(កណ្ដាល)៖ អនុគណៈកម្មការសន្ដិសុខ និងសង្គ្រោះ នៅព្រឹកថ្ងៃទី០៥ ខែមីនា ឆ្នាំ២០១៨នេះ បន្ដបើកកិច្ចប្រជុំស្តីពីផែនការការពារ សុវត្ថិភាព សន្តិសុខ និងសណ្តាប់ធ្នាប់ ក្នុងឱកាសពិធីបុណ្យទន្លេឆ្នាំ២០១៨ ក្រោមអធិបតីភាពលោកឧត្តមសេនីយ៍ឯក​ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស។

កិច្ចប្រជុំនេះ ប្រព្រឹត្តទៅនៅស្នងការដ្ឋាននគរបាលខេត្តកណ្ដាល ដោយមានការចួលរួម​ពីក្រសួងពាក់ព័ន្ធ និងមន្ទីរជុំវិញខេត្ត លោកឧត្តមសេនីយ៍ទោ អ៊ាវ ចំរើន ស្នងការនគរ​បាលខេត្ត ស្នងការរង អធិការនគរបាលស្រុក-ក្រុងទាំង១១ ក្នុងខេត្តកណ្ដាល កងរាជអាវុធ​ហត្ថ និងយោធាជាច្រើនរូបទៀត។

បុណ្យទន្លេ ត្រូវបានសម្រេចឡើងដោយរាជរដ្ឋាភិបាលកម្ពុជា ដោយសម្រេចយកសប្តាហ៍ទី១ ឬទី២ ក្នុងខែមិនា។ បុណ្យទន្លេ បានក្លាយជាព្រឹត្តិការណ៍ទេសចរណ៍ ក្នុងយុទ្ធនាការផ្សព្វផ្សាយអាស៊ានផងដែរ ហើយវាជាផលិតផលទេសចរណ៍ ឆ្លើយតបនឹងក្របខណ្ឌនយោបាយយុទ្ធសាស្ត្រ នៃកិច្ចសហប្រតិបត្តិការមេគង្គ-ឡាងឆាង មហាអនុតំបន់មេគង្គអាស៊ាន មេគង្គ-គង្គា។

សូមជម្រាបថា ពិធីបុណ្យទន្លេលើកទី៤ នៅក្រុងតាខ្មៅ នឹងធ្វើឡើង ក្រោមអធិបតីភាពរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រយៈពេល៣ថ្ងៃ ចាប់ពីថ្ងៃទី០៩-១១ ខែមីនា ឆ្នាំ២០១៨ ជាមួយការរំពឹងទុកថា នឹងមានភ្ញៀវទេសចរចូលរួមទស្សនាប្រមាណជាង ១លាននាក់។

ដើម្បីបង្កើនការប្រុងប្រយ័ត្នដល់ប្រជាពលរដ្ឋដែល​ទៅចូលរួមលេងកំសាន្ដ នាឱកាសបុណ្យទន្លេ នៅខេត្តកណ្ដាលនោះ នាយកដ្ឋាននគរបាលព្រហ្មទណ្ឌ​ ក្រសួងមហាផ្ទៃ បានបង្ហាញលេខទូរស័ព្ទពិសេស៦ខ្សែ​ ដើម្បី​ឲ្យប្រជាពលរដ្ឋរាយការណ៍មុខសញ្ញាផ្សេងៗ ដែលទាក់ទងនឹងករណីចោរលួច ឆក់ ដាក់ថ្នាំសណ្តំ ឬករណីផ្សេងៗទៀត ដែលអាចកើតមានឡើង។

ប្រជាពលរដ្ឋទាំងអស់​អាចទំនាក់ទំនងទៅកាន់​នគរបាលព្រហ្មទណ្ឌ តាមរយៈលេខទូរស័ព្ទចំនួន៦ខ្សែ រួមមាន៖ 117, ​740, 741, 742, 743 និង 744៕