(ភ្នំពេញ)៖ ចៅសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺកុមារី ហ៊ុន ពេជ្រមុន្នីលីណា បានជាប់ចំណាត់ថ្នាក់ជាសិស្សពូកែគណិតវិទ្យាលំដាប់ពិភពលោក។ ការប្រឡងគណិតវិទ្យាត្រូវបានធ្វើឡើងតាមរយៈកុំព្យូទ័រ ដោយមានសិស្សចូលរួមប្រកួតប្រជែងមកពីគ្រប់បណ្តាប្រទេសនៅលើពិភពលោក។

យោងតាមរយៈគេហទំព័រ worldmathsday (https://www.worldmathsday.com) បានបង្ហាញថា កុមារី ពេជ្រមុន្នីលីណា ជាសិស្សពូកែផ្នែកគណិតវិទ្យាមួយក្នុងចំណោមសិស្សពូកែៗមកពីជុំវិញពិភពលោក។ កុមារី ពេជ្រមុន្នីលីណា កាលពីខែមករា ឆ្នាំ២០១៨កន្លងទៅនេះ នាងដណ្តើមបានចំណាត់ថ្នាក់លេខ១ ក្នុងការប្រកួតប្រជែងគណិតវិទ្យាកម្រិតអាស៊ី ជាមួយពិន្ទុ ២,៣៥០ពិន្ទុ។

សូមបញ្ជាក់ថា កុមារី ហ៊ុន​ ពេជ្រមុន្នីលីណា គឺជាកូនស្រីទី២ របស់ឧត្តមសេនីយ៍ឯក ហ៊ុន ម៉ាណែត និងលោកស្រី ពេជ ចន្ទមុន្នី។ ការដណ្តើមបានចំណាត់ថ្នាក់លេខ៤ នៅកម្រិតពិភពលោក និងចំណាត់ថ្នាក់លេខ១នៅកម្រិតអាស៊ីពីការប្រកួតគណិតវិទ្យា របស់កុមារី ហ៊ុន​ ពេជ្រមុន្នីលីណា បានបង្ហាញនូវត្តមានកុមារីកម្ពុជាដំបូងគេនៅក្នុងតារាងនៃការប្រកួតប្រជែងគណិតវិទ្យាលើគេហទំព័រប្រឡងគណិតវិទ្យាលំដាប់ពិភពលោក។

ជ័យជម្នះនេះ ក៏ជាមោទនភាពមួយផងដែរសម្រាប់កុមារកម្ពុជា ហើយក៏ជាបង្ហាញថា កុមារកម្ពុជា មានសមត្ថភាពខ្ពស់មិនចាញ់បណ្តាប្រទេសដែលល្បាញល្បី និងជឿនលឿនលើពិភពលោកនោះឡើយ។ ជោគជ័យរបស់កុមារី ពេជ្រមុន្នីលីណា ក៏បានបង្ហាញថា កម្រិតនៃការអប់រំរបស់កម្ពុជានាពេលបច្ចុប្បន្នកំពុងតែមានភាពល្អប្រសើរផងដែរ៕