(ភ្នំពេញ)៖ លោក ពេជ្រ ស្រស់ ប្រធានគណបក្សយុវជនកម្ពុជា បានអះអាងប្រាប់បណ្តាញព័ត៌មាន Fresh News ឱ្យដឹងនៅថ្ងៃទី១៣ ខែមីនា ឆ្នាំ២០១៨នេះថា លោកនឹងអនុវត្តតាមពាក្យដែលលោកធ្លាប់សន្យាដោយអុចធូបរយៈពេល១ឆ្នាំ នៅពេលដែលតុលាការដោះលែងយុវតីម្នាក់ដែលប្រើអំពើហិង្សាលើកូនប្រុសរបស់ឧកញ៉ា ឌួង ឆាយ ក្រោយពេលឧកញ៉ារូបនេះ ប្រកាសយល់ព្រមដកពាក្យបណ្តឹង។

លោក ពេជ្រ ស្រស់ នាពេលកន្លងទៅ ធ្លាប់បានសន្យាថា ខ្លួនសុខចិត្តអុជធូបបួងសួងដល់វត្ថុស័ក្តិសិទ្ធិក្នុង១ថ្ងៃ១ដងពេញ១ឆ្នាំ ដើម្បីបន់ស្រន់ឱ្យកូនឧកញ៉ា ឌួង ឆាយ ជាសះពីជំងឺ បើឧកញ៉ាវ័យក្មេងនេះ ព្រមដកពាក្យបណ្តឹងដែលបានប្តឹងលើយុវតីម្នាក់ឈ្មោះ​ អ៊ុ​ សុផាន់ណា​ អាយុ​២៣ឆ្នាំ​ ដែលជាអ្នកបម្រើរបស់ខ្លួន និងតុលាការដោះលែងយុវតីនេះ ឱ្យមានសេរីភាពឡើងវិញ។ ក្រោយពេលអះអាងនេះ នាពេលថ្មីៗ លោកឧកញ៉ា ឌួង ឆាយ បានចេញវីដេអូមួយប្រកាសដកពាក្យបណ្តឹងលើក្មេងស្រី អ៊ុ​ សុផាន់ណា ផងដែរ។

លោក ពេជ្រ ស្រស់ ប្រធានគណបក្សយុវជន បានអះអាងយ៉ាងដូច្នេះថា «ខ្ញុំ ពេជ្រ ស្រស់ សូមអបអរសាទរ ចំពោះលោកឧកញ្ញា ឌួង ឆាយ ដែលបានបំពេញនូវទានបារមី ដែលជាទានកើតឡើងដោយកម្រ ដោយលោកឧកញ្ញា បានប្រកាសដកពាក្យបណ្តឹងដែលប្តឹងកូនឈ្នួលរបស់លោកឧកញ្ញា ហើយលោកឧកញ្ញាក៏មានគម្រោងស្នើដល់តុលាការឲ្យលើកលែងទោសដល់នាងទៀតផង»។

លោកបានបន្តថា «ខ្ញុំ ពេជ្រ ស្រស់ ក៏មិនភ្លេចពាក្យសន្យារបស់ខ្លួនផងដែរ ដោយខ្ញុំនឹងអុជធូបមួយថ្ងៃ១ដងឲ្យគ្រប់១ឆ្នាំ ដើម្បីបួងសួងដល់វត្ថុស័កសិទ្ធិក្នុងលោកឲ្យជួយតាមថែរក្សាដល់កូនលោកឧកញ្ញាទាំងពីរ ឲ្យមានសេចក្តីសុខ និងសុខភាពល្អបរិបូណ៌ពេញមួយជីវិត ហើយខ្ញុំ ពេជ្រ ស្រស់ នឹងអនុវត្តនូវពាក្យសន្យារបស់ខ្ញុំ​ នៅពេលតុលាការសម្រេចដោះលែង កូនឈ្នួលរបស់លោកឧកញ្ញាជាស្ថាពរ»។

សូមបញ្ជាក់ថា យុវតី អ៊ុ​ សុផាន់ណា​ អាយុ​២៣ឆ្នាំ​ នាពេលកន្លងទៅ ត្រូវបានឧកញ៉ា ឌួង ឆាយ ចោទប្រកាន់ថា ​បានក្តិច​ប្រដាប់​ភេទ​កូន​ប្រុសរបស់លោក បណ្តាល​ឱ្យ​ហើម​ខុស​ប្រក្រតី​ នៅពេលដែលឧកញ៉ា ឱ្យនាងមើលថែកុមារា។ កាលពីថ្ងៃទី២០ ខែកុម្ភៈ ឆ្នាំ២០១៨ លោក​ ជួន​ សុរាសី​ ចៅក្រម​ស៊ើបសួរ​នៃ​សាលា​ដំបូង​រាជធានី​ភ្នំពេញ​ បានសម្រេច​ឃុំ​ខ្លួន​នារី​បម្រើ​ម្នាក់​ដាក់​ពន្ធនាគារ​បណ្តោះអាសន្ន​ ក្រោមការចោទប្រកាន់​ពី​បទ​ហិង្សា​ដោយ​ចេតនា​ តាម​មាត្រា​២១៧នៃ​ក្រម​ព្រហ្មទណ្ឌ៕