(ភ្នំពេញ)៖ បន្ទាប់ពីបានដំណើរការសាងសង់វិមានឈ្នះឈ្នះ អស់រយៈពេល២ឆ្នាំរួចមក នៅថ្ងៃទី0៤ ខែមីនា ឆ្នាំ២០១៨នេះ សំណង់វិមានឈ្នះឈ្នះបានចាប់ផ្តើមបំពាក់រូបចម្លាក់ មានដូចជារូបចម្លាក់ដំរីក្បាលបី រូបគ្រុឌ និងរូបហង្សនៅពីលើដំរីក្បាលបីហើយ។ នៅក្នុងពិធីលើកដាក់រូបចម្លាក់ដំរីក្បាលបី រូបគ្រុឌ រូបហង្ស នាពេលនេះ មានការចូលរួមពីនាយឧត្តមសេនីយ៍ ណឹម សុវត្ថិ ប្រធានក្រុមការងារសិក្សាស្រាវជ្រាវ និងសាងសង់វិមានឈ្នះឈ្នះ ស្ថាបត្យករ ខឹម សុខ វរវិចិត្រករ អ៊ុត រឿន និងក្រុមការងារជាច្រើនរូបទៀត។
លោក ណឹម សុវត្ថិ បានឲ្យដឹងថា ដោយមានការណែនាំពីសម្តេចពិជ័យសេនា ទៀ បាញ់ ឧនាយករដ្ឋមន្ត្រី រដ្ឋមន្ត្រីក្រសួងការពារជាតិ ក្រុមការងារសាងសង់វិមានឈ្នះឈ្នះ បានចុះមករៀបចំវាយតម្លៃការសាងសង់សំណង់វិមានឈ្នះឈ្នះបង្ហើយ ក្នុងដំណាក់កាលទី២ និងបន្តការងារសាងសង់ដំណាក់កាលទី៣ ការចាក់ដីបំពេញទីធ្លារ ការបំពាក់រូបចម្លាក់ដំរីក្បាលបី រូបគ្រុឌ និងរូបហង្ស នៅតាមចែងនៃខឿនសំណង់វិមានឈ្នះឈ្នះ ព្រមទាំងសសរពេជ្រនៅក្លោងទ្វារ បន្ទាប់ពីក្រុមការងារសាងសង់វិមានឈ្នះឈ្នះ បានបំពាក់សិលាចារឹក និងផ្តែរលើក្លោងទ្វាររួចមក ដើម្បីដាក់ឆ្លងកិច្ចប្រជុំគណៈកម្មាការសាងសង់វិមានឈ្នះឈ្នះ ដែលនឹងប្រារព្ធធ្វើនៅថ្ងៃទី០៦ ខែមីនា ឆ្នាំ២០១៨ ខាងមុខនេះ ក្រោមអធិបតីភាពសម្តេចពិជ័យសេនា ទៀ បាញ់។
លោក ណឹម សុវត្ថិ បានបញ្ជាក់ថា ការបំពាក់រូបចម្លាក់លើសំណង់វិមានឈ្នះឈ្នះ នាពេលនេះ បានមកពីការខិតខំសិក្សាស្រាវជ្រាវយ៉ាងយកចិត្តទុកដាក់ អំពីប្រវត្តិសាស្ត្រ និងរចនាបថនៅតាមប្រាង្គប្រាសាទបុរាណនានា នៅតាមសម័យកាលនីមួយៗ ឲ្យសមស្របទៅនឹងទស្សនវិស័យនៃសន្តិភាព។
ចំពោះខ្លឹមសារនៃរូបចម្លាក់ដែលបានបំពាក់នៅលើវិមានឈ្នះឈ្នះ នាពេលនេះ រូបហង្ស គឺជាស្តេចនៃបក្សីសួគ៌ និងជានិមិត្តរូបនៃសេចក្តីចម្រុងចម្រើន ឬភាពសម្បូរខាងទ្រព្យធនធាន។ រូបគ្រុឌ ជានិមិត្តរូបនៃកម្លាំងដ៏មហិមា ល្បឿនលឿនឆ្ពោះទៅមុខ រីឯដំរីក្បាលបី ជាយានជំនិះរបស់ព្រះឥន្ទដែលជាស្តេចនៃឋានសួគ៌ ជាទេពនៃទិសខាងកើត។ ដំរីក្បាលបី មានឈ្មោះថា Ariravata ដែលជាវត្ថុពិសិដ្ឋមួយ កើតចេញមកពីការកូរសមុទ្រទឹកដោះ រវាងពួកយក្ស និងពួកទេព។ លើសពីនេះទៅទៀត គឺដំរីក្បាលបីមាននាទីជាអ្នកយាមទ្វារព្រះរាជវាំងរបស់ព្រះឥន្ទ។ ការផ្តុំរូបទាំងបីនេះ ក៏ជានិមិត្តរូប ដី អាកាស និងឋានសួគ៌ផងដែរ។ ការបំពាក់រូបចម្លាក់ដំរីក្បាលបី ដែលមានរូបគ្រុឌ និងរូបហង្សនៅពីលើ នាពេលនោះ មានការចាប់អារម្មណណ៍ និងការចូលរួមទស្សនាពីភ្ញៀវទេសចរ និងនិស្សិត បញ្ញាវ័ន្ត ដែលបានស្វ័យចូលរួមដោយស្ម័គ្រ និងមានការចូលរួមពីអ្នកសារព័ត៌មានអន្តរជាតិទៀតផង។
សូមបញ្ជាក់ថា ការសាងសង់វិមានឈ្នះឈ្នះ បានចាប់ផ្តើមក្រោមគំនិតផ្តួចផ្តើម ប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងការចង្អុលបង្ហាញណែនាំដោយផ្ទាល់ របស់សម្តេចពិជ័យសេនា ទៀ បាញ់ តាមការប្រគល់ភារកិច្ចជាក់ស្តែងរបស់រាជរដ្ឋាភិបាល។
វិមានឈ្នះឈ្នះ ដែលបានសាងសង់ឡើងនាពេលនេះ មានអត្ថន័យធំធេងណាស់ ហើយគ្របដណ្តប់ទូទៅទៀតផង ដែលមានគោលបំណងដើម្បីរំឭកដល់ជ័យជំនះ នៃការបញ្ចប់សង្គ្រាមបានទទួលនូវការឯកភាព និងទទួលបានសន្តិភាព ដោយសន្តិវិធីបានផ្តល់សិទ្ធិមនុស្ស សុខសន្តិភាពផ្លូវច្បាប់ ដែលជាកេរ្តិ៍ដំណែលនៃប្រវត្តិសាស្រ្ត សម្រាប់អ្នកជំនាន់ក្រោយមកទស្សនា បានយល់ដឹងពីតម្លៃនៃសុខសន្តិភាព ដែលកម្ពុជាកំពុងទទួលបានរហូតដល់សព្វថ្ងៃនេះ។
សំណង់វិមានឈ្នះឈ្នះ មានទីតាំងស្ថិតនៅសង្កាត់បាក់ខែង ខណ្ឌជ្រោយចង្វា រាជធាភ្នំពេញ ទល់មុខពហុកីឡដ្ឋានជាតិ «មរតកតេជោ» ក្នុងតំបន់អភិវឌ្ឍន៍ លី យ៉ុងផាត់៕
