(ភ្នំពេញ)៖ នៅទីបំផុត! ក្រោយសវនាការពេញមួយព្រឹកថ្ងៃទី៩ ខែមីនា ឆ្នាំ២០១៨នេះ លោក ឃឹម ប៉ុណ្ណ អនុប្រធានតុលាការកំពូល សម្រេចតម្កល់សាលដីកាសាលាឧទ្ធរណ៍ទុកជាបានការដដែល ពោលគឺបន្តឃុំខ្លួនជនត្រូវចោទ កឹម សុខា អតីតប្រធានគណបក្សសង្រ្គោះជាតិ ក្នុងពន្ធនាគារ រង់ចាំតុលាការបន្តនីតិវិធី។ នេះបើតាមការបញ្ជាក់របស់មន្ត្រីជាន់ខ្ពស់តុលាការកំពូល ថ្លែងប្រាប់ភ្នាក់ងារអង្គភាពព័ត៌មាន Fresh News មុននេះបន្តិច។
លោក កឹម សុខា នៅថ្ងៃនេះ ពុំត្រូវបានដឹកបញ្ជូនពីពន្ធនាគារត្រពាំងផ្លុង នៃខេត្តត្បូងឃ្មុំ មកតុលាការកំពូល ដើម្បីចូលរួមសវនាការទេ។ មន្ត្រីតុលាការ បញ្ជាក់ថា នេះជាសវនាការមុនអង្គសេចក្តី ដោយដេញដោលតែលើអង្គច្បាប់ប៉ុណ្ណោះ ពុំមានវត្តមានជនត្រូវចោទក៏បាន។
លោក កឹម សុខា ត្រូវបានចោទប្រកាន់ពីបទ សន្ទិដ្ឋិភាពជាមួយបរទេស តាមមាត្រា ៤៤៣ នៃក្រមព្រហ្មទណ្ឌ។ បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ ដល់ ៣០ឆ្នាំ។
គួរបញ្ជាក់ថា លោក កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអាធ្រាត្រ ឈានចូលថ្ងៃទី៣ ខែកញ្ញា ឆ្នាំ២0១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ។ ហើយនៅថ្ងៃទី៤ ខែកញ្ញា ឆ្នាំ២០១៧ ព្រះរាជអាជ្ញា៣រូបបានទៅដល់ពន្ធនាគារត្រពាំងផ្លុង ដើម្បីសាកសួរលោក កឹម សុខា។ ការសាកសួរនោះ ក៏មានវត្តមានរបស់មេធាវីទាំង ៥រូប របស់លោក កឹម សុខា ដែរ៕
