(ភ្នំពេញ)៖ នាព្រឹកថ្ងៃទី១០ ខែមីនា ឆ្នាំ២០១៨ សាលារៀន New Gateway International School បានបន្ដរៀបចំកម្មវីធី ជំនួបរវាងមាតាបិតា អាណាព្យាបាលសិស្ស និងលោគ្រូ អ្នកគ្រូ ដើម្បីពង្រឹងការសិក្សា​របស់សិស្សានុសិស្ស ឲ្យកាន់តែប្រសើរឡើង មានន័យថាមានកម្មវិធីជំនួប​រវាង​មាតាបិតា អាណាព្យាបាលសិស្ស និងលោកគ្រូ អ្នកគ្រូនេះ គឺអាច​ឲ្យអាណាព្យាបាលសិស្ស បានដឹងពីចំណុចខ្វះខាត និងភាពខ្លាំងរបស់កូនខ្លួន និងធ្វើការកែរ​តម្រូវ និងបង្កើនឲ្យសិស្សកាន់តែរីកចម្រើន។

កម្មវិធីជំនួបរវាងមាតាបិតា អាណាព្យាបាលសិស្ស ជាមួយអ្នកគ្រូ លោកគ្រូនេះ ធ្វើឡើងក្រោមការចូលរួមពីអ្នកឧកញ៉ា ប៊ុន ណារី អគ្គនាយិកាសាលា New Gateway International School លោក ដាំ ភិរម្យ អគ្គនាយករងនៃសាលា New Gateway International School លោកគ្រូ អ្នកគ្រូ មាតាបិតា​សិស្ស និងសិស្សានុសិស្សជាច្រើនថែមទៀតផង។

អ្នកឧកញ៉ា ប៊ុន ណារី បានថ្លែងឲ្យដឹងថា សាលារៀនបានរៀបចំកម្មវិធីនេះឡើង ក្នុងគោលបំណងបង្កើនទំនាក់ទំនង និងកិច្ចសហការរវាងមាតាបិតា​សិស្ស ជាមួយគ្រូបង្រៀន ក្នុងការផ្លាស់ប្ដូរយោបល់គ្នាពីការរីកចម្រើន និងចំណុចដែលត្រូវរួមគ្នា យកចិត្តទុកដាក់កែលម្អ លើកង្វះខាតមួយចំនួន​របស់កូនៗ​ ក្នុងន័យធ្វើយ៉ាងណា ឲ្យពួកគាត់ទទួលបានចំណេះដឹង សីលធម៌-សុជីវធម៌ក្នុងការរស់នៅ ប្រកបដោយភាពថ្លៃថ្នូរ និងពង្រឹងការអប់រំ ឲ្យមានការ​អភិវឌ្ឍន៍កម្រិតខ្ពស់ផងដែរ។

អ្នកឧកញ៉ាបានបញ្ជាក់ទៀតថា ការជោគជ័យក្នុងការសិក្សារបស់សិស្ស មិនត្រូវពឹងផ្អែកតែនៅលើសាលាបង្រៀនមួយមុខទេ តែត្រូវទាមទារឲ្យមានការ​សហការ និងយកចិត្តទុកដាក់ខ្ពស់បំផុតពីសំណាក់មាតាបិតា និងអាណាព្យាបាលដោយមិនអាចខ្វះបាន។

សាលារៀន New Gateway International School បានជ្រើសរើសយកកម្មវិធីសិក្សា Cambridge ដែលជាកម្មវិធីសិក្សារបស់ចក្រភពអង់គ្លេសដ៏​ពេញនិយម និងប្រើប្រាស់នៅច្រើនប្រទេសទូទាំង​សកលលោក ហើយសិស្សានុសិស្សអាចទទួលបានគុណភាពអប់រំ និងការថែទាំក្នុងបរិយាកាសល្អ​បំផុត ដូចដែលពួកគេអាចស្វែងរកបាននៅចក្រភពអង់គ្លេសដែរ។

នៅក្នុងសាលា​កុមារមិនមែន​រៀនត្រឹមតែនិយាយ អាន និងសសេរភាសាអង់គ្លេស និងភាសាចិន ឲ្យបានត្រឹមត្រូវប៉ុណ្ណោះទេ តែពួកគេក៏បានរៀនអំពី
សីលធម៌ក្នុងការរស់នៅ, រៀនអំពីសង្គ ការបង្កើតទំនាក់ទំនងលើខ្លួនឯង ការថែសុខភាពខ្លួនឯង ការអភិវឌ្ឍរាងកាយ ការគ្រប់គ្រងអារម្មណ៍ ការយល់ដឹង​អំពីមនុស្ស​ និងបច្ចេកវិទ្យា ការស្រមើស្រមៃ និងភាពច្នៃប្រឌិត។

អ្នកឧកញ៉ា បានបញ្ជាក់ទៀតថា សាលាដែលមានគុណភាពពិតប្រាកដ គឺជាសាលាដែលយល់ដឹងយ៉ាងច្បាប់អំពីការអភិវឌ្ឍកុមារ និងតម្រូវ​ការ​ជាពិសសេស របស់ពួកគាត់ ហើយការរៀបចំអ្វីៗទាំងអស់ត្រូវឆ្លើយតបជាអភិភាព និងតម្រូវការទាំងនោះ៕