(ព្រះសីហនុ)៖ ប្រមុខរាជរដ្ឋាភិបាលកម្ពុជាដែលតែងតម្កល់ប្រយោជន៍ប្រជាជនក្នុងក្រអៅបេះដូងសម្តេចតេជោ ហ៊ុន សែន នៅព្រឹកថ្ងៃអាទិត្យ ៣រោច ខែផល្គុន ឆ្នាំរកា នព្វស័ក្តិ ព.ស២៥៦១ ត្រូវនឹងថ្ងៃទី០៤ ខែមីនា ឆ្នាំ២០១៨ស្អែកនេះ នឹងបន្តជួបសំណេះសំណាលជាមួយបងប្អូនកម្មករ និយោជិតសរុបប្រមាណ ១៤,០២៥នាក់ មកពីរោងចក្រ សហគ្រាសចំនួន១៤ នៅក្នុងខេត្តព្រះសីហនុ។

ជំនួបនៅថ្ងៃស្អែកនេះ គឺជាជំនួបលើកទី២របស់សម្តេចតេជោជាមួយកម្មករ និយោជិត នៅក្នុងខេត្តព្រះសីហនុ ខណៈដែលព្រឹកថ្ងៃទី៣ ខែមីនា សម្តេចបានជួបសំណេះសំណាលជាមួយកម្មករ និយោជិតជាង ២ម៉ឺននាក់មកពីរោងចក្រចំនួន៧៧ ក្នុងតំបន់សេដ្ឋកិច្ចពិសេសក្រុងព្រះសីហនុ។

ជំនួបជាមួយកម្មករ និយោជិតនៅតំបន់សេដ្ឋកិច្ចពិសេសនាថ្ងៃស្អែកនេះ គឺជាជំនួបទី៣៣ហើយចាប់តាំងពីថ្ងៃទី២០ ខែសីហា ឆ្នាំ២០១៧មកនោះ។ លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យអង្គភាពព័ត៌មាន Fresh News ដឹងថា ជំនួបទាំង៣៣លើកនេះ មានកម្មករ និយោជិតសរុបជិត ៤០ម៉ឺនដែលបានជួបសំណេះសំណាលជាមួយសម្តេច។

លោករដ្ឋមន្ត្រី បានបញ្ជាក់ថា រោងចក្រ សហគ្រាសទាំង១៤ ដែលកម្មករ និយោជិតមកជួបសំណេះសំណាលជាមួយសម្តេចនៅថ្ងៃស្អែកនេះ មានអ្នកវិនិយោគមកពីប្រទេសចិនចំនួន៧ បារាំងចំនួន១ ជប៉ុនចំនួន២ អាមេរិកចំនួន៣ និងកំពង់ស្វយ័តក្រុងព្រះសីហនុ។ បើតាមលោក អ៉ិត សំហេង រោងចក្រទាំងនេះ មានរោងចក្រកាត់ដេរសម្លៀកបំពាក់ចំនួន៤ ផលិតស្បែកជើងចំនួន១ ផលិតកាបូបចំនួន២ ផលិតសម្ភារកីឡាចំនួន១ ជ្រលក់ពណ៌ក្រណាត់ចំនួន១ ផលិតគ្រឿងសំអាងចំនួន១ ផលិតកេសកាតុងចំនួន១ ផលិតកំប៉ុងចំនួន១ ផលិតសាឡុងចំនួន១។ ផលិតផលទាំងនេះ ត្រូវបាននាំចេញទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងប្រទេស។

លោករដ្ឋមន្ត្រីដែលជាសេនាធិការដ៏ឆ្នើមរបស់សម្តេចតេជោ ហ៊ុន សែន លើវិស័យការងារនេះ បានគូសបញ្ជាក់ដែរថា ខេត្តព្រះសីហនុ ជាខេត្តដែលមានការអភិវឌ្ឍលឿន ដែលមានកំពង់ផែអន្តរជាតិ តំបន់សេដ្ឋកិច្ចពិសេស ព្រលានយន្តហោះអន្តរជាតិ និងសក្តានុពលទេសចរណ៍។ មកដល់ពេលបច្ចុប្បន្នខេត្តព្រះសីហនុ មានរោងចក្រ សហគ្រាស គ្រឹះស្ថានចំនួន ៧១១ មានកម្មករនិយោជិតចំនួន ៤៩,៦៨៨នាក់ ក្នុងនោះរោងចក្រកាត់ដេរសម្លៀកបំពាក់ និងផលិតស្បែកជើងមាន ១០៦ មានកម្មករនិយោជិតចំនួន ៣៥,២១៦នាក់។

លោក អ៉ិត សំហេង បានចាត់ទុកការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ គឺជាជោគជ័យនៃគោលនយោបាយទាក់ទាញវិនិយោគ បង្កើតការងារជូនកម្មករ និយោជិតរបស់រាជរដ្ឋាភិបាល និងជាជោគជ័យក្នុងការអនុវត្តគោលនយោបាយជាតិស្តីពីមុខរបរ និងការងារ, គោលនយោបាយអភិវឌ្ឍន៍វិស័យឧស្សាហកម្មកម្ពុជា, គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម ដែលបាននឹងកំពុងប្រែក្លាយខេត្តព្រះសីហនុទៅជាប៉ូលសេដ្ឋកិច្ចរបស់កម្ពុជា និងជាផ្លែផ្កានៃកិច្ចសហប្រតិបត្តិការដៃគូជាយុទ្ធសាស្រ្តគ្រប់ជ្រុងជ្រោយកម្ពុជា-ចិន។

សូមរំលឹកថា តាមរយៈជំនួបជាបន្តបន្ទាប់ជាមួយនឹងកម្មករ និយោជិត សម្តេចតេជោ ហ៊ុន សែន បានរកឃើញបញ្ហាជាច្រើនដែលកំពុងប្រឈមសម្រាប់កម្មករ និយោជិត ហើយបានសម្រេចដាក់ចេញនូវគោលការណ៍ជាច្រើននាំមកនូវប្រយោជន៍សម្រាប់កម្មករផងដែរ ដូចជាការលែងឲ្យកម្មករបង់ថ្លៃសេវាគាំពារសុខភាព អនុញ្ញាតឲ្យកម្មករ និយោជិតពិនិត្យព្យាបាលជំងឺនៅមន្ទីរពេទ្យរដ្ឋមិនគិតថ្លៃ និងផ្តល់ប្រាក់ឧបត្ថម្ភសម្រាប់កម្មការិនីពេលសម្រាលកូនជាដើម។

គ្រប់ជំនួបរបស់សម្តេចតេជោ ហ៊ុន សែន គឺទទួលបានការស្វាគមន៍ប្រកបដោយក្តីគោរពស្រឡាញ់ពីសំណាក់កម្មករ និយោជិត។ លោក អ៉ិត សំហេង បានចាត់ទុកសម្តេចតេជោ គឺជារដ្ឋបុរសដែលបានសង្គ្រោះជាតិពីរបបប្រល័យពូជសាសន៍ថ្ងៃ៧ មករា ឆ្នាំ១៩៧៩ សម្រេចបាននូវកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ បង្រួបបង្រួមផ្សះផ្សារជាតិ ជាស្ថាបនិកនៃនយោបាយឈ្នះ-ឈ្នះ ទទួលបានជោគជ័យនាថ្ងៃ២៩ ធ្នូ ឆ្នាំ១៩៩៨ បានធ្វើឲ្យទឹកដីទាំងមូលឯកភាពប្រកបដោយសន្តិភាព និងស្ថិរភាព ដែលជាគន្លឹះនៃការអភិវឌ្ឍជាតិ និងជំរុញជីវភាពប្រជាពលរដ្ឋខ្មែរឲ្យកាន់តែល្អប្រសើរ៕