(ភ្នំពេញ)៖ ការយឺតយ៉ាវ ក្នុងការនាំយកវត្ថុធាតុដើមមកផ្គត់ផ្គង់បានទាន់ពេលវេលា អាចធ្វើឲ្យរោងចក្រឧស្សាហ-កម្មទាំងអស់ រាំងស្ទះដំណើរការផលិតកម្មរបស់ខ្លួន។ ដើម្បីធានានិរន្តរភាពនៃផលិតកម្ម រោងចក្រស្រាបៀរកម្ពុជា មានមធ្យោបាយដឹកជញ្ជូនវត្ថុធាតុដើម មកកាន់រោងចក្រយ៉ាងទៀងទាត់ និងប្រកបដោយប្រសិទ្ធភាព ព្រមទាំងមានកន្លែងបម្រុងវត្ថុធាតុដើមយ៉ាងល្អ ជាពិសេសស្រូវសាលី ត្រូវបានរក្សាទុកក្នុងធុងផ្ទុកស្រូវសាលីធំៗ មកពីសហគមន៍អឺរ៉ុប។
តំណាងក្រុមហ៊ុនស្រាបៀរកម្ពុជា បានឲ្យដឹងថា «យើងមានប្រព័ន្ធធុងធំៗរៀបទុកដាក់ស្រូវសាលី គឺដើម្បីបញ្ជៀសពីការបំផ្លាញពីសត្វល្អិត ហើយនឹងការពារកុំឲ្យស្រូវសាលីវាសើម។ ទុកក្នុងធុងហ្នឹង គឺដើម្បីឲ្យសីតុណ្ហភាពធម្មតា កុំឲ្យស្រូវខូច ការពារកម្ដៅ ដែលប៉ះពាល់ស្រូវសាលីយើងឆាប់ខូច»។ រោងចក្រស្រាបៀរកម្ពុជាមានធុងផ្ទុកស្រូវសាលីធំៗចំនួន២៤ ហើយធុងនីមួយៗអាចផ្ទុកស្រូវសាលីបាន៥០០តោន។ ធុងផ្ទុកស្រូវសាលីត្រូវបាននាំមកពីសហគមន៍អឺរ៉ុប ដែលធន់នឹងអាកាសធាតុ និងអាចប្រើប្រាស់បានច្រើនទសវត្សរ៍។ ធុងស្រូវសាលីនេះ គឺនាំមកពីប្រទេសអាល្លឺម៉ង ដំឡើងដោយក្រុមហ៊ុនអាល្លឺម៉ង់ Kronez ហើយបច្ចេកវិទ្យា គឺរបស់ Kronez ដែរ ហើយសម្រាប់ការទុកដាក់ស្រូវសាលី ក្នុងរោងចក្រស្រាបៀរយើង គឺទុកដាក់ដូចនៅប្រទេសអឺរ៉ុបដទៃដែរ»។
ពេលស្រូវសាលីត្រូវបានដឹកតាមកុងទីណ័រ មកដល់រោងចក្រស្រាបៀរកម្ពុជា ស្រូវសាលីត្រូវបានបង្ហូរបញ្ចូលក្នុងអាងក្រោមដីមួយ។ មានប្រព័ន្ធបញ្ជូនស្រូវសាលី ចាប់ផ្ដើមចេញពីកុងទីណ័រ ដោយកុងទីណ័រនីមួយៗមានចំណុះ២៨តោន ចូលក្នុងប្រព័ន្ធ Platform សម្រាប់លើកទាំងកុងទីណ័រ ទាំងទូរ។ ខុសពីកន្លែងគេ កន្លែងយើងអាចលើកបានទាំងរថយន្ត ទាំងកុងទីណ័រ។
បន្ទាប់ពីស្រូវសាលី ត្រូវបានបង្ហូរចូលក្នុងអាងក្រោមដី ម៉ាស៊ីនយោងនឹងយោងស្រូវសាលីឡើងទៅលើ ហើយធ្វើការចែកចាយទៅកាន់ធុងផ្ទុកស្រូវសាលីនីមួយៗ ក្រោមការបញ្ជាពីកុំព្យទ័រក្នុងបន្ទប់បញ្ជា។ ម៉ាស៊ីនបញ្ជូនស្រូវសាលី ដែលដំណើរការដោយប្រព័ន្ធស្វ័យប្រវត្តិនេះ ជួយសម្រួលដល់កម្លាំងពលកម្មបានយ៉ាងច្រើន។
ក្នុងការបញ្ជូនស្រូវសាលី ទៅកិនដើម្បីផលិតស្រាបៀរ គេគ្រាន់តែបញ្ជាពីកុំព្យូទ័រ ក្នុងបន្ទប់បញ្ជាប្រព័ន្ធបញ្ជូនស្រូវសាលីដ៏ទំនើបនេះ នឹងបញ្ជូនស្រូវសាលី ពីក្នុងធុងផ្ទុកស្រូវសាលីមកកាន់ម៉ាស៊ីនកិន តាមចំណុះដែលត្រូវការ៕
