដែរ ដោយសារតែខ្វះគ្រឿងចក្រ ហើយក៏បានរក​ឃើញក្បាលគ្រាប់ជាច្រើនបន្សល់ពីសម័យសង្គ្រាម។ លោកឧត្តមសេនីយ៍ទោ គង់ អៀង ធ្លាប់បានសាងសង់ស្ពាន​ជាច្រើនកន្លែងមកហើយ ប៉ុន្តែគ្មានការសាងសង់ស្ពានណាធ្វើឲ្យលោកសប្បាយចិត្តដូចការសាងសង់​ស្ពានមួយនេះឡើយ ព្រោះជាស្ពានមានប្រវែងវែងឆ្លងកាត់ទន្លេ ដែលអាចាត់ទុកជាបទពិសោធន៍ថ្មីសម្រាប់រូបលោក។

អ្វីដែលធ្វើឲ្យលោក កាន់តែរីករាយទៀតនោះ ការសាងសង់ស្ពាននេះ គឺទទួលបានការយកចិត្តទុកដាក់ និងលើកទឹកចិត្តខ្ពស់ពីប្រមុខ​រាជរដ្ឋាភិបាលកម្ពុជាសម្តេចតេជោ ហ៊ុន សែន។

ស្ពានកោះប៉ែនបានក្លាយជាចំណងដៃដ៏ពិសិដ្ឋសម្រាប់បងប្អូនប្រជាពលរដ្ឋប្រមាណជា ២ម៉ឺនគ្រួសារនៅលើប្រជុំកោះដូចជាកោះប៉ែន កោះមិត្ត កោះត្រុំជាដើមនោះ សម្រាប់ការធ្វើដំណើរ និងការដឹកជញ្ជូនផងដែរ។ ក្រុងកំពង់កំពង់ចាម ទៅប្រជុំកោះទាំងអស់នេះ មានចម្ងាយមិនឆ្ងាយនោះឡើយ តែទឹកទន្លេមេគង្គបានកាត់ផ្តាច់ឲ្យតំបន់ទាំងពីរនេះហាក់ឆ្ងាយដាច់អាល័យ។

ប្រជាពលរដ្ឋនៅលើកោះពេលដែលចង់ឆ្លងទៅក្រុងកំពង់ចាម ត្រូវឆ្លងទូក ឆ្លងដ ឆ្លងសាឡាងជាដើម។ ការឆ្លងនេះធ្វើឲ្យគាត់ចំណាយ​ទាំងថវិកា និងពេលវេលា។ បន្ទាប់ពីទទួលបានសមិទ្ធផលស្ពានកោះប៉ែននេះ បានធ្វើឲ្យប្រជាពលរដ្ឋនៅលើកោះបង្ហាញក្តីរីករាយជាខ្លាំង។

ប្រជាពលរដ្ឋនៅលើកោះបានថ្លែងថា សមិទ្ធផលស្ពានដែលសម្តេចតេជោ ហ៊ុន សែន សាងសង់ជូនពួកគាត់នេះ ប្រៀបដូចជាសម្តេចបាន​យកប្រាក់ខែជូនពួកគាត់ជារៀងរាល់ខែអីចឹង ព្រោះបានធ្វើឲ្យពួកគាត់លែងចំណាយថវិកាសម្រាប់ឆ្លងស្ពានឬស្សីនៅរដូវប្រាំង និងឆ្លងទូកដ ឆ្លងសាឡាងនៅរដូវវស្សានោះ៕