(ភ្នំពេញ)៖ លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បានព្រមានពីហានីភ័យនៃការយកលុយទិញលុយ​អេឡិចត្រូនិក ពពួក Bitcon ដើម្បីចង់បានផលចំណេញខ្ពស់ ដោយលោកបានសំអាងថា ប្រសិនបើសាធារណជនទាំងអស់គ្នា មិនបានដឹងច្បាស់ លុយអេឡិត្រូនិចនេះទេ សូមកុំប្រថុយប្រថាន ទៅលើការជួញដូរឲ្យសោះ។

ថ្លែងប្រាប់បណ្ដាយសារព័ត៌មាន Fresh News លោកបានលើកឡើងថា «គណៈកម្មការមូលបត្រកម្ពុជា សុំមិនលើកទឹកចិត្ត ឲ្យសាធារណជនទាំងអស់គ្នា ​ធ្វើការជួញដូរលើលុយអេឡិចត្រូនិចនេះទេ សូមឲ្យមានការប្រុងប្រយ័ត្ន ព្រោះអាចប្រឈមនឹងការខាតបង់ប្រាក់កាស ​តាមរយៈការជួញដូរពពួកលុយអេឡិចត្រូនិចនេះ ព្រោះសាធារណជនធ្វើការជួយដូរទៅលើអ្វី ដែលអ្នកមិនបានស្គាល់ច្បាស់ ព្រមជាមួយការ​មិនទាន់ទទួលស្គាល់...»។

លោក ស៊ូ សុជាតិ បានបញ្ជាក់ទៀតថា ការជួញដូរទៅលើលុយអេឡិចត្រូនិចនេះ ជាការជួញដូរដែលមិនច្បាស់លាស់ មិនទាន់មានការសិក្សាច្បាស់ ដូច្នេះសារធារណជនគួរតែជៀសវាង ឲ្យផុតពីការជួញដូរនេះ រហូតដល់មានបទបញ្ញត្តិជាក់ស្ដែងណាមួយ ទើបអាចចាប់ផ្ដើមធានា និងជួញដូរបាន តែ​ការធានានោះគ្រាន់តែជាការធានាថា ជាកាវិនិយោគមួយអាចមានខាត និងមានចំណេញ ប៉ុន្ដែក្នុងពេលនេះ សម្រាប់គណៈកម្មការមូលបត្រកម្ពុជា សូម​មិនលើកទឹកចិត្តឲ្យ មានការជួញដូរនោះទេ និងសូមស្នើដល់សាធារណជន មានការប្រុងប្រយ័ត្នផងដែរ៕