(ភ្នំពេញ)៖ ផលិតករភាពយន្តខ្មែរ លោក សែម វិសាល ត្រូវបានគេស្គាល់ថា ជាចាងហ្វាងផលិតកម្ម «វ័នឌើហ្វីមល៍» បានសម្ដែងក្ដីបារម្ភ ចំពោះភាពយន្តខ្មែរ ដែលកំពុងតែមានការប្រកួតប្រជែងយ៉ាងខ្លាំង ជាមួយនឹងភាពយន្តបរទេស ដោយបានហូរចូលជារៀងរាល់ថ្ងៃ ជាពិសេសការពង្រឹងទៅលើគុណភាព ការចំណាយដើមទុន ការជ្រើសរើសតួសម្ដែង និងបច្ចេកទេសនៃផលិតសាច់រឿង ពោលគឺវិស័យភាពយន្តខ្មែរ ហាក់នៅក្នុងស្ថានភាពមួយ ឃ្លេងឃ្លោងនៅឡើយ បើទោះបីជាផលិតករមួយចំនួន ខំចំណាយនូវធនធាន របស់ខ្លួនជាច្រើន ដើម្បីផលិតរឿងដាក់បញ្ចាំង នៅលើទីផ្សារក្ដី។
ការថ្លែងបែបនេះ ពីសំណាក់ម្ចាស់ផលិតកម្មលោក សែម វិសាល ត្រូវបានធ្វើឡើង នៅក្នុងកម្មពិធីសម្ពោធរឿង «ផ្ទះចិញ្ចឹមខ្មោច» ត្រូវបានធ្វើឡើង កាលពីល្ងាចថ្ងៃទី០៧ ខែមិនា នៅរោងភាពយន្ត Major ផ្សារទំនើបសុរិយា ដោយមានការអញ្ជើញចូលរួម ពីសំណាក់សិល្បករ-សិល្បការិនី ជាច្រើនរូប ជាពិសេសមានការចូលរួមជាភ្ញៀវកិត្តិយស ពីសំណាក់លោក ឆាយ បូរ៉ា ដែលត្រូវបានគេស្គាល់ថា ជាប្រធានសមាគមភាពយន្ត និង ស៊ិន ច័ន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ ក៏បានចូលរួមនៅក្នុងកម្មវិធីមួយនេះ ផងដែរ។
លោក សែម វិសាល បានបង្ហាញនូវចំណុចខ្លះៗ នៅក្នុងកម្មវិធីសសម្ពោធរឿងរបស់ខ្លួនថា «ជាការពិតណាស់! ក្នុងនាមខ្ញុំបាទជាសមាជិក របស់សមាគមភាពយន្ត ខ្ញុំសូមអរគុណដល់ផលិតករគ្រប់រូប ដែលបានចំណាយដើមទុនផ្ទាល់ខ្លួន វិនិយោគទុន ក៏ដូចជាពេលវេលា និងខិតខំប្រើប្រាស់វិជ្ជាជីវៈ ដើម្បីធ្វើឲ្យវិស័យភាពយន្ត នៅកម្ពុជា មានភាពរីកចម្រើន ពីមួយថ្ងៃទៅមួយថ្ងៃ។ ប៉ុន្តែយ៉ាងណាមិញ ដូចយើងបានដឹងស្រាប់ហើយថា វិស័យភាពយន្តនៅប្រទេសកម្ពុជា បើនិយាយពីការចុះទុនពីដំបូង ត្រូវត្រៀមខ្លួនឲ្យហើយទុកមុន ពីព្រោះវិស័យរបស់យើង ហាក់នៅមានភាពឃ្លេងឃ្លោងៗ ពោលគឺមិនទាន់មានលំនឹងច្បាស់លាស់នៅឡើយទេ ប្រសិនបើអ្នកចូលទស្សនា មានចំនួនតិច នោះហានិភ័យ កាន់តែមានខ្ពស់ ដូច្នេះហើយ បើសិនជាចង់ឲ្យវិស័យភាពយន្តខ្មែរ នៅប្រទេសកម្ពុជា មានភាពរីកចម្រើនទៅមុខ សូមមហាជនចូលរួមលើកស្ទួយវិស័យវប្បធម៌ ទាំងអស់គ្នា»។
សូមបញ្ជាក់ថា ភាពយន្តរឿង «ផ្ទះចិញ្ចឹមខ្មោច» មានការចូលរួមសម្ដែងដោយតារាល្បីៗ ជាច្រើនដួងរួមមាន កញ្ញា ដេននី ក្វាន់, នាយ គ្រឿន , នាយ BIG ព្រមទាំងតារាសម្ដែងក្មេងចាស់ជាច្រើនដួងទៀត។ រឿង «ផ្ទះចិញ្ចឹមខ្មោច» នឹងចាប់ផ្ដើមបើកលក់ សំបុត្របើកឲ្យចូលទស្សនា ចាប់ពីថ្ងៃទី០៨ ខែមីនា ឆ្នាំ២០១៨នេះ តទៅ៕
