(ភ្នំពេញ)៖ នៅរសៀលថ្ងៃទី១០ ខែមីនា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នឹងអញ្ជើញចូលរួមក្នុងពិធីបុណ្យទន្លេ ប្រចាំឆ្នាំ ដែលប្រារព្ធឡើងរយៈពេល៣ថ្ងៃ នៅខេត្តកណ្តាល។ ជាមួយគ្នានេះ សម្តេចតេជោ ហ៊ុន សែ​ន បានអំពាវនាវដល់ប្រជាពលរដ្ឋនានា ឱ្យចូលរួមសប្បាយរីករាយជាមួយបុណ្យទន្លេលើកទី៤នេះ។

សម្តេចតេជោ ហ៊ុន សែន បានបញ្ជាក់នៅលើបណ្តាញសង្គម Facebook ​ឱ្យដឹងថា «នៅរសៀលថ្ងៃនេះដែរ ខ្ញុំនឹងទៅចូលរួមពិធីបុណ្យទន្លេនៅខេត្តកណ្តាល។ សូមអញ្ជើញបងប្អូនចូលរួមកំសាន្តសប្បាយទាំងអស់គ្នា។ ដើម្បីសុវត្ថិភាព​ សូមបើកបរគោរពច្បាប់ចរាចរណ៍ទាំងអស់គ្នា»

ក្នុងឱកាសនេះ សម្តេចតេជោ ក៏បានជូនពរជនរួមជាតិទាំងក្នុង និងក្រៅប្រទេស ឱ្យជួបតែ​សេចក្តីសុខ សំណាងល្អ ព្រមទាំងបានសប្បាយរីករាយនៅក្នុងថ្ងៃសម្រាកចុងសប្តាហ៍គ្រប់ៗគ្នា។ សម្តេចគូសបញ្ជាក់ថា ចំពោះធាតុអាកាសក្តៅបែបនេះ សមុទ្រគឺជាទីជម្រើសដ៏ល្អ។

សូមបញ្ជាក់ថា ពិធីបុណ្យទន្លេលើកទី៤ នៅឆ្នាំនេះ ត្រូវបានរៀបចំនៅខេត្តកណ្តាល រយៈពេល៣ថ្ងៃ ចាប់ពីថ្ងៃទី០៩ ដល់១១ ខែមីនា ឆ្នាំ២០១៨ ក្រោមប្រធានបទ «ទន្លេសន្តិភាព មិត្តភាព និងនិរន្តរភាពទេសចរណ៍»។​ បុណ្យនេះ ត្រូវបាន​ក្រសួង​ទេ​ចរណ៍​បាន​រៀបចំឡើង ដើម្បី​ជំរុញឲ្យ​មាន​កំណើន​ភ្ញៀវទេសចរ​ជាតិ និង​អន្តរជាតិ ទៅកាន់​ខេត្ត​នៅ​ដង​ទន្លេ នៃ​ប្រទេស​កម្ពុជា, លើកកម្ពស់ផលិតផលតាមដងទន្លេ និងលើកកម្ពស់ជីវភាព​របស់​ប្រជាពលរដ្ឋ​មាន​ភាពប្រសើរឡើង​ផងដែរ៕