(ភ្នំពេញ)៖ បុរសជនជាតិចិនម្នាក់ រថយន្តស៊េរីទំនើបមួយគ្រឿង ម៉ាក Luxes RX330 បុករ៉ឺម៉កកង់បីរបស់ក្រុមហ៊ុន Passapp ក្រឡាប់ផ្អៀងជើង បណ្តាលឲ្យឪពុករបួសស្រាល និងកូនប្រុសរបួសធ្ងន់ នៅថ្ងៃទី០៣ ខែមីនា ឆ្នាំ២០១៨នេះ ស្ថិតតាមបណ្តោយមហាវិថីអង្គរ ចំណុចមុខបុរីអង្គរភ្នំពេញ ក្នុងភូមិបឹងរាំង សង្កាត់ទួលសង្កែទី២ ខណ្ឌឬស្សីកែវ។
ប្រភពព័ត៌មាននៅកន្លែងកើតហេតុឲ្យដឹងផ្សេងគ្នា ដោយអ្នកខ្លះថា រថយន្ត និងរ៉ឺម៉កកង់បីខាងលើបើកស្របទិសគ្នា ពីត្បូងទៅជើងតាមមហាវិថីអង្គរ ដោយរថយន្តបើកខាងឆ្វេង ប្រដំប្រសងគ្នា តែរ៉ឺម៉កបើកមុខបន្តិច លុះមកមកដល់ចំណុចកើតហេតុ រ៉ឺម៉កបត់ឆ្វេងឆ្លងផ្លូវ ក៏ត្រូវរថយន្តបុកចំពីខាងឆ្វេង បណ្តាលឲ្យក្រឡាប់ផ្អៀងជើងតែម្តង។
ចំណែកសមត្ថកិច្ចដែលទៅដល់កន្លែងកើតហេតុ ឲ្យដឹងថា រ៉ឺម៉កកង់បីបើកឆ្លងផ្លូវពីកើតទៅលិច ហើយត្រូវរថយន្តបើកក្នុងល្បឿនលឿន គួរសមដែលបើកពីត្បូងទៅជើង មកដល់ចំណុចកើតហេតុ បានបុករ៉ឺម៉កផ្នែកខាងក្រោយ ចំជ្រុងខាងឆ្វេង ខណៈដែលរ៉ឹម៉ក កំពុងបត់ឆ្លងផ្លូវ បណ្តាលឲ្យក្រឡាប់ផ្អៀងតែម្តង។
សមត្ថកិច្ចបញ្ជាក់ថា រថយន្តបង្ក ម៉ាក Luxes RX330 ពណ៌ទឹកប្រាក់ពាក់ស្លាកលេខភ្នំពេញ2AS-9120 បើកដោយបុរសជនជាតិចិន ឈ្មោះ CHANG CHUNCHE រីឯរ៉ឺម៉ករងគ្រោះ ពណ៌ស ពាក់ស្លាកលេខភ្នំពេញ1GW-4724 បើកដោយឪពុក និងរួមដំណើរដោយកូនប្រុសម្នាក់ អាយុប្រហែល១០ឆ្នាំ ដែលក្មេងនោះរបួសធ្ងន់ធ្ងរ បាក់ជើងឆ្វេងដៃឆ្វេង និងរបួសក្បាល តែភាគីរថយន្តក៏បានឈឺឆ្អាលក្នះខ្នែងយកចិត្តទុកដាក់ក្នុងរឿងនេះដែរ។
ក្រោយកើតហេតុបុរសជាឪពុកបានយកកូនទៅពេទ្យ រីឯវត្ថុតាង ត្រូវបានសមត្ថកិច្ចមូលដ្ឋានទាក់ទងជំនាញ មកធ្វើការវាស់វែងយកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំភាគីទាំង២ចូលខ្លួនដោះស្រាយនៅពេលក្រោយ៕
