(ភ្នំពេញ)៖ បុរីកាំកូស៊ីតធី នៅថ្ងៃទី០៣ ខែមីនា ឆ្នាំ២០១៨នេះ បានចេញបកស្រាយជុំវិញ ការសាងសង់ទួលកាត់ទទឹងផ្លូវ នៅតាមបណ្ដោយផ្លូវច្រកចូលកាំកូស៊ីធី ដែលត្រូវបានអាជ្ញាធរខណ្ឌឬស្សីកែវ ចុះវាយកម្ទេចនៅល្ងាចម្សិលមិញនេះ ក្រោមហេតុផលថា ការសាងសង់ទួលនេះ តែងតែបង្កគ្រោះថ្នាក់ចរាចរណ៍ ដល់អ្នកធ្វើដំណើរជារឿយៗ។
ប៉ុន្ដែជាយ៉ាងណា ក្រុមហ៊ុនបុរីកាំកូស៊ីតធី សុំបកស្រាយពីហេតុផលដែលខ្លួនសាងសង់ថា ផ្លូវនេះគឺជាផ្លូវត្រង់ ហើយមានរថយន្ត និងម៉ូតូជាច្រើន បានបើកក្នុងល្បឿនលឿន ព្រមទាំងបង្កឲ្យមាននូវសម្លេងរំខាន មួយទៀតដើម្បីសុវត្ថិភាពរបស់ប្រជាជនស្នាក់នៅក្នុងទីក្រុងកាំកូស៊ីធី ព្រោះក្នុងបុរីនេះមានប្រជាជនរស់នៅប្រហែលជាង១,៥០០នាក់។
បន្ទាប់ពីតម្លើងទួលនេះ ក្រុមហ៊ុនក៏បានដាក់នូវ សញ្ញាបន្ថយល្បឿននៅជុំវិញផ្លូវផងដែរ ប៉ុន្តែអ្នកបើកបរជាច្រើនមិនបានអើពើពីសញ្ញាទាំងនេះនោះទេ ហើយនៅតែបើក្នុងល្បឿនលឿនដដែល ដូច្នេះជាហេតុដែលនាំឲ្យមានករណីគ្រោះថ្នាក់ចរាចរណ៍កើតឡើង។
បើតាមតំណាងក្រុមហ៊ុនបុរីកាំកូស៊ីតធី មុនពេលតម្លើងទួលនេះ ក្រុមហ៊ុនបានធ្វើការសិក្សានៅតាមបុរីជាច្រើន ដែលបានតម្លើងទួលបន្ថយល្បឿនដែរ ដែលបុរីទាំងនោះបានតម្លើងក្នុងគោលបំណងធានា សុវត្ថិភាពដល់ការបើកបរ។ មួយវិញទៀត ក្រុមហ៊ុនធ្លាប់បានចូលរួមប្រជុំជាមួយអភិបាលរងរាជធានីភ្នំពេញ កាលនៅថ្ងៃទី០១ ខែមីនា ឆ្នាំ២០១៨ ហើយបានធ្វើការពន្យល់អភិបាលរងភ្នំពេញ យ៉ាងលម្អិតអំពីមូលហេតុក្នុងការតម្លើងទួលបន្ថយល្បឿននេះ។
សូមជម្រាបថា កាលពីម្សិលមិញ អភិបាលរាជធានីភ្នំពេញ លោក ឃួង ស្រេង និងអភិបាលខណ្ឌឬស្សីកែវ លោក ជា ពិសី បានបញ្ជាកម្លាំងសមត្ថកិច្ចអាជ្ញាធរ ចុះវាយកម្ទេចទួលកាត់ទទឹងផ្លូវភ្លោះ នៅខាងជើងបុរីកាំកូស៊ីធី ស្ថិតក្នុងភូមិបឹងរាំង សង្កាត់ទួលសង្កែទី២ ខណ្ឌឬស្សីកែវ ដែលតែងតែបង្កគ្រោះថ្នាក់ចរាចរណ៍ ដល់អ្នកធ្វើដំណើរជារឿយៗ។
ជាក់ស្ដែងនៅរសៀលថ្ងៃទី០២ ខែមីនា ឆ្នាំ២០១៨ លោក ប្រាជ្ញា សីហា អភិបាលរងខណ្ឌឬស្សីកែវ បានដឹកនាំចម្រុះមានទាំងនគរបាល អាវុធហត្ថ និងកម្លាំងប្រជាការពារ ចុះវាយកម្ទេចទួលដែលតែងតែបង្កគ្រោះថ្នាក់នេះតែម្ដង ប៉ុន្ដែក្នុងប្រតិបត្ដិការនោះ ក៏មានការរារាំងពីខាងក្រុមហ៊ុនផងដែរ តែការរារាំងមិនទទួលបានជោគជ័យនោះទេ៕
